អភិបាលកិច្ច

មន្ដ្រីរដ្ឋាភិបាលថា ផលិតផលក្លែងក្លាយកើនឡើងដោយសារតែមានតម្រូវការច្រើន

លោក ពេជ្រ ចំរុង
| ០៧ សីហា ២០១៨
ម៉ោង ១២:២៦

សន្និសីទសារព័ត៍មានស្តីពី លទ្ធផលនៃកិច្ចសហប្រតិបត្តិ បង្រ្កាបផលិតផលក្លែងក្លាយ ចំនួន ៨៨ តោន ថ្ងៃទី ០៦ សីហា ២០១៨ នៅទីស្តីការក្រសួងមហាផ្ទៃ

មន្ដ្រីរដ្ឋាភិបាលលើកឡើងថា តម្រូវការក្នុងស្រុកមានការកើនឡើងជាហេតុធ្វើឲ្យជនទុច្ចរិតឆ្លៀតឱកាសលួចនាំចូលឬ ផលិត ផលិតផលក្លែងក្លាយច្រើនជាងមុន។

ថ្លែងក្នុងសន្និសីទសារព័ត៌មានមួយកាលពីថ្ងៃម្សិលមិញ អនុរដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ លោក មៀជ សុផាន់ណា មានប្រសាសន៍ថា ការកើនឡើងនៃផលិតផលក្លែងក្លាយ គឺស្របពេលកម្ពុជាមានសេដ្ឋកិច្ចរីកចម្រើនដែលបណ្ដាលឲ្យមានកំណើនតម្រូវការផងដែរ ជាហេតុធ្វើឲ្យជនខិលខូចមួយចំនួនឆ្លៀតកេងចំណេញ និងលួចផលិតផលិតផលក្លែងក្លាយ។

យើងដឹងហើយថា ដោយសារប្រទេសយើងរីកចម្រើន សេដ្ឋកិច្ចមានការរីកចម្រើន តម្រូវការក៏ច្រើន ដើម្បីឲ្យជីវភាពយើងតាមទាន់នៅពេលវេលានៃការរីកចម្រើននេះ យើងត្រូវការគ្រឿងឧបភោគ បរិភោគ អញ្ចឹងដើម្បីឆ្លើយតបតម្រូវការ ដោយសារផលិតផលក្នុងស្រុកនៅមានកម្រិត អញ្ចឹងការនាំចូលមានសព្វគ្រប់សារពើ។ អ្នកឆ្លៀតឳកាស ជនទុច្ចរិតជនខិលខូច គាត់ចម្លងតាម

អនុរដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ លោក មៀជ សុផាន់ណា

លោក មៀជ សុផាន់ណា ឲ្យដឹងទៀតថា រយៈពេល៣ខែចុងក្រោយ គិតចាប់ពីខែឧសភា ដល់ខែកក្កដា សមត្ថកិច្ចបានចុះបង្ក្រាប និងរឹបអូសផលិតផលក្លែងក្លាយបានចំនួន ៤ករណី ស្មើនឹង ៨៨តោនបន្ថែមទៀត។ លោកបញ្ជាក់បន្ថែមថា ផលិតផលក្លែងក្លាយដែលសមត្ថកិច្ចចុះបង្ក្រាប និងរឹបអូសបានមកពី ទីតាំងសិប្បកម្មផលិតកាហ្វេក្លែងក្លាយ ទីតាំងផលិតសាច់ប៉ាតេមិនអនុឡោមតាមច្បាប់ សិប្បកម្មផលិតម្រេច និងកាហ្វេខុសច្បាប់ និងករណីនាំចូលផលិត វេចខ្ចប់ខុសច្បាប់ ដូចជា ផលិតផលម៉ាក Saint Amand ទឹកបរិសុទ្ធ Evian ស្រាបៀរម៉ាក Corona និងផលិតមួយចំនួនទៀត ដែលធ្វើឲ្យប៉ះពាល់ខ្លាំងដល់សុខភាពអ្នកបរិភោគ។

