អតីតប្រធានគណបក្សអំណាចខ្មែរ លោកសួន សេរីរដ្ឋា ត្រូវបានដោះលែងឲ្យមានសេរីភាពវិញហើយ។
យោងតាមដីការបង្គាប់ឲ្យដោះលែងដែលចុះហត្ថលេខាដោយលោក រៀល សុភិន ព្រះរាជាអាជ្ញារងសាលាដំបូងរាជធានីភ្នំពេញ លោក សួន សេរីរដ្ឋា ត្រូវបានព្រះមហាក្សត្រចេញព្រះរាជក្រឹតលើកលែងទោសនិងត្រូវដោះលែងឲ្យមានសេរីភាពវិញហើយនៅយប់នេះ។
លោក សួន សេរីរដ្ឋា ពេលនេះ បានចាកចេញពីពន្ធនាគារត្រលប់ទៅលំនៅដ្ឋានរបស់លោកហើយ។
លោក សួន សេរីរដ្ឋា ត្រូវបានកម្លាំងសមត្ថកិច្ចចាប់ខ្លួនកាលពីថ្ងៃទ១៣ខែសីហាឆ្នាំមុន ក្រោយពេលដែលលោកបានបង្ហោះសារមួយនៅទំព័រហ្វេសប៊ុករបស់លោកដែលមានលក្ខណៈវាយប្រហារដល់កងទ័ព។
លោកត្រូវបានតុលាការកម្ពុជាសម្រេចផ្តន្ទាទោសដាក់ពន្ធនាគាររយៈពេល៥ឆ្នាំ និងពិន័យជាប្រាក់១០លានរៀល ពីបទញុះញង់កុំឲ្យយោធិនស្ដាប់បង្គាប់ ធ្វើឲ្យខូចទឹកចិត្តកងទ័ព និងបទញុះញង់ឲ្យប្រព្រឹត្តបទឧក្រិដ្ឋជាអាទិ៍។
ការដោះលែងលោក សួន សេរីរដ្ឋា នេះ ធ្វើឡើងស្របពេលដែលលោកនាយករដ្ឋមន្រ្តីហ៊ុន សែនបានបង្ហើបពីលទ្ធភាពលើកលែងទោសដល់សកម្មជននយោបាយនៅពេលលោកជួបជាមួយក្រុមកម្មករនៅខេត្តកណ្តាលកាលពីព្រឹកមិញនេះ។
ក្នុងរយៈពេលមួយសប្ដាហ៍ចុងក្រោយនេះ អ្នកវិភាគបញ្ហាសង្គម សកម្មជនដីធ្លី អ្នកសារព័ត៌មាន និង អ្នកនយោបាយ ត្រូវបានដោះលែងឲ្យមានសេរីភាពវិញជាបន្តបន្ទាប់៕