សាលាដំបូងរាជធានីភ្នំពេញបានចេញដីកាបង្គាប់ឲ្យ លោក សម រង្ស៊ី ដែលកំពុងនិរទេសខ្លួននៅក្រៅប្រទេសឲ្យចូលបំភ្លឺ ពាក់ព័ន្ធការចោទថា បានប្រមាថព្រះមហាក្សត្រ។
តាមដីកាបង្គាប់ឲ្យចូលខ្លួនដែលចេញដោយចៅក្រមស៊ើបសួរ លោក ហម ម៉េងសែ ចុះផ្សាយកាលពីថ្ងៃ១៦ ខែសីហា បង្គាប់ឲ្យលោក សម រង្ស៊ី ចូលខ្លួនបំភ្លឺនៅតុលាការ នាថ្ងៃទី១៣ ខែកញ្ញា វេលាម៉ោង៩ព្រឹក ដើម្បីឲ្យចៅក្រមស៊ើបសួរជុំវិញសំណុំរឿងប្រមាថព្រះមហាក្សត្រ ដែលប្រព្រឹត្តនៅភ្នំពេញ និងកន្លែងផ្សេងទៀត កាលពី ខែមិថុនា ឆ្នាំ២០១៨។
លើសពីនេះទៀត ចៅក្រមស៊ើបសួររូបនោះបញ្ជាក់ថា បើលោក សម រង្ស៊ី មិនចូលបំភ្លឺតាមដីកាបង្គាប់ឲ្យចូលខ្លួនទេ លោកនឹងចេញដីកានាំខ្លួនលោក សម រង្ស៊ី ឲ្យចូលបំភ្លឺជុំវិញការប្រមាថព្រះមហាក្សត្រ៕
