គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប ហៅក្ដីព្រួយបារម្ភរបស់ជប៉ុនថា មានលក្ខណៈនយោបាយ បន្ទាប់ពីប្រទេសមួយនេះ បានបង្ហាញការខកចិត្តចំពោះលទ្ធផលបោះឆ្នោតនៅកម្ពុជា ដែលថា មានសន្លឹកឆ្នោតជាច្រើន ត្រូវបានចាត់ទុកថា «មិនបានការ»។
ក្នុងជំនួបមួយកាលពីថ្ងៃសៅរ៍សប្ដាហ៍មុន នៅឯប្រទេសសិង្ហបុរី ប្រមុខការទូតជប៉ុន លោក តារ៉ូ កូណូ បានប្រាប់ទៅរដ្ឋមន្ដ្រីការបរទេសកម្ពុជា លោក ប្រាក់ សុខុន ថា ជប៉ុនមានខកចិត្តយ៉ាងខ្លាំងចំពោះលទ្ធផលបោះឆ្នោតនៅកម្ពុជា និងទទូចឲ្យរដ្ឋាភិបាលដឹកនាំដោយគណបក្សប្រជាជន បើកលំហូរប្រជាធិបតេយ្យឡើងវិញ និងស្វែងរកការចរចាជាមួយអតីតគណបក្សប្រឆាំង ដើម្បីផ្សះផ្សាជាតិ។
ប៉ុន្ដែ អគ្គលេខាធិការរងនៃគណៈកម្មាធិការជាតិរៀបចំការបោះឆ្នោត លោក សោម សូរីដា ចាត់ទុកអ្វីដែលរដ្ឋមន្ដ្រីក្រសួងការបរទេសជប៉ុនបានលើកឡើងនេះ ថា មិនឆ្លុះបញ្ចាំងទិដ្ឋភាពបច្ចេកទេស និងមានចរិតនយោបាយ។
អគ្គលេខាធិការរងនៃគណៈកម្មាធិការជាតិរៀបចំការបោះឆ្នោត លោក សោម សូរីដា
អ្នកនាំពាក្យគណបក្សប្រជាជនកម្ពុជា លោក សួស យ៉ារ៉ា យល់ថា នេះគ្រាន់តែជាក្ដីព្រួយបារម្ភមួយរបស់ជប៉ុនតែប៉ុណ្ណោះ។ ប៉ុន្ដែ លោកថា វាមិនប៉ះពាល់អ្វីដល់ភាពស្របច្បាប់នៃការបោះឆ្នោត និងរដ្ឋាភិបាលកើតក្រោយការបោះឆ្នោតនោះទេ។
លោកបន្ដថា៖ «ជាការយល់ឃើញរបស់ប្រទេសមួយ ហើយខកចិត្ត ព្រោះគាត់យល់ទៅលើតម្លៃរបស់គាត់មួយតើ។ ប៉ុន្ដែអ្វីដែលយើងធ្វើ មិនមែនសំដៅថា គេមិនទទួលការបោះឆ្នោតឯណា ដូចជា មិនមានអីយើងត្រូវបារម្ភទេ។ […] ៥២ប្រទេសបានបញ្ជូនអ្នកសង្កេតការណ៍មកកម្ពុជា តំណាងឲ្យមនុស្ស៤ពាន់លាននាក់នៅលើដែនដីទាំងមូលនៃ៦ពាន់លាននាក់។ អ្វីៗ សំខាន់បំ ផុតៗ អធិបតេយ្យភាព និងការទទួលស្គាល់លទ្ធផលការបោះឆ្នោតពីប្រជាជនកម្ពុជា»។
នាយកប្រតិបត្តិអង្គការណិចហ្វិច លោក សំ គន្ធាមី យល់ថា រដ្ឋាភិបាលកម្ពុជាគួរតែពិចារណក្ដីកង្វល់នានារបស់ជប៉ុន ដែលជាម្ចាស់ជំនួយបោះឆ្នោតរបស់កម្ពុជា។ លោកលើកឡើងថា រដ្ឋាភិបាលថ្មី ដែលទទួលរងតែការរិះគន់ និងថ្កោលទោសបែបនេះ នឹងធ្វើឲ្យខូចដល់ទំនាក់ទំនងរបស់កម្ពុជា ជាមួយប្រទេសផ្សេងទៀតនៅលើឆាកអន្ដរជាតិ។
នាយកប្រតិបត្តិអង្គការណិចហ្វិច លោក សំ គន្ធាមី
ការបង្ហាញនូវការខកចិត្តរបស់រដ្ឋាភិបាលជប៉ុននេះ គឺបន្ទាប់ពីក្រុមប្រទេសកាន់របបប្រជាធិបតេយ្យមួយចំនួន បានសំដែងការរិះគន់ និងថ្កោលទោសចំពោះការបោះឆ្នោតនៅកម្ពុជា ថា គ្មានភាពសេរី និងយុត្តិធម៌នោះទេ ខណៈគ្មានវត្តមានអតីតគណបក្ស សង្គ្រោះជាតិ ដែលជាអតីតគណបក្សប្រឆាំងចូលរួមនោះ។
ក្រុមប្រទេសលោកសេរីដែលបង្ហាញការខកចិត្តទាំងនោះ រួមមាន សហរដ្ឋអាមេរិក សហភាពអឺរ៉ុប កាណដា ញូវសែឡែន បារាំង អាល្លឺមង់ និងអង់គ្លេសជាដើម។ ទោះយ៉ាងណាក៏ដោយ ក៏ប្រទេសមួយចំនួនចេញមុខកោតសរសើរការបោះឆ្នោតនៅកម្ពុជា ថា ត្រឹមត្រូវ និងអាចទទួលយកបាន ដូចជា ចិន ឡាវ វៀតណាម និងហ្វីលីពីនជាដើម៕
