ក្រសួងការងារនិងបណ្ដុះបណ្ដាលវិជ្ជាជីវៈ ឲ្យដឹងថាខ្លួននឹងបើកឈ្នួលនិងប្រាក់អត្ថប្រយោជន៍ជូនកម្មករនិយោជិតនៅថ្ងៃទី២០ ខែសីហា ខាងមុខនេះ ក្រោយថៅកែបានសម្លាប់ខ្លួនដោយមិនបានបើកប្រាក់ឈ្នួលឲ្យកម្មករ។
នៅថ្ងៃទី១៧ ខែសីហានេះ ក្រសួងការងារនិងបណ្ដុះបណ្ដាលវិជ្ជាជីវៈ បានចេញសេចក្ដីជូនដំណឹងថា ក្រុមក្រសួងការងារក្រសួងនឹងបើកឈ្នួល និងប្រាក់អត្ថប្រយោជន៍ជូនកម្មករនិយោជិតទាំងអស់នៅថ្ងៃទី២០ ខែសីហា នៅសាលាខណ្ឌពោធិ៍សែនជ័យ រាជធានីភ្នំពេញ។ ក្រសួងថា កម្មករដែលបើកប្រាក់ឈ្នួលនៅថ្ងៃខាងមុខនេះ ត្រូវយកកាតសម្គាល់ខ្លួននិយោជិតក្នុងរោងចក្រ សៀវភៅការងារ ឬប័ណ្ណបេឡាជាតិរបបសន្តិសុខសង្គម ឬអត្តសញ្ញណប័ណ្ណសញ្ជាតិខ្មែរ ឬលិខិតឆ្លងដែន ឬកិច្ចសន្យាការងារ រួមទាំងបណ្ណបើកប្រាក់ឈ្នួលប្រចាំខែរបស់កម្មករម្នាក់ៗបើមាន។
កាលពីថ្ងៃទី១០ ខែសីហា កន្លងមក រោងចក្រកាត់ដេរសម្លៀកបំពាក់ ជូលី អឹភើរឹល (JULEE APPREL) ស្ថិតក្នុងភូមិចំការឱឡឹក សង្កាត់កាកាប ខណ្ឌពោធិសែន រាជធានីភ្នំពេញ បាននាំគ្នាប្រមូលផ្ដុំនៅមុខរោងចក្រតវ៉ា ដោយទាមទារឲ្យក្រសួងការងារ និងភាគីពាក់ព័ន្ធផ្សេងៗដោះស្រាយសំណងដល់ពួកគេ បន្ទាប់ពីថៅកែបានសម្លាប់ខ្លួនកាលពីចុងខែកក្កដា ឆ្នាំ២០១៨ កន្លងទៅ ដោយមិនបានបើកប្រាក់ឈ្នួលឲ្យពួកគេ។ ក្រោយពីមានការតវ៉ានេះ នៅថ្ងៃទី៨ ខែសីហា ឆ្នាំ២០១៨ លោកនាយករដ្ឋមន្រ្តី ហ៊ុន សែន បានបញ្ជាឲ្យមន្ត្រីក្រោមឱកាសធ្វើដោះស្រាយប្រាក់ឈ្នួលឲ្យកម្មររោងចក្រនោះឲ្យបាន ឆាប់។
បើតាមក្រុមកម្មករ អះអាងកាលពីថ្ងៃទី១០ ខែសីហា កន្លងទៅថា រោងចក្រ ជូលី អឹភើរឹល (JULEE APPREL) មានកម្មករសរុប២៧០នាក់ និងមានថៅកែជាជនជាតិកូរ៉េខាងត្បូងបានចង់កសម្លាប់ខ្លួនក្រោយថ្ងៃបោះឆ្នោត ហើយថៅកែរោងចក្រនេះជំពាក់ប្រាក់ឈ្នួលកម្មករម្នាក់ចម្លោះពី២៥០ដុល្លារទៅ៣០០ដុល្លារ៕
