អតីតគណបក្សសង្គ្រោះជាតិអំពាវនាវទៅសហប្រធាននៃសន្និសីទទីក្រុងប៉ារីសឲ្យបើកកិច្ចប្រជុំបន្ទាន់មួយ ដោយអះអាងថា ការបោះឆ្នោតនៅពេលនេះ បាននាំមកនូវគ្រោះថ្នាក់ធ្ងន់ធ្ងរផ្នែកសេដ្ឋកិច្ចដល់កម្ពុជា ប៉ុន្ដែ អ្នកនាំពាក្យគណបក្សប្រជាជន ថា មិនអាចទៅរួចនោះទេ។
យោងតាមសេចក្ដីថ្លែងការណ៍ចេញផ្សាយតែមួយថ្ងៃប៉ុណ្ណោះ ក្រោយបិទបញ្ចប់ដំណើរការបោះឆ្នោតអាណត្តិទី៦ ឆ្នាំ២០១៨ អតីតគណបក្សសង្គ្រោះជាតិ បានទទូចទៅសហប្រធាននៃសន្និសីទសន្ដិភាពទីក្រុងប៉ារីស រួមមាន ឥណ្ឌូណេស៊ី និងបារាំង ឲ្យបើកកិច្ចប្រជុំបន្ទាន់មួយស្ដីពីបញ្ហានយោបាយនៅកម្ពុជា។
អតីតបបក្សប្រឆាំងមួយនេះក៏បានថ្កោលទោសការបោះឆ្នោតនេះ ថា បានបំផ្លាញដល់ឬសគល់នៃលទ្ធិប្រជាធិបតេយ្យនៅកម្ពុជា ហើយ រដ្ឋាភិបាលដែលកើតក្រោយការបោះឆ្នោតបែបនេះ គឺមិនគួរត្រូវបានទទួលស្គាល់ដោយសហគមន៍អន្ដរជាតិឡើយ។
អតីតគណបក្សប្រឆាំងអះអាងថា រដ្ឋាភិបាលថ្មីនេះ ក៏មិនអាចចុះកិច្ចព្រមព្រៀងជាមួយបណ្ដារដ្ឋាភិបាល ឬក្រុមហ៊ុនណាមួយនោះទេ ដោយថា រដ្ឋាភិបាលនេះ មិនអាចតំណាងឲ្យកម្ពុជានៅលើឆាកអន្ដរជាតិ និងគ្មានសុពលភាពផ្លូវច្បាប់។ មួយវិញទៀត អតីតបក្សប្រឆាំងព្រមានថា កម្ពុជានឹងទទួលរងទណ្ឌកម្ម និងវិបត្តិសេដ្ឋកិច្ចធ្ងន់ធ្ងរ ខណៈការបោះឆ្នោតនៅអាណត្តិនេះទទួលរងការរិះគន់ថា ដើរផ្ទុយពីគោលការណ៍ប្រជាធិបតេយ្យសេរីពហុបក្ស និងរដ្ឋធម្មនុញ្ញ ដែលជាច្បាប់កំពូលរបស់ជាតិ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន យល់ថា ការអំពាវនាវរបស់អតីតគណបក្សប្រឆាំងនេះ គ្រាន់តែជាការបញ្ចេញទស្សនៈមួយ និងមិនអាចទៅរួចនោះទេ។ លោកក៏ច្រានចោលក្ដីព្រួយបារម្ភរបស់ប្រទេសលោកសេរីមួយចំនួន ដែលចេញសេចក្ដីថ្លែងការណ៏ជាបន្ដបន្ទាប់ ដោយបង្ហាញការខកចិត្តពាក់ព័ន្ធនឹងដំណើរការបោះឆ្នោតនៅកម្ពុជាផងដែរ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន
អ្នកវិភាគនយោបាយ និងជាអ្នកស្រាវជ្រាវពីការអភិវឌ្ឍសង្គម លោក មាស នី យល់ថា ការអំពាវនាវរបស់អតីតបក្សប្រឆាំង នឹងមានប្រសិទ្ធិភាព ប្រសិនបើរដ្ឋាភិបាលថ្មីរបស់គណបក្សប្រជាជនកម្ពុជា នៅតែបន្ដដើរលើគន្លងចាស់ ដោយមិនព្រមស្ដារលទ្ធិប្រជាធិបតេយ្យឡើងវិញ។
ក្រោយការបោះឆ្នោតដែលត្រូវបានបញ្ចប់ទៅកាលពីថ្ងៃអាទិត្យកន្លងទៅថ្មីៗនេះ ប្រទេសកាន់របបលទ្ធិប្រជាធិបតេយ្យមួយចំនួនដូចជា សហរដ្ឋអាមេរិក សហភាពអឺរ៉ុប ប្រទេសអូស្ដ្រាលី កាណាដា និង បារាំង ជាដើម បានបង្ហាញការខកចិត្ត និងថ្កោលទោសការបោះឆ្នោតនៅកម្ពុជា ថា គ្មានភាពសេរី និងយុត្តិធម៌ទេ៕
