តុលាការកំពូលនៅថ្ងៃពុធនេះ បានសម្រេចច្រានចោលបណ្តឹងសុំនៅក្រៅឃុំ របស់អតីតមេដឹកនាំបក្សប្រឆាំងលោក កឹម សុខា និងបង្គាប់ឲ្យបន្តឃុំខ្លួននៅក្នុងពន្ធនាគារដដែល។
លោក កឹម សុខា ត្រូវសមត្ថកិច្ចចាប់ខ្លួនកាលពីថ្ងៃទី៣ខែកញ្ញាឆ្នាំ២០១៧ គិតមកដល់ថ្ងៃពុធនេះ មេដឹកនាំបក្សប្រឆាំងធ្លាប់ធ្វើការផ្នែកសិទ្ធិមនុស្សរូបនេះ បានជាប់ពន្ធនាគារជិត១ឆ្នាំហើយ។
ប៉ុន្តែសំណុំរឿងដ៏ចម្រូងចម្រាសននេះ ត្រូវបានមេធាវីការពារក្តីប្តឹងជំទាស់ជាបន្តបន្ទាប់រហូតដល់តុលាការកំពូលបើកសវនាការនៅថ្ងៃពុធនេះ ទាក់ទិនទៅនឹងបណ្តឹងសុំនៅក្រៅឃុំ។
ក្រោយបិទបញ្ចប់សាវនាការ មេធាវីការពារក្តី លោក ផែង ហេង ប្រាប់អ្នកសារព័ត៌មានថា តុលាការកំពូល បានសម្រេចតម្កល់សាលដីកាសាលាឧទ្ធរណ៍ ទុកជាបានការ និងបង្គាប់ឲ្យបន្តឃុំខ្លួនកូនក្តីរបស់លោក គឺលោក កឹម សុខា ទោះបីជាមេធាវីលើកឡើងថា បញ្ហាជំងឺកៀបសរសៃរបស់កូនក្តី ត្រូវការចេញទៅវះកាត់នៅក្រៅប្រទេសក៏ដោយ។
អតីតតំណាងរាស្ត្រគណបក្សសង្គ្រោះជាតិលោក អ៊ូ ច័ន្ទរ័ត្ន អះអាងថា មេបក្សរបស់ខ្លួន ហាក់បានត្រូវចាប់ ធ្វើជាចំណាប់ខ្លំាង ដើម្បីជាថ្នូរអ្វីមួយជាមួយសហគមន៍អន្តរជាតិ។ ប៉ុន្តែលោកជឿងថា តាមប្រតិកម្មពីរយៈសហគមន៍អន្តរជាតិ លោក កឹម សុខា អាចនឹងត្រូវដោះលែងឆាប់ៗ។
អតីតតំណាងរាស្ត្រគណបក្សសង្គ្រោះជាតិលោក អ៊ូ ច័ន្ទរ័ត្ន
សាលាដំបូងរាជធានីភ្នំពេញ បានចោទប្រកាន់លោក កឹម សុខា ពីបទ«ក្បត់ជាតិ»តាមបណ្តឹងរបស់រដ្ឋាភិបាល។ ប៉ុន្តែការចោទប្រកាន់នេះជំរុញឲ្យសហគមន៍អន្តរជាតិលោកសេរី វាយតម្លៃថា ជាចេតនានយោបាយចង់បំបាត់សំឡេងប្រឆាំង និងជំរុញឲ្យដោះលែងវិញ ដើម្បីស្តារប្រជាធិបតេយ្យនៅកម្ពុជាឡើងវិញ។
អ្នកតាមដាននយោបាយ និងវិភាគបញ្ហាសង្គមលោក គឹម សុខ វិភាគថា ការចាប់ឃុំខ្លួនលោក កឹម សុខា និងការរំលាយគណបក្សសង្គ្រោះជាតិ កើតចេញពីការភ័យខ្លាចបាត់បង់អំណាច របស់ដៃគូប្រកួត។
អ្នកវិភាគរូបនេះ យល់ថា លទ្ធភាពនៃការដោះលែងលោក កឹមសុខា អាចត្រូវការពេលបន្ថែមទៀត ដើម្បីឲ្យអ្នកគាំទ្រលោក កឹម សុខា និងអ្នកគាំទ្រលោក សម រង្ស៊ី វាយប្រហារគ្នាកាន់តែខ្លាំង ឈានដល់ការបែកបាក់។
អ្នកតាមដាននយោបាយ និងវិភាគបញ្ហាសង្គមលោក គឹម សុខ
នៅថ្ងៃនេះដែរ ការិយាល័យឧត្តមស្នងការអង្គការសហប្រជាជាតិប្រចាំកម្ពុជា បានសរសេរនៅលើគេហព័ររបស់ខ្លួន អំពាវនាវឲ្យលែងលោក កឹម សុខា និងសកម្មជននយោបាយផ្សេងទៀត ដោយថា ចាត់ទុកថា ការបន្តឃុំខ្លួនអ្នកទាំងនោះធ្វើឡើងដោយបំពាន។
