លោកនាយករដ្ឋមន្រ្តី ហ៊ុន សែន អំពាវនាវទៅភាគីពាក់ព័ន្ធរួមទាំងម្ចាស់ក្រុមហ៊ុនកាត់ដេរសម្លៀកបំពាក់ និងដេរស្បែកជើងទាំងអស់ត្រូវបង្កើតគិលានដ្ឋានឲ្យបានគ្រប់រោងចក្រដើម្បីធានាពីសុវត្ថិភាពរបស់កម្មករ។
ក្នុងជំនួបជាមួយក្រុមកម្មករក្នុងខេត្តកំពង់ស្ពឺនៅថ្ងៃនេះលោក ហ៊ុន សែន បានថ្លែងថា នៅអាណត្តិថ្មីនេះ ប្រជាពលរដ្ឋរួមទាំងក្រុមកម្មករបានបោះឆ្នោតគាំទ្រគណបក្សប្រជាជនកម្ពុជាយ៉ាងច្រើនលើសលប់ ដែលលោកថា រដ្ឋាភិបាលថ្មីត្រូវតែខិតខំធ្វើ កំណែទម្រង់ដើម្បីឲ្យជីវភាពរបស់ប្រជាពលរដ្ឋ និងកម្មករកាន់តែល្អប្រសើរជាងមុន។
ក្នុងឱកាសនោះលោកនាយករដ្ឋមន្រ្តី ហ៊ុន សែន បានក្រើនរំឮកទៅភាគីពាក់ព័ន្ធត្រូវយកចិត្តទុកដាក់ចំពោះសុខទុក្ខកម្មករ ដោយបង្កើតគិលានដ្ឋាន កែលំអរបរិស្ថានក្នុងរោងចក្រឲ្យបានល្អប្រសើរ និងត្រូវយកចិត្តទុកដាក់ចំពោះការដឹកជញ្ជូនកម្មករផងដែរ។
លោកនាយករដ្ឋមន្ត្រី ហ៊ុន សែន
ប្រធានសហភាពការងារកម្ពុជា លោក អាត់ ធន់ បានសាទរចំពោះសារអំពាវនាវរបស់លោកនាយករដ្ឋមន្រ្តី ហ៊ុន សែន នេះ ប៉ុន្តែ លោក អាត់ ធន់ ថាដើម្បីឲ្យប្រសាសន៍នោះមានប្រសិទ្ធិភាពលុះត្រាតែរដ្ឋាភិបាលដាក់វិធានការតឹងរឹងឲ្យមន្រី្តដែលពាក់ព័ន្ធចុះតាមដាន និងអង្កេតតាមបណ្តារោងចក្រជាប្រចាំ ដោយតម្រូវឲ្យថៅកែរៀបចំរោងចក្រស្របទៅតាមស្តង់ដារ ទើបអាចកាត់បន្ថយបញ្ហាបាន។
ប្រធានសហភាពការងារកម្ពុជា លោក អាត់ ធន់
លោក អាត់ ធន់ និយាយថា បើតាមរបាយការណ៍ដែលលោកទទួលបានពីអង្គការ ILO គឺមានរោងចក្រជាង១១០០ក្រុមហ៊ុន ក្នុងនោះ៩០០ក្រុមហ៊ុនមានសិទ្ធិនាំចេញផ្ទាល់ ហើយថា ភាគច្រើនក្រុមហ៊ុនធំៗមានស្តង់ដារបានរៀបចំឲ្យមានពេទ្យប្រចាំការក្នុងរោងចក្រ ខណៈរោងចក្រជាច្រើនទៀត គឺពុំមានគិលានដ្ឋាន ទារកដ្ឋាន និងមិនបានរៀបចំឲ្យមានបរិយាកាសល្អនោះទេ។
របាយការណ៍បេឡាជាតិសន្ដិសុខសង្គមចេញផ្សាយពេលថ្មីៗនេះ បង្ហាញថា ចំនួនកម្មកររោងចក្រកាត់ដេរដួលសន្លប់នៅឆ្នាំ ២០១៧បានកើនឡើង៣៨ភាគរយបើធៀបនឹងឆ្នាំ ២០១៦។ ដោយរបាយការណ៍នេះបញ្ជាក់ថា កម្មកររោងចក្រចំនួន១ ៦០៣នាក់បានដួលសន្លប់ខណៈពេលកំពុងធ្វើការនៅឆ្នាំ២០១៧ បើប្រៀបធៀបទៅនឹងឆ្នាំមុនចំនួន ១ ១៦០នាក់។
របាយការណ៍ប្រចាំឆ្នាំរបស់ ប.ស.ស នេះផងដែរបង្ហាញថា មានការថយចុះ ៥៦ភាគរយ នៃគ្រោះថ្នាក់ចរាចរណ៍ដែលពាក់ព័ន្ធនឹងកម្មករកាត់ដេរនៅឆ្នាំ ២០១៧ បើប្រៀបធៀបនឹងឆ្នាំ ២០១៦ ៕
