ស្ត្រីវ័យជិត ៨០ឆ្នាំម្នាក់ដែលជាសកម្មជនដីធ្លីក្នុងសហគមន៍បឹងកក់ ត្រូវបានតុលាការកោះហៅឲ្យចូលរួមសវនាការនៅសប្តាហ៍ក្រោយនេះ ដើម្បីឆ្លើយដោះបន្ទុកក្រោមការចោទថា បានជេរប្រមាថជាសាធារណៈ និងគំរាមសម្លាប់។
ក្នុងដីកាកោះចុះថ្ងៃទី៦ ខែសីហា ដែលវីអូឌីទើបទទួលបានថ្ងៃនេះ ព្រះរាជអាជ្ញារងសាលាដំបូងរាជធានីភ្នំពេញ លោក តុប ឈុនឡុង បានបង្គាប់ទៅអ្នកស្រី ង៉ែត ឃុន អាយុ ៧៦ឆ្នាំ ឲ្យចូលរួមសវនាការនៅថ្ងៃទី២៤ សីហា វេលាម៉ោង ៨កន្លះព្រឹក ដើម្បីឆ្លើយដោះបន្ទុកពីការចោទប្រកាន់ទៅលើស្ត្រីសកម្មជនដីធ្លីរូបនេះ។
ដីកាកោះនេះឲ្យដឹងថា កាលពីខែមីនា ឆ្នាំ២០១៧ ចៅក្រមស៊ើបសួរសាលាដំបូងរាជធានីភ្នំពេញ បានចោទប្រកាន់ទៅពលរដ្ឋសហគមន៍បឹងកក់ចំនួន ៦នាក់ មានលោកស្រី ង៉ែត ឃុន អ្នកស្រី ទេពវន្នី អ្នកស្រី ហេង មុំ អ្នកស្រី ឆេង លាភ អ្នកស្រី គង់ ចន្ថា និងអ្នកស្រី តុល ស្រីពៅ ពីបទជេរប្រមាទជាសាធារណៈ និងគំរាមថា នឹងសម្លាប់ ដែលរឿងនេះបានកើតឡើងតាំងពីឆ្នាំ២០១២ នៅសហគមន៍បឹងកក់។
ប៉ុន្តែ សកម្មជនដីធ្លីដែលរងការចោទប្រកាន់ទាំងនោះ បានច្រានចោលការចោទប្រកាន់នេះ ដោយថា ការចោទប្រកាន់នោះជារឿងអយុត្តិធម៌សម្រាប់ពួកគេជាជនរងគ្រោះ៕