បើតាមលោក មៀជ សុផាន់ណា ផលិតផលទាំងនោះ បង្កផលប៉ះពាល់ធ្ងន់ធ្ងរដល់សុខភាពអ្នកប្រើប្រាស់។ លោកក៏បានព្រមានចាត់វិធានការច្បាប់ថែមទៀត ដល់អ្នកផលិតផលិតផលក្លែងក្លាយទាំងនោះផងដែរ។

នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ យល់ថា ការទប់ស្កាត់ផលិតផលក្លែងក្លាយនៅលើទីផ្សារ អាចមានប្រសិទ្ធិភាពទៅបាន លុះត្រាតែរដ្ឋាភិបាលមានយន្ដការត្រួតពិនិត្យច្បាស់លាស់ ហើយមន្ដ្រីអនុវត្តច្បាប់ ត្រូវមានជំនាញ និងមិនប្រព្រឹត្តអំពើពុករលួយ។

ការប្រកាសសង្រ្គាមប្រឆាំងផលិតផលក្លែងក្លាយ វាអាចទៅរួច លុះត្រាតែមន្ត្រីហ្នឹងមានជំនាញ និងមានមធ្យោបាយគ្រប់គ្រាន់។ បើមិនដូច្នេះទេ យើងបារម្ភខ្លាចថា របស់ក្លែងក្លាយវាទៅជារបស់ពិត របស់ពិតបែបទៅជារបស់ក្លែង ក្លាយ។ អញ្ចឹងរឿងហ្នឹង ត្រូវគិតគួរមធ្យោបាយត្រួតពិនិត្យ ហើយធ្វើយ៉ាងម៉េចកុំឲ្យមន្ត្រីចុះអនុវត្តច្បាប់ប្រព្រឹត្តអំពើពុករលួយ

នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ

អ្នកស្រាវជ្រាវពីការអភិវឌ្ឍសង្គម លោក ប៉ា ចន្ទរឿន រិះគន់ភាពកម្សោយនៃការអនុវត្តច្បាប់ ការគ្រប់គ្រងសុវត្ថិភាពចំណីអាហារ ការប្រព្រឹត្តអំពើពុករលួយ និងតួនាទីមន្ដ្រីកាំកុងត្រូល ដែលថា ចាំបាច់ត្រូវបំពេញការងាររបស់ខ្លួនឲ្យបានម៉ត់ចត់។

បើនិយាយឲ្យខ្លីគឺវាទាក់ទងទៅនឹងអំពើពុករលួយក្នុងការគ្រប់គ្រងវិស័យហ្នឹងតែម្ដង។ […] នៅពេលដែលស្ថា ប័នរដ្ឋរបស់យើង ស្ថាប័នកាំកុងត្រូលដែលជាអ្នកត្រួតពិនិត្យគុណភាព គ្រឿងឧបភោគបរិភោគ ថ្នាំពេទ្យអីជាដើមហ្នឹង មិនបានបំពេញតួនាទីរបស់ខ្លួនឲ្យបានត្រឹមត្រូវ ជាពិសេសគឺមានគណនេយ្យភាពសង្គម

អ្នកស្រាវជ្រាវពីការអភិវឌ្ឍសង្គម លោក ប៉ា ចន្ទរឿន

កាលពីខែមេសា ឆ្នាំ២០១៨ ក្រសួងមហាផ្ទៃបានកិនកម្ទេចផលិតផលក្លែងក្លាយប្រមាណជាង ៦០តោន បន្ទាប់ពីរកឃើញថា អាចបង្កគ្រោះថ្នាក់ដល់អ្នកប្រើប្រាស់។ ផលិតផលក្លែងក្លាយ ដែលអាជ្ញាធរបង្ក្រាបបាននោះ ភាគច្រើន ជាគ្រឿងសម្អាង ដែលផលិតនៅក្នុងប្រទេសកម្ពុជា ហើយនាំចេញទៅក្រៅ រួចទើបនាំចូលមកលក់នៅកម្ពុជាវិញ ដើម្បីឲ្យប្រជាពលរដ្ឋជឿជាក់ ថា ជាផលិតមកពីក្រៅប្រទេស៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។