ជប៉ុន ដែលបានជួយដល់ការបោះឆ្នោតរបស់កម្ពុជានោះ បានបង្ហាញការខកចិត្តចំពោះការបោះឆ្នោតនៅអាណត្តិទី៦នេះ ព្រមទាំងបានជំរុញទៅរដ្ឋាភិបាលបច្ចុប្បន្ន ឲ្យបើកផ្លូវចរចាជាមួយអតីតគណបក្សប្រឆាំងដើម្បីផ្សះផ្សាជាតិ។
សារព័ត៌មានជប៉ុន NHK ឲ្យដឹងថា រដ្ឋមន្ត្រីការបរទេសជប៉ុន លោក តារ៉ូ កូណូ បានជួបពិភាក្សាទ្វេភាគីជាមួយរដ្ឋមន្ត្រីការបរទេសកម្ពុជា លោក ប្រាក់ សុខុន នៅក្នុងកិច្ចប្រជុំមួយនៅប្រទេសសិង្ហបុរី កាលពីថ្ងៃម្សិលមិញនេះ។
ក្នុងកិច្ចប្រជុំនោះ ប្រមុខការទូតជប៉ុនបានប្រាប់ទៅប្រមុខការទូតកម្ពុជាថា រដ្ឋាភិបាលជប៉ុនខកចិត្តយ៉ាងខ្លាំងចំពោះលទ្ធផលនៃការបោះឆ្នោតនៅកម្ពុជាពេលនេះ ដោយថា មានសន្លឹកឆ្នោតជាច្រើន ត្រូវបាន គ.ជ.ប. ចាត់ទុកថា «មិនបានការ» ឬគ្មានសុពលភាព។
បើតាមការចុះផ្សាយរបស់សារព័ត៌មានជប៉ុនដដែលនេះ រដ្ឋមន្ដ្រីការបរទេសជប៉ុន លោក តារ៉ូ កូណូ បានទទូចឲ្យរដ្ឋាភិបាលកម្ពុជា បើកលំហប្រជាធិបតេយ្យឡើងវិញ និងស្វែងរកការចរចានយោបាយជាមួយអតីតគណបក្សប្រឆាំងដើម្បីផ្សះផ្សាជាតិ។
ប៉ុន្ដែ សារព័ត៌មានជប៉ុនបានដកស្រង់សម្ដីលោក ប្រាក់ សុខុន ចុះផ្សាយថា រដ្ឋាភិបាលកម្ពុជាបានរៀបចំការបោះឆ្នោត ស្របតាមគោលការណ៍ប្រជាធិបតេយ្យហើយ។
ការបង្ហាញនូវការខកចិត្តរបស់រដ្ឋាភិបាលជប៉ុននេះ គឺបន្ទាប់ពីក្រុមប្រទេសប្រជាធិបតេយ្យមួយចំនួន បានបង្ហាញការរិះគន់ និងថ្កោលទោសចំពោះការបោះឆ្នោតនៅកម្ពុជាថា គ្មានភាពសេរី និងយុត្តិធម៌នោះទេ ខណៈគ្មានវត្តមានអតីតគណបក្សសង្គ្រោះជាតិ ដែលជាអតីតគណបក្សប្រឆាំង ចូលរួមនោះ។
ក្រុមប្រទេសលោកសេរីដែលបង្ហាញការខកចិត្តទាំងនោះ រួមមាន សហរដ្ឋអាមេរិក សហភាពអឺរ៉ុប កាណដា ណូវែលសេឡង់ បារាំង អាល្លឺមង់ និងអង់គ្លេសជាដើម ហើយគេឃើញមានតែប្រទេសកាន់របបសង្គមនិយមប៉ុណ្ណោះ ដែលបង្ហាញការសាទរចំពោះការបោះឆ្នោតនៅកម្ពុជាថា ត្រឹមត្រូវ និងអាចទទួលយកបាន៕