គណបក្សប្រជាជនកម្ពុជា ដែល គ.ជ.ប ប្រកាសថា បានឈ្នះអាសនៈទាំងអស់ក្នុងសភាចំនួន ១២៥នោះ បានប្តេជ្ញាថា រដ្ឋាភិបាលថ្មីនឹងបន្តជំរុញការអភិវឌ្ឍតាមគោលការណ៍ប្រជាធិបតេយ្យ ឈរលើស្មារតីបង្រួបបង្រួមជាតិ។
ក្នុងសេចក្តីថ្លែងការណ៍ចុះថ្ងៃទី១៥ ខែសីហា ក្រៅពីថ្លែងអំណរគុណម្ចាស់ឆ្នោតហើយនោះ គណបក្សនេះបានប្តេជ្ញាថា នឹងបន្តសហការជាមួយបណ្តាគណបក្សនយោបាយ និងសង្គមស៊ីវិល តាមគោលការណ៍ប្រជាធិបតេយ្យ និងនីតិរដ្ឋ ដោយឈរលើស្មារតីបង្រួបបង្រួមជាតិ។
សេចក្តីថ្លែងការណ៍ចុះថ្ងៃទី១៥ ខែសីហា
អតីតតំណាងរាស្ត្រគណបក្សប្រឆាំង លោក អ៊ូ ច័ន្ទរ័ត្ន និយាយថា លោកហាក់គ្មានជំនឿលើការប្តេជ្ញាចិត្តរបស់បក្សកាន់អំណាចនេះទេ ដោយថា រដ្ឋាភិបាលថ្មីនេះ កើតចេញពីការកម្ទេចប្រព័ន្ធប្រជាធិបតេយ្យនៅមុនការបោះឆ្នោត។
អតីតតំណាងរាស្ត្រគណបក្សប្រឆាំង លោក អ៊ូ ច័ន្ទរ័ត្ន
អ្នកនាំពាក្យសមាគមអាដហុកការពារសិទ្ធិមនុស្ស លោក ស៊ឹង សែនករុណា លើកឡើងថា បញ្ហានីតិរដ្ឋបានចាក់ឫសជ្រៅក្នុងសង្គមកម្ពុជា ដោយសារតែប្រព័ន្ធអនុវត្តច្បាប់មានស្តង់ដារពីរ។
មន្ត្រីការពារសិទ្ធិមនុស្សរូបនេះ រម្លឹកថា ជនដៃដល់វាយតំណាងរាស្ត្រអតីតបក្សប្រឆាំងឲ្យរបួសធ្ងន់ធ្ងរ ជាប់ពន្ធនាគារតែ ១ឆ្នាំ ក្រោយមកត្រូវបានដំឡើងឋានៈ ដោយឡែក អ្នកស្រី ទេព វន្នី ដែលចេញតវ៉ាដោយសន្តិវិធី ប្រឆាំងនឹងការបណ្តេញចេញដោយបង្ខំនោះ ត្រូវតុលាការកាត់ទោសឲ្យជាប់ពន្ធនាគាររហូត ២ឆ្នាំកន្លះ។
អ្នកនាំពាក្យសមាគមអាដហុកការពារសិទ្ធិមនុស្ស លោក ស៊ឹង សែនករុណា
អ្នកតាមដានពីការអភិវឌ្ឍសង្គម លោក ប៉ា ច័ន្ទរឿន លើកឡើងថា ដើម្បីជំរុញអភិបាលកិច្ចល្អ សិទ្ធិមនុស្ស និងប្រជាធិបតេយ្យ ក្បាលម៉ាស៊ីនដឹកនាំរដ្ឋ ជាគោលការគ្រឹះ ត្រូវមានអ្នកឃ្លាំមើលដូចជា សង្គមស៊ីវិល ប្រព័ន្ធផ្សព្វផ្សាយ និងគណប្រឆាំង ប៉ុន្តែថា បើក្បាលម៉ាស៊ីនដឹកនាំមានតែមួយគណបក្ស ការជំរុញប្រជាធិបតេយអាចជួបការលំបាក។
អ្នកតាមដានពីការអភិវឌ្ឍសង្គម លោក ប៉ា ច័ន្ទរឿន
ទោះជាយ៉ាងណា គណបក្សប្រជាជនកម្ពុជាបានប្តេជ្ញាដែរថា រដ្ឋាភិបាលថ្មីនឹងពុះពារធ្វើអ្វីៗគ្រប់យ៉ាង ដើម្បីធានាសន្តិភាព ស្ថិរភាព សន្តិសុខ កែទម្រង់អភិបាលកិច្ច ពង្រឹងស្ថាប័នសាធារណៈ កសាងរដ្ឋបាលស្អាតស្អំដើម្បីឲ្យពលរដ្ឋគ្រប់រូប រស់នៅប្រកបដោយសុខដុមរមនាក្នុងសង្គមកម្ពុជាមួយដែលគោរពតម្លៃមនុស្ស ប្រជាធិបតេយ្យ សេរី និងយុត្តិធម៌៕
