អតីតថ្នាក់ដឹកនាំជាន់ខ្ពស់គណបក្សហ៊្វុនស៊ិនប៉ិចចំនួន ៤រូប បានស្នើទៅមេដឹកនាំរបស់ពួកគេ ឲ្យបំភ្លឺជុំវិញការបញ្ចប់តួនាទី ខណៈដែលពួកគេអះអាងថា មិនបានធ្វើខុសលក្ខខន្តិកៈបក្ស ឬខុសច្បាប់នោះទេ។
មន្ដ្រីជាន់ខ្ពស់ចំនួន ៤រូបរបស់គណបក្សរាជានិយមហ៊្វុនស៊ិនប៉ិច រួមមាន លោក យូ ហុកគ្រី លោក ប៉ោ ប៊ុនស៊្រឺ និងលោក ញ៉េប ប៊ុនជិន សុទ្ធតែកាន់តំណែងជាអនុប្រធានគណបក្ស និងលោក វ៉ាន់ សុផាន់ណា ជាអគ្គលេខាធិការបក្ស ត្រូវបានបញ្ចប់ពីតួនាទីកាលពីថ្ងៃទី១៨ ខែសីហាកន្លងមកថ្មីៗនេះ។
ក្នុងសន្និសីទសារព័ត៌មាននាព្រឹកថ្ងៃនេះ អតីតអនុប្រធានគណបក្សហ៊្វុនស៊ិនប៉ិច លោក យូ ហុកគ្រី បានថ្លែងថា ការបញ្ចប់ពួកគេពីតួនាទីនេះ ជារឿងអយុត្តិធម៌ ដោយថា មិនបានបញ្ជាក់ពីមូលហេតុច្បាស់លាស់។ ករណីនេះ លោកបានស្នើទៅមេដឹកនាំបក្សទាំងសម្ដេចក្រុមព្រះ នរោត្ដម រណឫទ្ធិ និងព្រះអង្គម្ចាស់ នរោត្ដម ចក្រាវុឌ្ឍ ឲ្យបំភ្លឺជុំវិញការបញ្ចប់តួនាទីពួកគេ។
អតីតអនុប្រធានគណបក្សហ៊្វុនស៊ិនប៉ិច លោក យូ ហុកគ្រី
ទោះជាបែបនេះក្តី មន្ត្រីទាំង ៤រូបដែលអះអាងថា ធ្វើការនៅគណបក្សហ៊្វុនស៊ិនប៉ិចប្រហែលជា ៣០ឆ្នាំមកហើយនោះ បានបញ្ជាក់ថា ប្រហែលជាមិនចូលធ្វើនយោបាយជាមួយគណបក្សនេះបន្តទៀតទេ ដោយសារមានវ័យចំណាស់ និងខ្លះទៀតដល់ពេលចូលនិវត្តន៍ជាដើម។
អ្នកនាំពាក្យគណបក្សហ៊្វុនស៊ិនប៉ិច លោក ណុប សុធារិទ្ធិ បានប្រាប់វីអូឌីថា ដើមចមដែលព្រះអង្គម្ចាស់ នរោត្តម ចក្រាវុឌ្ឍ បញ្ចប់តំណែងមន្ត្រី ៤រូបរបស់បក្ស ដោយសារពួកគេធ្វើខុសនឹងវិន័យបក្ស។
អ្នកនាំពាក្យគណបក្សហ៊្វុនស៊ិនប៉ិច លោក ណុប សុធារិទ្ធិ
ប្រធានក្រុមអ្នកវិភាគវ័យក្មេង លោក ហង្ស វិទូ សង្កេតឃើញថា ចាប់ពីសម្តេចក្រុមព្រះបង្កើតគណបក្សហ៊្វុនស៊ិនប៉ិច គឺបក្សនេះមានចំណុចខ្សោយមួយចំនួនដូចជា ពុករលួយ និងដណ្តើមអំណាចគ្នាក្នុងបក្ស។ លោកវិភាគថា បើនៅតែបែកបាក់ផ្ទៃក្នុង នឹងធ្វើឲ្យបក្សនេះ បាត់ឈ្មោះពីឆាកនយោបាយ។
ប្រធានក្រុមអ្នកវិភាគវ័យក្មេង លោក ហង្ស វិទូ
គណបក្សហ៊្វុនស៊ិនប៉ិច បានផ្លាស់ប្តូរក្បាលម៉ាស៊ីនដឹកនាំជាបន្តបន្ទាប់ ក្រោយពីសម្តេចក្រុមព្រះ នរោត្តម រណឫទ្ធិ បានតែងតែងព្រះរាជបុត្ររបស់ព្រះអង្គ គឺព្រះអង្គម្ចាស់ នរោត្តម ចក្រាវុឌ្ឍ ធ្វើជាប្រធានស្តីទីគណបក្ស។
ការផ្លាស់ប្ដូរក្បាលម៉ាស៊ីនដឹកនាំគណបក្សរាជានិយមមួយនេះ បានកើតឡើងក្រោយពីសម្ដេចក្រុមព្រះ នរោត្ដម រណឫទ្ធិ បានជួបគ្រោះថ្នាក់ចរាចរណ៍នៅមុនការបោះឆ្នោតសភាអណត្តិទី៦ ដែលនាំទៅរកការចោទសួរអំពីស្ថានភាពសុខភាពរបស់ទ្រង់។
គណបក្សហ៊្វុនស៊ិនប៉ិច ស្ថិតនៅក្នុងចំណោមគណបក្សនយោបាយ ១៨ផ្សេងទៀត ដែលបានចូលរួមប្រកួតប្រជែងនៅក្នុងការបោះឆ្នោតជ្រើសរើសតំណាងរាស្ត្រអាណត្តិទី៦ ប៉ុន្តែ គណបក្សនេះ ក៏ដូចជាគណបក្ស ១៨ផ្សេងទៀត ពុំបានឈ្នះអាសនៈសូម្បីតែមួយ៕