ប្រទេសសង្គមនិយមមួយចំនួនមានដូចជាចិន ឡាវ និងវៀតណាមជាដើមបានប្រកាសគាំទ្រការបោះឆ្នោតនៅកម្ពុជា ថា មានសេរី និង ត្រឹមត្រូវអាចទទួលយកបាន។
បន្ទាប់ពីកម្ពុជាបានបញ្ចប់ការបោះឆ្នោតជ្រើសតាំងតំណាងរាស្ដ្រនីតិកាលទី៦កាលពីថ្ងៃអាទិត្យកន្លងទៅនេះ ក្រសួងការបរទេសឡាវ និងសាធារណរដ្ឋប្រជាមានិតចិន បានចេញថ្លែងការណ៍គាំទ្រដំណើរការបោះឆ្នោតនៅកម្ពុជា និងជោគជ័យរបស់គណបក្សប្រជាជនរបស់លោកនាយករដ្ឋមន្ដ្រី ហ៊ុន សែន ដែលបានកាន់អំណាចជាង ៣០ឆ្នាំមកហើយ។
ភា្លមៗបន្ទាប់ពីការបោះឆ្នោតនៅកម្ពុជាត្រូវបានបញ្ចប់ អ្នកនាំពាក្យក្រសួងការបរទេសចិន លោក Geng Shuang បានថ្លែងគាំទ្រការបោះឆ្នោតនេះ ថា សម្រេចបានដោយជោគជ័យ និងថា ចិនបានត្រៀមខ្លួនរួចជាស្រេចដើម្បីធ្វើការជាមួយរដ្ឋាភិបាលថ្មី ទៅលើកិច្ចព្រមព្រៀងនានាដែលធ្វើឡើងរវាងមេដឹកនាំប្រទេសទាំងពីរ។
លោក Geng Shuang ថ្លែងទៀតថា សហគមន៍អន្ដរជាតិត្រូវគោរពកិច្ចការផ្ទៃកម្ពុជា និងការសម្រេចចិត្តរបស់ប្រជាពលរដ្ឋខ្មែរ និងជួយប្រទេសនេះឆ្ពោះទៅរកការអភិវឌ្ឍជាតិ និងស្ថិរភាពសង្គម។
ដោយឡែក សារព័ត៌មាន AKP ឲ្យដឹងថា នាយករដ្ឋមន្ដ្រីវៀតណាម លោក ង្វៀន សួន ហ្វ៊ុក បានផ្ញើលិខិតអបអរសាទរជ័យជំនះរបស់គណបក្សប្រជាជន និងថា នេះក៏ជាជោគជ័យរបស់ប្រទេសទាំងពីរផងដែរ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន លើកឡើងថា ការវាយតម្លៃដែលសុក្រឹត្យ និងត្រឹមត្រូវ គឺទាល់តែប្រទេសទាំងនោះបានបញ្ជូនអ្នកសង្កេតការណ៍របស់ខ្លួនមកកម្ពុជា។ ប៉ុន្ដែ លោកថា ប្រទេសខ្លះមិនបានបញ្ជូនអ្នកសង្កេតការណ៍ទេ និងបានវាយតម្លៃអាក្រក់អំពីដំណើរការបោះឆ្នោតនៅអាណត្តិនេះ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន
នាយកប្រតិបត្តិអង្គការណិចហ្វិច លោក សំ គន្ធាមី យល់ថា គណបក្សដែលឈ្នះឆ្នោតទៅដឹកនាំរដ្ឋាភិបាល គួរធ្វើយ៉ាងណាសម្របសម្រួលឲ្យស្ថានការណ៍នយោបាយបច្ចុប្បន្នត្រឡប់ទៅរកភាពល្អប្រសើរឡើងវិញ ដើម្បីឲ្យមានទំនាក់ទំនងល្អជាមួយប្រទេសលោកសេរី និងប្រទេសសង្គមនិយម។
នាយកប្រតិបត្តិអង្គការណិចហ្វិច លោក សំ គន្ធាមី
ខុសគ្នាពីក្រុមប្រទេសកុម្មុយនីស្ដ ក្រុមប្រទេសលោកសេរីមួយចំនួន ដូចជា សហរដ្ឋអាមេរិក សហភាពអឺរ៉ុប កាណដា ញូវសែឡែន បារាំង អាល្លឺមង់ និងអង់គ្លេសជាដើម បានវាយតម្លៃការបោះឆ្នោតនៅកម្ពុជា ថា គ្មានភាពសេរី និងយុត្តិធម៌ ខណៈ គ្មានវត្តមានគណបក្សសង្គ្រោះជាតិ ដែលជាអតីតគណបក្សប្រឆាំងដ៏ធំចូលរួម។ រីឯប្រទេសជប៉ុន ដែលជាម្ចាស់ជំនួយបោះឆ្នោតដល់កម្ពុជា ក៏មិនបានបង្ហាញជំហរណាមួយពាក់ព័ន្ធនឹងការបោះឆ្នោតនៅកម្ពុជាឡើយ បន្ទាប់ពីប្រកាសមិនបញ្ជូនអ្នកសង្កេតការណ៍របស់ខ្លួននោះ៕