រដ្ឋមន្ដ្រីការបរទេសអង់គ្លេសទទួលបន្ទុកកិច្ចការប្រចាំតំបន់អាស៊ី និងប៉ាស៊ីហ្វិច លោក Mark Field នឹងមកទស្សនកិច្ចនៅកម្ពុជា និងតំបន់អាស៊ី បន្ទាប់ពីលោកបានថ្លែងរិះគន់បញ្ហាសិទ្ធិមនុស្ស និងលទ្ធិប្រជាធិបតេយ្យនៅកម្ពុជា។
សេចក្ដីប្រកាសព័ត៌មានរបស់ក្រសួងការបរទេសអង់គ្លេស ឲ្យដឹងថា រដ្ឋមន្ដ្រីក្រសួងការបរទេសអង់គ្លេស លោក Mark Field កាលពីថ្ងៃម្សិលមិញនេះ បានចាប់ផ្ដើមដំណើរទស្សនកិច្ចរបស់លោក មកកាន់ប្រទេសចំនួន ៦ នៅតំបន់អាស៊ី ដូចជា ឥណ្ឌូណេស៊ី ហ្វីលីពីន ថៃ ព្រុយនេ ឡាវ និងកម្ពុជា។
ក្នុងដំណើរទស្សនកិច្ច រដ្ឋមន្ដ្រីការបរទេសអង់គ្លេសរូបនេះ គ្រោងជួបជាមួយ លោកនាយករដ្ឋមន្ដ្រី ហ៊ុន សែន និងក្រុមអង្គការសង្គមស៊ីវិលក្នុងស្រុកផងដែរ។
មុនដំណើរទស្សនកិច្ចមកប្រទេសកម្ពុជា និងតំបន់អាស៊ីនេះ កាលពីថ្ងៃទី៣១ខែកក្កដា លោក Mark Field បានថ្លែងរិះគន់ការបោះឆ្នោតនៅកម្ពុជាថា គ្មានភាពសេរីនិងយុត្តិធម៌នោះទេ។ លោកសំដែងក្ដីបារម្ភផងដែរជុំវិញបញ្ហាសិទ្ធិមនុស្ស និងលទ្ធិប្រជាធិបតេយ្យនៅកម្ពុជាពេលនេះ ដូចជា ការរំលាយគណបក្សសង្គ្រោះជាតិ ការបន្ដឃុំខ្លួនលោក កឹម សុខា និងការបិទសិទ្ធិធ្វើនយោបាយរបស់មន្ដ្រីអតីតបក្សប្រឆាំង១១៨រូបជាដើម៕