មេដឹកនាំបក្សកាន់អំណាច លោក ហ៊ុន សែន បានអះអាងជាថ្មីទៀតថា ការរំលាយគណបក្សសង្គ្រោះជាតិគឺដើម្បីបញ្ជៀសសង្គ្រាមនៅកម្ពុជា ខណៈក្រុមប្រទេសលោកសេរីបង្ហាញជំហមិនគាំទ្រការបោះឆ្នោត និងរំឭកឲ្យដោះលែង លោក កឹម សុខា។
លោក ហ៊ុន សែន ក្នុងពិធីជួបកម្មករក្នុងរាជធានីភ្នំពេញនៅថ្ងៃព្រហស្បតិ៍នេះថ្លែងរំឭកថា លោកគ្មានថ្ងៃអត់ឱនដល់ក្រុម ដែលចោទកូនប្រុសច្បងរបស់លោកថា ជាកូនបង្កើតរបស់មេដឹកនាំវៀតណាមនោះទេ ។ លោកថាការចោទប្រកាន់បែបនេះជាការមើលងាយដល់គ្រួសារត្រកូលហ៊ុន និងថាបានញុះញង់បង្កឲ្យមានជម្លោះផ្ទៃក្នុង ។
លោក ហ៊ុន សែន ថ្លែងទៀតថា ការបោះឆ្នោតឆ្នាំ២០១៣ ក្រុមនេះ បានគ្រប់គ្រងមណ្ឌលបោះឆ្នោតមួយចំនួន ដែលពេលនោះ ស្ទើរតែបង្កជាសង្គ្រាមផ្ទៃក្នុ្ងងទៅហើយ បើគ្មានរូបលោកទប់ស្ថានការណ៍នោះ ។
មេដឹកនាំរូបនេះ អះអាងទៀតថា ការរំលាយក្រុមនេះ ធ្វើឲ្យការបោះឆ្នោតអាណត្តិថ្មីនេះ ប្រព្រឹត្តទៅដោយសេរី ត្រឹមត្រូវ និងយុត្តធម៌ គ្មានបញ្ហាដូចអាណត្តិមុនកើតឡើងទៀតទេ ។
លោកនាយករដ្ឋមន្ត្រី ហ៊ុន សែន
ការបោះឆ្នោតឆ្នាំ២០១៣ អតីតគណបក្សសង្គ្រោះជាតិ ដណ្តើមបានអាសនៈ៥៥ ចំណែកបក្សកាន់អំណាច បានធ្លាក់ចុះពី៩០អាសនៈមក៦៨វិញ ពោលគឺបាត់អស់២២អាសនៈ។
ប៉ុន្តែនៅអាណត្តិថ្មីនេះ ក្រោយពីគណបក្សសង្គ្រោះជាតិត្រូវបានរំលាយ អ្នកនាំពាក្យបក្សកាន់អំណាចអះអាងថា អាសនៈទាំងអស់ក្នុងសភា អាចនឹងត្រូវបានមកលើគណបក្សប្រជាជនកម្ពុជា។
បើទោះបីជាការថ្លែងរបស់ លោក ហ៊ុន សែន មិនបញ្ចេញឈ្មោះក៏ដោយ ប៉ុន្តែសារនយោបាយនេះទំនងជាសំដៅទៅអតីតគណបក្សសង្គ្រោះជាតិ ដែលគណបក្សនេះ ត្រូវតុលាការកំពូល ប្រកាសឲ្យរំលាយកាលពីចុងឆ្នាំមុន មុនការបោះឆ្នោតមកដល់តាមបណ្តឹងរដ្ឋាភិបាល។ អតីតមេដឹកនាំបក្សប្រឆាំង លោក កឹម សុខា នៅបន្តជាប់ឃុំជិត១ឆ្នាំ គិតត្រឹមថ្ងៃទី២ខែសីហានេះ ក្រោមបទចោទថា «ក្បត់ជាតិ»។
