អតីតបក្សប្រឆាំង បានអះអាងថា នឹងបន្តចរចាជាមួយគណបក្សកាន់អំណាចនៅកម្ពុជា ដោយថា ចាំបាច់ត្រូវមានវត្តមានភាគីទីបីចូលរួម ដើម្បីដោះស្រាយបញ្ហានយោបាយបច្ចុប្បន្ន និងរៀបចំការបោះឆ្នោតឡើងវិញ។
ក្នុងវេទិកាសំណេះសំណាលមួយជាមួយក្រុមអ្នកគាំទ្រនៅទីក្រុងមែលប៊ន ប្រទេសអូស្ដ្រាលី កាលពីថ្ងៃម្សិលមិញ មន្ដ្រីជាន់ខ្ពស់អតីតគណបក្សសង្គ្រោះជាតិ និងជាកូនស្រីបង្កើតរបស់លោក កឹម សុខា គឺកញ្ញា កឹម មនោវិទ្យា បានថ្លែងថា អតីតគណបក្សប្រឆាំង នឹងបន្ដការចរចាដើម្បីស្វែងរកដំណោះស្រាយជាមួយបក្សកាន់អំណាច ប៉ុន្ដែ កញ្ញាអះអាងថា ការចរចាលើកនេះ ចាំបាច់ត្រូវមានវត្តមានអន្ដរជាតិចូលរួម។
កញ្ញា កឹម មនោវិទ្យា បន្ដថា រដ្ឋាភិបាលរបស់លោក ហ៊ុន សែន កំពុងទទួលរងឥទ្ធិពលពីប្រទេសកុម្មុយនីស្ដចិន និងប្រាប់ឲ្យពលរដ្ឋកម្ពុជាប្រុងប្រយ័ត្នចំពោះវត្តមានរបស់ប្រទេសមហាអំណាចមួយនេះមកលើកម្ពុជា។
កញ្ញា កឹម មនោវិទ្យា កូនស្រីបង្កើតលោក កឹម សុខា
ក្នុងវេទិកានេះដែរ អតីតតំណាងរាស្ដ្រគណបក្សប្រឆាំង លោកស្រី មូ សុខហួរ ថ្លែងថា ក្រុមមេដឹកនាំអតីតគណបក្សសង្គ្រោះជាតិ នឹងបន្ដការតវ៉ានៅក្រៅប្រទេស ដើម្បីទាមទារឲ្យមានការបោះឆ្នោតឡើងវិញ ដោយលោកស្រីរិះគន់ថា ការបោះឆ្នោតថ្នាក់ជាតិ កាលពីថ្ងៃទី២៩ ខែកក្កដាកន្លងទៅនេះ គឺមិនមានភាពសេរី ត្រឹមត្រូវ និងយុត្តិធម៌នោះទេ។
ប៉ុន្ដែ ក្នុងពិធីជួបជាមួយកម្មករ កាលពីថ្ងៃទី២ ខែសីហា ប្រធានគណបក្សប្រជាជនកម្ពុជា លោក ហ៊ុន សែន បានថ្លែងជាថ្មីថា លោកគ្មានថ្ងៃអត់ឱនដល់ក្រុមប្រឆាំង ដែលលោកថា បានចោទកូនប្រុសលោកថា ជាកូនបង្កើតរបស់មេដឹកនាំវៀតណាមនោះទេ។ លោក ហ៊ុន សែន ថ្លែងថា ការចោទប្រកាន់បែបបនេះ គឺជាការប្រមាថមាក់ងាយដល់គ្រួសារបស់លោក និងថា បានញុះញង់ឲ្យមានជម្លោះផ្ទៃក្នុង។
ការបោះឆ្នោតជ្រើសតាំងតំណាងរាស្ត្រនីតិកាលទី៦ ដែលបង្ហាញថា គណបក្សកាន់អំណាចឈ្នះសំឡេងភាគច្រើនលើសលប់នោះ មិនត្រូវបានបណ្ដាប្រទេសប្រកាន់របបប្រជាធិបតេយ្យទទួលស្គាល់នោះឡើយ ខណៈដែលមានតែក្រុមប្រទេសកាន់របបកុម្មុយនីស្ដប៉ុណ្ណោះ ដែលបានចេញមុខប្រកាសគាំទ្រ មានដូចជា ចិន ឡាវ វៀតណាម និងរុស្ស៊ីជាដើម។
រីឯប្រទេសជប៉ុន ដែលជាម្ចាស់ជំនួយបោះឆ្នោតដល់កម្ពុជាវិញ ក៏មិនបានបង្ហាញជំហរណាមួយពាក់ព័ន្ធនឹងការបោះឆ្នោតនេះឡើយ បន្ទាប់ពីប្រកាសមិនបញ្ជូនអ្នកសង្កេតការណ៍របស់ខ្លួន៕