គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប នឹងប្រកាសលទ្ធផលផ្លូវការនៃការបោះឆ្នោតជ្រើសតាំងតំណាងរាស្ដ្រនីតិកាលទី៦ នៅថ្ងៃពុធនេះ។
សេចក្ដីប្រកាសព័ត៌មានរបស់ គ.ជ.ប កាលពីថ្ងៃម្សិលមិញ ឲ្យដឹងថា ការប្រកាសលទ្ធផលបោះឆ្នោតផ្លូវការនេះ គឺបន្ទាប់ពីគ្មានពាក្យបណ្ដឹងដែល គ.ជ.ប និងក្រុមប្រឹក្សាធម្មនុញ្ញត្រូវដោះស្រាយបន្ដទៀតនោះទេពាក់ព័ន្ធនឹងលទ្ធផលបោះឆ្នោតបណ្ដោះអាសន្ន។
ការប្រកាសលទ្ធផលបោះឆ្នោតជាផ្លូវការនេះ នឹងចាប់ផ្ដើមពីម៉ោង ៧និង៣០ល្ងាច តាមទូរទស្សន៍ជាតិកម្ពុជា វិទ្យុជាតិកម្ពុជា FM 96M Hz វិទ្យុជាតិកម្ពុជា AM 918KMz វិទ្យុវត្តភ្នំ FM 105.70MHz វិទ្យុ និងទូរទស្សន៍អនឡាញរបស់ គ.ជ.ប។
គ.ជ.ប បញ្ជាក់ទៀតថា លទ្ធផលបោះឆ្នោតផ្លូវការ គឺជាការប្រកាសឈ្មោះបេក្ខជនជាប់ឆ្នោតជាតំណាងរាស្ដ្រ និងចំនួនអាសនៈសម្រាប់គណបក្សនយោបាយឈរឈ្មោះបោះឆ្នោតតាមមណ្ឌលនីមួយៗ។
ប៉ុន្ដែ បើតាមលទ្ធផលបណ្តោះអាសន្នដែលចេញដោយ គ.ជ. ប បង្ហាញថា គណបក្សប្រជាជនកម្ពុជាទទួលបានសំឡេងច្រើនជាងគេនៅគ្រប់រាជធានី-ខេត្ត ពោលគឺគណបក្សកាន់អំណាចមួយនេះទទួលបានសំឡេង ៤,៨៨៩,១១៣។ ចំណែឯ គណបក្សដែលបានសំលេងលំដាប់ទី២ និងទី៣ គឺគណបក្សហ៊្វុនស៊ីនប៉ិចទទួលបាន ៣៧៤,៥១០សំឡេង និងគណបក្សសម្ព័ន្ធដើម្បីប្រជាធិបតេយ្យទទួលបាន ៣០៩,៣៦៤សំឡេង៕