អង្គការ UNESCO និងក្រសួងអប់រំយុវជននិងកីឡារួមជាមួយក្រសួងការងារបង្កើតកម្មវិធីបង្រៀនជំនាញតាមប្រព័ន្ធអនឡាញដើម្បីផ្ដល់ឱកាសដល់យុវជនដែលបោះបង់ការសិក្សាអាចបន្តរៀនសូត្របានទៀត ដោយការចាប់យកជំនាញច្បាស់លាស់មួយសម្រាប់ធ្វើការនាពេលអនាគត។
ក្នុងពិធីប្រកាសសម្ពាធដាក់ឲ្យអនុវត្តសាកល្បងគម្រោងកម្មវិធីអប់រំកម្រិតមូលដ្ឋាន រដ្ឋមន្ត្រីក្រសួងអប់រំ យុវជន និងកីឡាលោក ហង់ ជួនណារ៉ុន ថ្លៃងថា យុវជនដែលបានបោះបង់ការសិក្សាត្រឹមថ្នាក់ទី៧ អាចបន្តការសិក្សា ហើយអាចបន្តទៅថ្នាក់បណ្ដុះបណ្ដាលផ្នែកបច្ចេកទេសនិងវិជ្ជាជីវៈដែលជួយបង្កើនសមត្ថភាពរបស់ពួកគេបន្ថែមទៀត។
លោកបន្តថា យុវជនមានលទ្ធភាពពង្រឹងសមត្ថភាព និងចំណេះដឹងដែលមានស្រាប់ឲ្យកាន់តែប្រសើរជាងមុន ដើម្បីសម្រេចគោលដៅនិងក្ដីស្រមៃរបស់ខ្លួន ហើយកាត់បន្ថយភាពក្រីក្រដោយទទួលបានការងារសមរម្យជួយលើកកម្ពស់ជីវភាពគ្រួសារផងដែរ។
អគ្គលេខាធិការដ្ឋាននៃក្រុមប្រឹក្សាជាតិកម្ពុជាដើម្បីអភិវឌ្ឍន៍ យុវជននិងជាអគ្គនាយកដ្ឋានយុវជននៃក្រសួងអប់រំយុវជននិងកីឡា លោក ចឹក លីម មានប្រសាសន៍ថា ក្នុងកម្មវិធីសិក្សាថ្មីឈ្មោះ«BEEP»នេះ យុវជនអាចរៀននៅផ្ទះតាមប្រព័ន្ធអនឡាញ ប៉ុន្តែក្នុងករណីយុវជនមិនយល់ចំពោះមេរៀនដែលខ្លួនកំពុងរៀននៅត្រង់ចំណុចណាមួយនោះ ពួកគេអាចទៅជួបជាមួយគ្រូផ្ទាល់ដើម្បីសួរត្រង់ចំណុចទាំងអស់នោះបាន។
លោកបន្តថា មុខវិជ្ជាដែលបានដាក់ឲ្យយុវជនសិក្សានោះមានចំនួន ១១ មុខ ក្នុងចំណោមមុខវិជ្ជាទាំងអស់ ក៏មានមុខវិជ្ជាគោលសំខាន់ ២ ដែលយុវជនត្រូវសិក្សានោះ គឺគណិតវិទ្យានិងភាសាខ្មែរ ។
អគ្គលេខាធិការដ្ឋាននៃក្រុមប្រឹក្សាជាតិកម្ពុជាដើម្បីអភិវឌ្ឍន៍ យុវជននិងជាអគ្គនាយកដ្ឋានយុវជននៃក្រសួងអប់រំយុវជននិងកីឡា លោក ចឹក លីម
លោកបន្តថា កម្មវិធីនេះនឹងចាប់ផ្ដើមអនុវត្តន៍សាកល្បងនៅមណ្ឌលសិក្សាចំនួន ១០ កន្លែង គឺ រាជធានីភ្នំពេញចំនួន ៥មណ្ឌល និងខេត្តសៀមរាបចំនួន ៥ មណ្ឌល។ លោកបន្តថា យុវជនដែលខេត្តសៀមរាបអាចចុះឈ្មោះសិក្សានៅមណ្ឌលជាតិយុវជនកម្ពុជា ហើយសម្រាប់នៅរាជធានីភ្នំពេញយុវជនអាចចុះឈ្មោះនៅវិទ្យាស្ថានបច្ចេកវិជ្ជាកម្ពុជា។
តំណាងអង្គការយូណេស្គូលោក សេនតូ ឃែទ្រី មានប្រសាសន៍ថា ការបង្កើតកម្មវិធីនេះឡើង ដើម្បីជួយជំរុញឲ្យយុវជនដែលបោះបង់ការសិក្សានៅថ្នាក់អនុវិទ្យាល័យ មានឱកាសកាន់តែច្រើនក្នុងការទទួលបានការអប់រំឡើងវិញ។ លោកបន្តថា កន្លងមកសិស្សដែលបោះបង់ការសិក្សានៅថ្នាក់អនុវិទ្យាល័យតិចតួចដែលវិលមករកការអប់រំជាថ្មី។
បើតាមរបាយការណ៍របស់អង្គការ Aide et Action (AEA)ចេញផ្សាយឆ្នាំ២០១៧ បានឲ្យដឹងថា កុមារកម្ពុជាជាង២៥ម៉ឺននាក់បានបោះបង់ការសិក្សារបស់ខ្លួននៅកម្រិតបឋមសិក្សាដើម្បីទៅជួយបំពេញការងារឪពុកម្តាយដោយសារជីវភាពក្រីក្រ ខណៈអង្គការមួយនេះបានជួយកុមារកម្ពុជាក្រីក្រប្រមាណ៦ម៉ឺននាក់ឲ្យត្រឡប់ទៅសាលារៀនវិញក្នុងរយៈពេល៤ឆ្នាំចុងក្រោយនេះ។
