អ្នកតាមដានមួយចំនួនបង្ហាញការយល់ឃើញថា សន្លឹកឆ្នោតមិនបានការជិត៦០ម៉ឺនសន្លឹក ដែល គ.ជ.ប ប្រកាសឲ្យដឹងនោះ ជាសញ្ញាបញ្ជាក់ថា អ្នកចេញទៅបោះឆ្នោតមួយចំនួន ទៅទាំងភ័យខ្លាច ក្រោយពីអ្នកនយោបាយគំរាមថាអ្នកមិនទៅបោះឆ្នោតជា ក្រុមឧទ្ទាមក្រៅច្បាប់។
ក្រោយបិទបញ្ចប់ការបោះឆ្នោតមួយថ្ងៃ គ.ជ.ប បានប្រកាសថា សន្លឹកឆ្នោតមិនបានការមាន៥៩ម៉ឺន៦ពាន់៧៧៥សន្លឹក។ សមាជិកនិងជាអ្នកនាំពាក្យ គ.ជ.ប អះអាងថា ចំនួនសន្លឹកឆ្នោតមិនបានការនេះកើនឡើង បើធៀបទៅនឹងការបោះឆ្នោតជាតិអាណត្តិមុន អំឡុងឆ្នាំ២០១៣។
អ្នកវិភាគនយោបាយ លោកបណ្ឌិត មាស នី និយាយថា ការបង្ហាញតូលេខ របស់ គ.ជ.ប នៅពេលនេះ អាចជាការពិបាកឲ្យពលរដ្ឋគ្រប់និន្នាការជឿ បើធៀបទៅនឹងការប្រកាសរបស់ស្ថាប័នជាតិមួយនេះ អំឡុងការបោះឆ្នោតឆ្នាំឃុំ សង្កាត់ ឆ្នាំ២០១៧ ។
លោក មាស នី បន្ថែមថាការដែលអ្នកនយោបាយខ្មែរ ចោទថាអ្នកដែលមិនទៅបោះឆ្នោតជាអ្នកគាំទ្រក្រុមឧទ្ទាមក្រៅច្បាប់នោះ ជំរុញឲ្យពលរដ្ឋមួយចំនួនព្រួយបារម្ភហើយបានចេញទៅបោះឆ្នោតតែបង្ហាញការមិនពេញចិត្តតាមរយៈគូសសន្លឹកឆ្នោតចោល។
អ្នកវិភាគនយោបាយ លោកបណ្ឌិត មាស នី
អ្នកវិភាគនយោបាយ លោក ឯម សុវណ្ណារ៉ា និយាយថា បើគេពិនិត្យមើលពីលទ្ធផលបោះឆ្នោតឃុំ សង្កាត់ ឆ្នាំ២០១៧ អ្នកគាំទ្រ គណបក្សកាន់អំណាចមានជាង៥០%។ ចំណែកអតីតបក្សប្រឆាំងវិញមានជិត៥០%។
អ្នកវិភាគរូបនេះ លើកឡើងថាបើគណបក្សប្រឆាំងត្រូវបានគេផាត់ចេញពីឆាកនយោបាយហើយ នៅតែមានម្ចាស់ឆ្នោតជាង៨២%ចេញទៅបោះឆ្នោត ដូចការអះអាងរបស់ គ.ជ.ប មែន អ្នកទៅបោះឆ្នោតមួយចំនួនទៅទាំងបង្ខំចិត្តដោយសារតែពួកគេ មិនចង់ភ្ជាប់ខ្លួនទៅនឹងការ ចោទថា គាំទ្រក្រុមឧទ្ទាម តាមរយៈទៅគូសសន្លឹកឆ្នោតចោល។
អ្នកវិភាគនយោបាយ លោក ឯម សុវណ្ណារ៉ា
សមាជិក គ.ជ.ប និងជាអ្នកនាំពាក្យលោក ហង្ស ពុទ្ធា អះអាងថា ការដែលពលរដ្ឋចេញទៅបោះឆ្នោតច្រើននៅអាណត្តិនេះ ដោយសារតែការផ្សព្វផ្សាយរបស់ គ.ជ.បមានការទូលំទូលាយជាងមុន និងថាសន្លឹកឆ្នោតដែលមិនបានការនៅឆ្នាំ២០១៨នេះ កើនឡើងច្រើន ជាងអណត្តិមុនៗ មានអ្នកគូសខូចដោយមិនទាន់យល់ និងខ្លះទៀតគូសឲ្យខូចដោយចេតនា ។
សមាជិក គ.ជ.ប និងជាអ្នកនាំពាក្យលោក ហង្ស ពុទ្ធា
នាយកប្រតិបត្តិសម្ព័ន្ធគណៈនេយ្យភាពសង្គមកម្ពុជា លោក សន ជ័យ យល់ថា សន្លឹកឆ្នោតមិនបានការ ជាដើមចមមួយអាចឲ្យអ្នកជំនាញយកទៅធ្វើការវិភាគ និងវាយតម្លៃថា ដំណើរការបោះឆ្នោតមិនទាន់គោរពទៅតាមឆន្ទៈម្ចាស់ឆ្នោត បានគ្រប់និន្នានៅឡើយ។ លោក បន្តថាការសម្តែងមតិតាមរយៈគូសសន្លឹកឆ្នោតចោលនេះ ក៏ជំរុញឲ្យរដ្ឋាភិបាលថ្មីពិចារណាថាគួរតែថាតើគួររកវិធីបែបណាដើម្បីសម្រួលទឹកចិត្តពលរដ្ឋទាំងនោះ ពេលដែលខ្លួនឡើងកាន់អំណាចនោះ។
ប្រជាពលរដ្ឋដែលបានទៅបោះឆ្នោតជ្រើសតាំងតំណាងរាស្ត្រនីតិកាលទី ៦ នេះ មានចំនួន ៦ ៨៨៥ ៧២៩ ស្មើនឹង៨២,១៧ ភាគរយ នៃចំនួនអ្នកបានចុះឈ្មោះបោះឆ្នោតសរុប ៨ ៣៨០ ២១៧ នាក់។
