មហាអំណាចយក្សចិនប្រកាសជំហរថានឹងចែករំលែកបទពិសោធន៍ផ្នែកគ្រប់គ្រងប្រទេសដល់កម្ពុជា បន្ទាប់ពីបក្សកាន់អំណាចរបស់លោកនាយករដ្ឋមន្រ្តី ហ៊ុន សែន ឈ្នះការបោះឆ្នោតដោយគ្រប់គ្រងបានអាសនៈទាំងអស់ក្នុងសភានៅអាណត្តិថ្មីនេះ។
កាលពីថ្ងៃពុធ ទីភ្នាក់ងារព័ត៌មានចិនស៊ិនហួរ បានដកស្រង់សម្តី ប្រធានាធិតីចិន លោក ស៊ី ជីនពីង មកចុះផ្សាយថា ចិននឹងបន្ដរឹតចំណងកិច្ចសហប្រតិបត្តិការចែករំលែកបទពិសោធន៍ដល់កម្ពុជា ខាងផ្នែកគ្រប់គ្រងប្រទេស ដឹកនាំបក្ស និងជួយគាំទ្រដល់ការអភិវឌ្ឍជាតិ។
លោកប្រធានាធិបតីចិន ស៊ី ជីនពីង
អ្នកនាំពាក្យគណបក្សប្រជាជនកម្ពុជា លោក សុខ ឥសាន ហៅជំហរបស់ចិននេះថា ជាសន្តានចិត្តដ៏ល្អរបស់ចិនសម្រាប់កម្ពុជា។
ប៉ុន្តែនៅពេលសួរថា តើបក្សកាន់ណាចបារម្ភពីឥទ្ធិពលចិននេះ អាចនឹងទាញកម្ពុជាឲ្យវិលទៅរករបបកុម្មុយនីស្តផ្តាច់ការ ដូចពីអតីតកាលឬទេ? អ្នកនាំពាក្យរូបនេះឆ្លើយថា វាអាស្រ័យលើជំហរបស់កម្ពុជាខ្លួនឯងតែប៉ុណ្ណោះ ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន
នាយកប្រតិបត្តិអង្គការតម្លាភាពកម្ពុជា លោក ព្រាប កុល សរសេរនៅលើទំព័រហ្វេសប៊ុក របស់លោក នៅសប្តាហ៍នេះថា ចិនបានសម្រេចមហិច្ឆតាក្នុងការគ្រប់គ្រងសេដ្ឋកិច្ច និងនយោបាយនៅកម្ពុជា។
ចំណែកអ្នកជំនាញសេដ្ឋកិច្ច លោក ង៉ែត ជូ បានសរសេរនៅលើទំព័រហ្វេសប៊ុក របស់លោកដែរ ថា ចិនកំពុងប្រើយុទ្ធសាស្ត្រធំៗ៣ដើម្បីទន្ទ្រានទីផ្សារនិងពង្រីកឥទ្ធិពលលើទឹកដីកម្ពុជា។
លោកថាយុទ្ធសាស្ត្រទី១ ចិនឆក់យកបេះដូងកម្ពុជា តាមរយៈកសាងភាពល្អូកល្អឺនជាមួយរដ្ឋាភិបាល។ យុទ្ធសាស្ត្រទី២ ចិនចាក់បញ្ចូលឈាម តាមរយៈផ្តល់កម្ចីសាធារណៈដល់កម្ពុជា និងទី៣ចិនត្រួតត្រាគ្រោងឆ្អឹង របស់កម្ពុជា គឺត្រួតត្រាហេដ្ឋារចនាសម្ពន្ធ័សំខាន់ៗមានកំពង់ផែសមុទ្រជាដើម។
លោក ង៉ែត ជូ បានលើកជា ឧទាហរណ៍ថា មហាអំណាចយក្សចិន បានធ្វើរួចហើយទៅលើបណ្តាប្រទេសមួយចំនួន ដូចជារឹបអូសយកកំពង់ផែសមុទ្រនៅស្រីលង្កា និងនៅប្រេស៊ីល។
ភ្លាមៗក្រោយប្រកាសលទ្ធផលបោះឆ្នោតទាំងប្រធានាធិបតីនិងនាយករដ្ឋមន្រ្តីចិន បានប្រកាសសាទរជ័យជម្នះគណបក្សកាន់អំណាចរបស់លោកនាយករដ្ឋមន្រ្តីហ៊ុន សែន ខណៈដែលសហរដ្ឋអាមេរិកបានព្រមានពង្រីកទណ្ឌកម្មបន្ថែមទៀតមកលើមន្ត្រីជាន់ខ្ពស់កម្ពុជា៕