មេធាវីការពារក្តីឲ្យក្រុមហ៊ុនកាពីតូលស្នើទៅតុលាការរំលាយកិច្ចសន្យាក្រុមហ៊ុនជាមួយអតីតបុគ្គលិកជាង៣០នាក់ និង ទាមទារសំណងពីពួកគេ២ម៉ឺនដុល្លារក្នុងម្នាក់ដោយលើកឡើងថាពួកគេបានរំលោភលើកិច្ចសន្យាអំឡុងពេលបំពេញការងារឲ្យក្រុមហ៊ុន។
មេធាវី ខៀវ វ៉ាន តំណាងឲ្យក្រុមហ៊ុនកាពីតូលបានលើកក្នុងសវនាការនាថ្ងៃទី២ខែសីហានេះថា អតីតអ្នកបើករថយន្តឲ្យក្រុមហ៊ុនកាពីតូលបានលួចដឹកភ្ញៀវតាមផ្លូវ កិបកេងយកប្រាក់ជាប្រយោជន៍ផ្ទាល់ខ្លួន ធ្វើឲ្យប៉ះពាល់ដល់កិត្តិយសក្រុហ៊ុន ព្រមទាំងរំលោភលើកិច្ចសន្យាជាដើម។
ឆ្លើយតបនឹងករណីនេះ លោក ជឹម ឃៀន មេធាវីការពារឲ្យជនកម្មករ បានច្រានចោលការចោទប្រកាន់របស់មេធាវីការពារឲ្យក្រុមហ៊ុនកាពីតូល ដោយថាដើមចមដែលក្រុមហ៊ុនបញ្ឈប់កូនក្តីមកពីពួកគេបង្កើតសហជីពទាមទារឲ្យក្រុមហ៊ុនគោរពលក្ខខណ្ឌការងារស្របតាមច្បាប់។
មេធាវីរូបនោះស្នើទៅចៅក្រមពិចារណាលើអង្គហេតុនិងភស្តុតាង ហើយសម្រេចឲ្យកម្មករទាំង៣៣នាក់ បានទទួលប្រាក់អត្ថប្រយោជន៍ និងចូលធ្វើការងារនៅក្រុមហ៊ុនវិញ។
ក្រោយពីបញ្ចប់នីតិវិធីទាញហេតុផលផ្ទាល់មាត់ ចៅក្រមជំនុំជំរះ បានអះអាងថា នឹងជូនដំណឹងទៅមេធាវីទាំងពីរ ជុំវិញការសម្រេចសេចក្តីនៅពេលក្រោយ។
កម្មករដែលចូលស្តាប់សវនាការលោក ប៉ិល វឿន បានអះអាងថា លោកមិនមានជំនឿលើប្រព័ន្ធតុលាការនោះទេ ដោយលោកស្នើទៅរដ្ឋាភិបាលជួយអន្តរាគមន៍លើករណីនេះ ដើម្បីផ្តល់យុត្តិធម៌ជូនពួកគេ។
កម្មករដែលចូលស្តាប់សវនាការលោក ប៉ិល វឿន
អគ្គលេខាធិការសម្ព័ន្ធសហជីពវិស័យដឹកជញ្ជូនកម្ពុជា លោក អៀង គឹមហ៊ុន បានថ្លែងប្រាប់អ្នកសារព័ត៌មានថា ដើម្បីផ្តល់យុត្តិធម៌ដល់កម្មករ តុលាការត្រូវធ្វើការសម្រេចឈរលើគោលការណ៍ឯករាជ្យ។ លោកព្រមានថា បើមិនមានដំណោះស្រាយ កម្មករនឹងបន្តយុទ្ធសាស្ត្រថ្មី ដើម្បីទាមទារឲ្យទទួលបានផលវិជ្ជមាន។
អគ្គលេខាធិការសម្ព័ន្ធសហជីពវិស័យដឹកជញ្ជូនកម្ពុជា លោក អៀង គឹមហ៊ុន
វិវាទការងារនៅក្រុមហ៊ុនកាពីតូលនេះ ធ្លាប់ផ្ទុះហិង្សាររវាងក្រុមអតីតបុគ្គលិកក្រុមហ៊ុននិងក្រុមអ្នករត់រ៉ឺម៉កកង់បីរបស់សមាគមរួបរួមដើម្បីអភិវឌ្ឍន៍កាលពីឆ្នាំ២០១៥ ដែលបណ្តាលឲ្យអ្នកតវ៉ា១៤នាក់ជាអតីតបុគ្គលិកក្រុមហ៊ុននេះ រងរបួសធ្ងន់និងស្រាល ហើយភាគីខាងក្រុមអ្នករត់រ៉ឺម៉កកង់បីរងរបួសមួយចំនួនផងដែរ៕
