កាលពីល្ងាចម្សិលមិញ អគ្គីភ័យបានឆាបឆេះផ្សារ «រុងក្លឿ» ដែលស្ថិតក្នុងស្រុកអារ័ញ្ញ ខេត្តស្រះកែវ ប្រទេសថៃ និងបណ្ដាលឲ្យខូចខាតដល់តូបអាជីវករខ្មែរមួយចំនួន ដែលលក់ដូរនៅទីនោះ។
វេបសាយអគ្គស្នងការនគរបាលជាតិបានចុះផ្សាយកាលពីម្សិលមិញថា នៅម៉ោង ៦ល្ងាចម្សិលមិញ អគ្គីភ័យបានឆាបឆេះអគារ B និង C នៃផ្សាររុងក្លឿ ខណៈអាជ្ញាធរថៃបានបញ្ជូនរថយន្តពន្លត់អគ្គីភ័យជាង ១០គ្រឿង ដើម្បីជួយអន្តរាគមន៍បាញ់ពន្លត់ ហើយរហូតដល់ម៉ោង ៧ និង៤០នាទី ទើបភ្លើងរលត់ទាំងស្រុង។
ក្រោយហេតុការណ៍អគ្គីភ័យនេះ អាជ្ញាធរអះអាងថា មានចំនួន ៨តូបត្រូវបានឆាបឆេះ និងថា តូបភាគច្រើនជារបស់អាជីវករខ្មែរដែលលក់នៅទីនោះ មានដូចជា កម្រាលពូក ផាហ៊ុម និងម៉ុង ភួយជាដើម។
បើតាមការចុះផ្សាយរបស់អគ្គស្នងការនគរបាលជាតិ អាជ្ញាធរមិនទាន់រកឃើញមូលហេតុច្បាស់លាស់នៅឡើយទេ ប៉ុន្ដែ សន្និដ្ឋានជាដំបូងថា អាចមកពីឆ្លងចរន្ដអគ្គិសនី៕