អ្នកឃ្លាំមើលមួយចំនួន បង្ហាញការព្រួយបារម្ភថា ការជំរុញអភិបាលកិច្ចល្អនិងសិទ្ធិមនុស្ស នឹងជួបបញ្ហាជាងមុន បើរដ្ឋាភិបាលថ្មី កើតចេញពីការបោះឆ្នោតនៅអាណត្តិថ្មីនេះ មានគណបក្សតែមួយដឹកនាំ។
ក្រោយបោះឆ្នោត១ថ្ងៃ អ្នកនាំពាក្យគណបក្សប្រជាជនកម្ពុជាលោក សុខ ឥសាន អះអាងថា នៅអាណត្តិថ្មីនេះ អាសនៈទាំង១២៥នៅក្នុងសភា អាចនឹងត្រូវគណបក្សប្រជាជនកម្ពុជា របស់លោកគ្រប់គ្រងទាំងអស់។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ និយាយថា បើស្ថាប័នរដ្ឋសភាមានតែគណបក្សមួយ ការធ្វើច្បាប់និងការស្នើច្បាប់ កើតចេញពីឆន្ទៈមនុស្សមួយក្រុម ហើយថាយន្តការបែបនេះ អាចបង្កជាបញ្ហាដល់ការធានាសិទ្ធិនិងតម្រូវការរបស់ពលរដ្ឋគ្រប់និន្នាការដែលរស់នៅក្នុងសង្គម។
លោក សន ជ័យ ឲ្យដឹងទៀតថា បើស្ថាប័នច្បាប់ មានបញ្ហាដោយសារតែយន្តការឯកបក្ស លោកថាការអនុវត្តច្បាប់នឹងមិនអាចធានាដល់ការពង្រឹងអភិបាលកិច្ចនៅថ្នាក់ក្រោមជាតិបានទេ។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ
ប្រធានគ្រប់គ្រងផ្នែកអង្កេតនៅអង្គការលីកាដូ លោក អំ សំអាត បង្ហាញការយល់ឃើញថា ការឈ្នះអាសនៈទាំងអស់ក្នុងសភាពិតជាជ័យជម្នះដែលកើតចេញពីការបោះឆ្នោត។ ប៉ុន្តែលោកថា បើរដ្ឋាភិបាលថ្មី ដែលកើតចេញពីបក្សតែមួយនេះ ខ្វះឆន្ទៈពិតប្រាកដក្នុងការលើកស្ទួយសិទ្ធិមនុស្ស និងអភិបាលកិច្ចល្អ លោកថាបញ្ហាសង្គមនឹងធ្ងន់ធ្ងរជាងមុន ព្រោះរដ្ឋាភិបាលបាត់ប្រព័ន្ធ តាមដាន ពីបក្សដែលមិនកាន់អំណាច។
ប្រធានគ្រប់គ្រងផ្នែកអង្កេតនៅអង្គការលីកាដូ លោក អំ សំអាត
អ្នកវិភាគនយោបាយ លោក ឯម សុវណ្ណារ៉ា យល់ថា ក្នុងប្រទេសប្រជាធិបតេយ្យ គេចាត់ទុក គណបក្សប្រឆាំង អង្គការសង្គមស៊ីវិល និងប្រព័ន្ធផ្សព្វផ្សាយ ជាដៃគូសំខាន់ក្នុងការឃ្លាំមើលការអនុវត្តច្បាប់ ដើម្បីជំរុញឲ្យមានតម្លាភាពសង្កម។
ប៉ុន្តែអ្នកវិភាគរូបនេះ យល់ថា យន្តការជំរុញសិទ្ធិមនុស្សនិងអភិបាលកិច្ចល្អ មិនចោទទៅលើបញ្ហារដ្ឋាភិបាលថ្មីនោះកើតចេញពីគណបក្សតែមួយនោះទេ ។ លោកថាបើគណបក្សថ្មីនេះ បើកទូលាយពីលំហូរប្រជាធិបតេយ្យ។
អ្នកវិភាគនយោបាយ លោក ឯម សុវណ្ណារ៉ា
ក្រោយពីតុលាការកំពូលប្រកាសរំលាយ គណបក្សសង្គ្រោះជាតិ កាលពីចុងឆ្នាំ២០១៧រួចមក តំណែងមេឃុំ នឹងចៅសង្កាត់ ជិត៥០០ត្រូវធ្លាក់ទៅលើគណបក្សប្រជាជនកម្ពុជា ជាហេតុនាំឲ្យអាសនៈនៅព្រឹទ្ធសភា ស្ទើរទាំងគ្រប់គ្រងដោយគណបក្សប្រជាជនកម្ពុជា។
បើដូចការអះអាងរបស់មន្ត្រីជាន់ខ្ពស់ គណបក្សប្រជាជនកម្ពុជាមែន គណបក្សប្រជាជនកម្ពុជានឹងគ្រប់គ្រងស្ថាប័នរដ្ឋសភាមួយទៀតនៅអាណត្តិថ្មីនេះ។
ទោះជាយ៉ាងណាសង្គមស៊ីវិលផ្តល់យោបល់ថា ដើម្បីកុំឲ្យសាធារណជនព្រួយបារម្ភ ពីបញ្ហាសិទ្ធិមនុស្ស និងអភិបាលកិច្ច រដ្ឋាភិបាលថ្មី ត្រូវប្រមូលធនធានមនុស្សពីគ្រប់និន្នាការ មកបំពេញការងារក្នុងស្ថាប័នរដ្ឋ ទាំងថ្នាក់ជាតិនិងថ្នាក់ក្រោមជាតិ បើកទូលាយពីលំហូប្រជាធិបតេយ្យ ពិសេសសកម្មភាពក្រុមអង្គការសង្គមស៊ីវិល និងប្រព័ន្ធផ្សព្វផ្សាយដែលហ៊ានផ្សាយការពិតកើតឡើងក្នុងសង្គម។