គណបក្សមួយចំនួនដែលបានចូលរួមប្រកួតប្រជែងការបោះឆ្នោតបង្ហាញប្រតិកម្មពីរផ្សេងគ្នាមួយក្រុមថា ការបោះឆ្នោតដំណើរការល្អអាចទទួលយកបាន និងមួយក្រុមទៀតថា ដំណើរបោះឆ្នោតនេះមិនទាន់អាចទទួលយកបានទេ។
គណបក្សប្រជាជនកម្ពុជាបានចេញសេចក្ដីថ្លែងការណ៍មួយដោយសម្ដែងសេចក្ដីរីករាយ ចំពោះលទ្ធផលបណ្ដោះអាសន្នរបស់ គ.ជ.ប ដោយថា ការបោះឆ្នោតជ្រើសតាំងតំណាងរាស្ត្រអាណត្តិទី៦នេះ មានប្រជាពលរដ្ឋ ៨២,១៧ ភាគរយបានទៅចូលរួមបោះឆ្នោត ដោយចំនួននេះមានការកើនឡើង បើប្រៀបធៀបទៅនឹងការបោះឆ្នោតអាណ្តត្តិទី៥ កន្លងទៅ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ ការបោះឆ្នោតលើកនេះថា មានលក្ខណៈល្អប្រសើរ ដោយសារ ប្រជាពលរដ្ឋទៅចូលរួមបោះឆ្នោតច្រើនដោយគ្មានការគំរាមកំហែងខុសពីលើកឡើងរបស់មតិមួយចំនួនផងដែរ។
អ្នកនាំពាក្យគណបក្សប្រជាធិបតេយ្យមូលដ្ឋានលោក សាម អ៊ីន មើលឃើញថា ទោះបីជាមុនការបោះឆ្នោតមានការការរំលាយគណបក្សប្រឆាំង ការគំរាមកំហែងទៅលើប្រព័ន្ធផ្សព្វផ្សាយ សង្គមស៊ីវិល និងរឹតត្បិតសិទ្ធិសេរីភាពក្នុងបញ្ចេញមតិក៏ដោយ ប៉ុន្តែលោកថា ការបោះឆ្នោតកាលពីថ្ងៃទី២៩ នេះ គឺមានដំណើរការល្អ ធ្វើឡើងទៅតាមគោលការណ៍ប្រជាធិបតេយ្យ ដោយប្រជាពលរដ្ឋមានសិទ្ធិក្នុងការសម្រេចចិត្តជ្រើសរើសមេដឹកនាំ។
អ្នកនាំពាក្យគណបក្សប្រជាធិបតេយ្យមូលដ្ឋានលោក សាម អ៊ីន
អ្នកនាំពាក្យគណបក្សហ៊ុន ស៊ិកប៉ិច លោក ញេប ប៊ុនជិន សុំមិនធ្វើអត្ថាធិប្បាយជាមួយអ្នកសារព័ត៌មាន។
អ្នកនាំពាក្យគណបក្សខ្មែររួបរួមជាតិលោក សង្ហឹ គិរី សុំមិនធ្វើអត្ថាធិប្បាយ ដោយសារ គណបក្សរបស់លោកមិនបានប្រជុំជាមួយសមាជិក ដើម្បីវាយតម្លៃពីទិដ្ឋភាពទូទៅ និងលទ្ធផលនៃការបោះឆ្នោតកាលពីម្សិលមិញនៅឡើយ។
មេដឹកនាំគណបក្សសម្ព័ន្ធដើម្បីប្រជាធិបតេយ្យ លោក ខឹម វាសនា យល់ថា ការបោះឆ្នោតកាលពីម្សិលមិញនេះ ធ្វើឡើងមិនទាន់មានតម្លាភាពនៅឡើយ ដោយសារសមាជិកគណបក្សលោកមួយចំនួនត្រូវបានគណៈកម្មាការបោះឆ្នោតដេញចេញមិនឲ្យចូលទៅក្នុងការិយាល័យបោះឆ្នោត និងអ្នកបោះឆ្នោតមួយចំនួនត្រូវបានគេគំរាមកំហែងផង។
មេដឹកនាំគណបក្សសម្ព័ន្ធដើម្បីប្រជាធិបតេយ្យ លោក ខឹម វាសនា
កាលពីម្សិលមិញនេះ ប្រជាពលរដ្ឋខ្មែរ និងក្រុមអ្នកគាំទ្រអតីតបក្សប្រឆាំងនៅក្រៅប្រទេស បានប្រមូលផ្ដុំគ្នារាប់ពាន់នាក់ នៅតាមបណ្ដាប្រទេសកាន់លទ្ធិប្រជាធិបតេយ្យធំៗលើពិភពលោក ដូចជា កូរ៉េ បារាំង ស្វីស ជប៉ុន អូស្ដ្រាលី កាណាដា និងសហរដ្ឋអាមេរិក តវ៉ាទៅនឹងការការបោះឆ្នោតនេះដោយថាផ្ទុយពីគោលការណ៍ប្រជាធិបតេយ្យសេរីពហុបក្ស។
ទោះយ៉ាងណា គ ជ ប អះអាងថា ការបោះឆ្នោតកាលពីម្សិលមិញនេះ ដំណើរការល្អ អនុវត្តតាមច្បាប់ គណបក្សចូលរួមប្រកួតប្រជែងមានភាពចាស់ទុំ កាត់បន្ថយជម្លោះផ្សេងៗ។