ប្រជាពលរដ្ឋរស់នៅស្រុកមង្គលបូរី ខេត្តបន្ទាយមានជ័យ ជំរុញទៅអាជ្ញាធរឲ្យជួយអន្តរាគមន៍ទៅក្រុមហ៊ុនផ្គត់ផ្គង់ទឹកស្អាតតភ្ជាប់បណ្ដាញទឹកឲ្យពួកគេប្រើប្រាស់វិញ ដោយមិនត្រូវចំណាយប្រាក់បន្ថែម ដោយថា ប្រព័ន្ធទឹកស្អាតរបស់ពួកគេកន្លងមក ត្រូវបានកាត់ផ្ដាច់បន្ទាប់ពីអាជ្ញាធរធ្វើផ្លូវជាតិលេខ៥។
តំណាងប្រជាពលរដ្ឋភូមិវត្តថ្មី លោក ហ៊ុន រ៉ូ ប្រាប់វីអូឌីនៅថ្ងៃនេះថា ពួកគាត់នៅភូមិចំនួន៤ នៃឃុំភ្នំតូច មិនមានទឹកស្អាតប្រើប្រាស់ជាង ១ខែមកហើយ ដោយក្រុមហ៊ុនកាត់ផ្ដាច់ប្រព័ន្ធទឹកស្អាតចាប់តាំងពីអាជ្ញាធរធ្វើផ្លូវជាតិ៥។ អ្នកភូមិរូបនេះ បានប្រាប់ថា ក្រុមហ៊ុនមិនទាន់តភ្ជាប់បណ្ដាញទឹកស្អាត ឲ្យពួកគាត់ប្រើប្រាស់វិញនោះទេ។
លោកបន្តថា ក្រុមហ៊ុនបានទាមទារឲ្យពួកគាត់បង់ប្រាក់ចំនួន ៦០ ០០០រៀល (ប្រាំមួយម៉ឺនរៀល) ក្នុងមួយគ្រួសារ ដោយថា ប្រសិនបើពួកគាត់ចង់ប្រើប្រាស់ប្រព័ន្ធទឹកស្អាតវិញ។
លោកបន្តថា កន្លងមក ពួកគាត់បាននាំគ្នាទៅរកកិច្ចអន្តរាគមន៍ពីអាជ្ញាធរឃុំ និងស្រុកឲ្យជួយដោះស្រាយ ប៉ុន្តែ រហូតមកដល់បច្ចុប្បន្ននេះ មិនទទួលបានលទ្ធផលអ្វីនោះឡើយ។
តំណាងប្រជាពលរដ្ឋភូមិវត្តថ្មី លោក ហ៊ុន រ៉ូ
ប្រជាពលរដ្ឋម្នាក់ទៀត លោក លឹម ប៊ុនលី មានប្រសាសន៍ថា ភាគីខាងក្រុមហ៊ុនទឹកស្អាតបានចុះទៅប្រាប់ពួកគាត់ថា ទោះបីជាមានការធ្វើផ្លូវ ពួកគាត់នៅតែមានទឹកប្រើប្រាស់ដដែល ប៉ុន្តែ ផ្ទុយទៅវិញ ក្រុមហ៊ុននេះ តម្រូវឲ្យអ្នកភូមិបង់ប្រាក់ជាថ្មីដើម្បីតបណ្ដាញទឹកឡើងវិញ។
ប្រជាពលរដ្ឋម្នាក់ទៀត លោក លឹម ប៊ុនលី
ជំទប់ទី២នៃឃុំភ្នំតូច លោក យូរ ហៃ បានច្រានចោលការចោទប្រកាន់ពីក្រុមប្រជាពលរដ្ឋ ដោយលោកថា កន្លងមក អាជ្ញាធរតែងតែជួយប្រជាពលរដ្ឋចំពោះរឿងនេះ ប៉ុន្តែ ភាគីក្រុមហ៊ុនមិនព្រម។ លោកបន្តថា បច្ចុប្បន្ននេះ អាជ្ញាធរកំពុងពិភាក្សាដើម្បីដោះស្រាយ ដោយស្នើទៅភាគីខាងផ្គត់ផ្គង់ទឹកស្អាតនោះ ចុះតម្លៃមកត្រឹម ៣០០០០រៀលវិញ។
ជំទប់ទី២នៃឃុំភ្នំតូច លោក យូរ ហៃ
ពាក់ព័ន្ធរឿងនេះ ប្រធានទឹកស្អាតប្រចាំតំបន់ លោក ទុំ បូផល ប្រសាសន៍ថា ក្រុមហ៊ុនទាមទារឲ្យប្រជាពលរដ្ឋបង់ប្រាក់មួយគ្រួសារ ៦០ ០០០រៀល ក្រុមហ៊ុនបានទិញសម្ភារៈដើម្បីជួសជុលដាក់ទុយោជាថ្មីអស់ច្រើន ប៉ុន្តែ រដ្ឋាភិបាលមិនបានជួយផ្ដល់សំណងខូចខាតដល់ក្រុមហ៊ុនខ្លះទេ ទោះបីជាមានការស្នើសុំពីភាគីក្រុមហ៊ុនក៏ដោយ។
ប្រធានទឹកស្អាតប្រចាំតំបន់ លោក ទុំ បូផល
អ្នកនាំពាក្យក្រសួងសាធារណការ និងដឹកជញ្ជូន លោក វ៉ាស៊ឹម សុរិយា សុំមិនធ្វើអត្ថាធិប្បាយចំពោះរឿងនេះទេ ដោយ ករណីស្ថិតនៅក្រោមក្រសួងសេដ្ឋកិច្ច។
ប៉ុន្តែ នាយខុទ្ទកាល័យ និងជាអ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក នុប សុធនវិចិត្រ បដិសេធបកស្រាយជុំវិញបញ្ហានេះផងដែរ ដោយថា លោកមិនបានដឹងរឿងនេះច្បាស់ទេ។
បើតាមតំណាងប្រជាពលរដ្ឋ អះអាងថា ប្រជាពលរដ្ឋដែលមិនទាន់មានទឹកស្អាតប្រើប្រាស់មានចំនួន ៤ភូមិ ក្នុងនោះមាន ភូមិភ្នំតូចត្បូង ភូមិភ្នំតូចជើង ភូមិវត្តថ្មី និងភូមិថ្នល់បត់ នៃឃុំភ្នំតូច ស្រុកមង្គលបូរីខេត្តបន្ទាយមានជ័យ៕