អង្គការសិទ្ធិមនុស្សអន្ដរជាតិមួយបានជំរុញឲ្យបន្ថែមសម្ពាធលើរដ្ឋាភិបាលកម្ពុជា បើទោះបីជាអ្នកជាប់ឃុំមួយចំនួន រួមមានអ្នកការពារសិទ្ធិមនុស្ស និងអ្នកសារព័ត៌មានជាដើម ត្រូវបានតុលាការដោះលែងឲ្យមានសេរីភាពវិញ។
ក្នុងសេចក្ដីថ្លែងការណ៍ចេញផ្សាយកាលពីថ្ងៃម្សិលមិញ អង្គការអន្ដរជាតិ Civil Rights Defenders ដែលមានមូលដ្ឋាននៅរដ្ឋធានី Stockholm ប្រទេសស៊ុយអែត បានស្វាគមន៍ចំពោះការដោះលែងសកម្មជនដីធ្លីតំបន់បឹងកក់ អ្នកព័ត៌មានវិទ្យុអាស៊ីសេរី និងអ្នកទោសមនសិការផ្សេងៗទៀត។ ប៉ុន្ដែ អង្គការមួយនេះថា ពួកគេទាំងនេះ មិនគួរត្រូវបានចោទប្រកាន់ និងផ្ដន្ទាទោសតាំងពីដំបូងមកម្ល៉េះ ដោយហេតុថា អ្នកស្រី ទេព វន្នី បានចូលរួមការតវ៉ាដោយសន្ដិវិធីប្រឆាំងនឹងការរំលោភយកដីសហគមន៍របស់ពួកគាត់។
មួយថ្ងៃប៉ុណ្ណោះក្រោយការដោះលែងអ្នកស្រី ទេព វន្នី អតីតអ្នកយកព័ត៌មានវិទ្យុអាស៊ីសេរី២នាក់ គឺលោក អ៊ួន ឈិន និងលោក យាង សុធារិន្ទ ក៏ត្រូវបានអនុញ្ញាតឲ្យនៅក្រៅឃុំផងដែរ កាលពីថ្ងៃម្សិលមិញ បន្ទាប់ពីពួកគេរងការចោទថា បានលួចផលិតព័ត៌មានបញ្ជូនទៅសហរដ្ឋអាមេរិក និងបង្កអសន្ដិសុខដល់ស្ថិរភាពជាតិ។
ប៉ុន្ដែ បើតាមសេចក្ដីថ្លែងការណ៍ អង្គការ Civil Rights Defenders ទទូចឲ្យសហគមន៍អន្ដរជាតិដាក់សម្ពាធបន្ថែមទៀតមកលើរដ្ឋាភិបាល ជុំវិញការធ្វើឲ្យធ្លាក់ចុះនៃបញ្ហាសិទ្ធិមនុស្សនៅកម្ពុជា ដោយថា រដ្ឋាភិបាលមួយនេះមិនអាចយកជីវិត និងសេរីភាពរបស់ពលរដ្ឋ មកធ្វើជាខែលដើម្បីបន្ថយការរិះគន់លើការបោះឆ្នោតដ៏ចម្រូងចម្រាស់មួយ និងបញ្ហាសិទ្ធិមនុស្សរបស់ខ្លួនឡើយ។
អង្គការមួយនេះក៏ស្នើដល់សហភាពអឺរ៉ុបឲ្យបន្ដការស៊ើបអង្កេតថែមទៀតចំពោះការអនុវត្តរបស់កម្ពុជា ជុំវិញកាតព្វកិច្ចសិទ្ធិមនុស្សរបស់ខ្លួន និងប្រព័ន្ធអនុគ្រោះពន្ធក្រោមកិច្ចព្រមព្រៀង «អ្វីគ្រប់យ៉ាងលើកលែងតែអាវុធ»៕