ចំណាត់ការទៅលើគណបក្សសង្គ្រោះជាតិ និងចាប់ឃុំខ្លួនលោក កឹម សុខា ជំរុញឲ្យក្រុមប្រទេសលោកសេរី មានសហរដ្ឋអាមេរិក សហភាពអឺរ៉ុប កាណាដា អូស្ត្រាលី អាលឺម៉ង់ និងអង់គ្លេសជាដើម ហៅបរិយាកាសនយោបាយនៅកម្ពុជាថាបានព្យាយាមបំបិទសំឡេងប្រឆាំង។
ជាងនេះទៅទៀត នៅប៉ុន្មានថ្ងៃនេះប្រទេសទាំងនោះ បានចេញសេចក្តីថ្លែងការណ៍ជាបន្តបន្ទាប់ បង្ហាញជំហរមិនទទួលស្គាល់ការបោះឆ្នោតនៅកម្ពុជា ដោយថាបានដំណើការទៅផ្ទុយពីយន្តការប្រជាធិបតេយ្យ និងបានជំរុញឲ្យបក្សកាន់អំណាច ស្វែងរកការសម្របសម្រួលនយោបាយដោះលែងលោក កឹម សុខា ឈានទៅស្តារប្រជាធិបតេយ្យឡើងវិញ។
អតីតតំណាងរាស្ត្របក្សប្រឆាំង លោក អ៊ូ ច័ន្ទរ័ត្ន បានអះអាងថា បក្សប្រឆាំងគ្មានលទ្ធភាពបង្កសង្គ្រាមទេ ហើយថាការប្រកួតប្រជែងកន្លងទៅ បក្សនេះចង់ផ្លាស់ប្តូររបបដឹកនាំដោយសន្តិវិធីតាមរយៈនៃការបោះឆ្នោត។
អតីតមន្ត្រីបក្សប្រឆាំងរូបនេះ អះអាងទៀតថា បើបក្សកាន់អំណាចនៅតែគិតថាខ្លួនកំពុងបន្តឈ្នះហើយមិនអើពើទៅនឹងការជំរុញរបស់សហគមន៍អន្តរជាតិជាប្រទេសម្ចាស់ជំនួយនោះទេ ជ័យជម្នេះដែលបក្សកាន់អំណាចកំពុងទទួលបាននេះ និងជំរុញឲ្យពលរដ្ឋ និងមន្ត្រីរាជការជួបនឹងបញ្ហាជីវភាពធ្ងន់ធ្ងរ ដោយសារតែអន្តរជាតិហ៊ុមព័ទ្ធសេដ្ឋកិច្ច។
អតីតតំណាងរាស្ត្របក្សប្រឆាំង លោក អ៊ូ ច័ន្ទរ័ត្
របត់នយោបាយនៅកម្ពុជា ជំរុញឲ្យសហភាពអឺរ៉ុបព្រមានដកប្រព័ន្ធអនុគ្រោះពន្ធពីកម្ពុជា បើស្ថានការណ៍នយោបាយមិនវិលទៅ ធានាសិទ្ធិធ្វើនយោបាយ របស់គណបក្សប្រឆាំងឡើងវិញនោះ។
អ្នកជំនាញសេដ្ឋកិច្ច ដាក់ការព្រួយបារម្ភថា បើអន្តរជាតិដកប្រព័ន្ធអនុគ្រោះពន្ធមែន អ្នករងគ្រោះមុនគេគឺកម្មករជិត ១លាននាក់ ដែលកំពុងធ្វើការនៅក្នុងវិស័យកាត់ដេរ ដោយប្រព័ន្ធអនុគ្រោះពន្ធរបស់សហភាពអឺរ៉ុបនេះ បានផ្តល់លទ្ធភាពឲ្យអ្នកវិនិយោគ រកប្រាក់ចំណេញបាន និងមានលទ្ធភាពប្រកួតប្រជែងជាមួយប្រទេសក្នុងតំបន់ ។
