បន្ទាប់ពីលោកនាយករដ្ឋមន្រ្តី ហ៊ុន សែន មានប្រសាសន៍ថា មានមន្រ្តីមួយចំនួនក្នុងគណបក្សហ៊្វុនស៊ិនប៉ិច និងបក្សមួយផ្សេងទៀត កំពុងរត់ការយកលុយដើម្បីទទួលបានតួនាទីនោះ កាលពីម្សិលមិញនេះ គណបក្សហ៊្វុនស៊ិនប៉ិចបានព្រមានទៅមន្រ្តីរបស់ខ្លួន មិនឲ្យធ្វើបែននោះទេ ដោយថា ករណីនោះវាពុំមែនជានយោបាយរបស់បក្ស និងជាសកម្មភាពពុករលួយ។
គណបក្សរាជានិយមួយនេះ បានព្រមានទៅមន្ត្រីរបស់ខ្លួនបែបនេះ បន្ទាប់ពីលោកនាយករដ្ឋមន្ត្រី ហ៊ុន សែន ក្នុងពិធីជួបសំណេះសំណាលជាមួយក្រុមកម្មករនៅរាជធានីភ្នំពេញកាលពីម្សិលមិញ បានបង្ហើបឲ្យដឹងថា គណបក្សចំនួនពីរ កំពុងរត់ការយកលុយ ដើម្បីបានតួនាទីណាមួយដែលរដ្ឋាភិបាលប្រគល់ជូនក្នុងអណត្តិថ្មីនេះ។
លោក ហ៊ុន សែន ថ្លែងបែបនេះសំដៅទៅដល់គណបក្សខ្មែររួបរួមជាតិរបស់លោក ញឹក ប៊ុនឆៃ និងមន្រ្តីមួយចំនួនក្នុងជួរគណបក្សហ៊្វុនស៊ិនប៉ិច។
លោកនាយករដ្ឋមន្ត្រី ហ៊ុន សែន
ប៉ុន្តែ ក្នុងសេចក្តីជូនដំណឹងមួយចុះថ្ងៃទី១៥ ខែសីហា ប្រធានគណៈកម្មការដោះស្រាយកិច្ចការទូទៅរបស់គណបក្សហ៊្វុនស៊ិនប៉ិច លោក យូ ហុកគ្រី បានហាមឃាត់ដាច់ខាតចំពោះថ្នាក់ដឹកនាំគ្រប់លំដាប់ថ្នាក់នៃគណបក្សនេះ ដោយមិនឲ្យយកលុយរត់ការដើម្បីបានតំណែង ឬតួនាទីណាមួយនោះឡើយ និងព្រមានថា បើបុគ្គលណាជាប់ពាក់ព័ន្ធករណីនេះ ត្រូវទទួលទោសចំពោះមុខច្បាប់។
វីអូឌីបានស្វែងរកការបកស្រាយពីគណបក្សរួបរួមជាតិរបស់លោក ញឹក ប៊ុនឆៃ ផងដែរ ប៉ុន្តែ លេខទូរស័ព្ទរបស់លោក និងអ្នកនាំពាក្យគណបក្សនេះ ពុំអាចទាក់ទងបាននោះឡើយ។
បើតាមលទ្ធផលបណ្តោះអាសន្នដែលចេញដោយ គ.ជ.ប. បង្ហាញថា គណបក្សប្រជាជនកម្ពុជាទទួលបានសំឡេងច្រើនជាងគេនៅគ្រប់រាជធានី-ខេត្ត ពោលគឺគណបក្សកាន់អំណាចមួយនេះ ទទួលបានសំឡេង ៤,៨៨៩,១១៣។
ចំណែឯ គណបក្សដែលបានសំលេងលំដាប់ទី២ និងទី៣ គឺគណបក្សហ៊្វុនស៊ីនប៉ិចទទួលបាន ៣៧៤,៥១០សំឡេង និងគណបក្សសម្ព័ន្ធដើម្បីប្រជាធិបតេយ្យទទួលបាន ៣០៩,៣៦៤សំឡេង៕