លោកនាយករដ្ឋមន្ត្រី ហ៊ុន សែន បានបង្ហើបពីលទ្ធភាពលើកលែងទោសដល់សកម្មជននយោបាយចំនួន ១២នាក់ ប៉ុន្តែ លោកក៏ព្រមានចាប់អ្នកទើបនឹងត្រូវដោះលែងបញ្ចូលគុកវិញ បើពួកគេបានប្រព្រឹត្តកំហុស ខណៈក្រុមប្រទេសលោកសេរីកំពុងដាក់សម្ពាធឲ្យស្តារប្រជាធិបតេយ្យឡើងវិញ។
ក្នុងពិធីសំណេះសំណាលជាមួយក្រុមកម្មករនៅខេត្តកណ្តាលនាថ្ងៃព្រហស្បតិ៍នេះ លោក ហ៊ុន សែន បានបង្ហើបថា រដ្ឋមន្ត្រីក្រសួងយុត្តិធម៌កំពុងពិនិត្យលទ្ធភាពលើកលែងទោសដល់សកម្មជននយោបាយចំនួន ១២នាក់ ដែលថា អាចនឹងត្រូវធ្វើឡើងក្នុងពិធីបុណ្យជាតិខាងមុខ។ ប៉ុន្តែ មេដឹកនាំរូបនេះបានប្រតិកម្មទៅនឹងអ្នកដែលអំពាវនាវឲ្យសហគមន៍អន្តរជាតិដាក់សម្ពាធដល់រដ្ឋាភិបាល ។
លោកនាយករដ្ឋមន្ត្រី ហ៊ុន សែន
បើតាមនាយករដ្ឋមន្ត្រី ការបន្ធូបន្ថយ និងលើកលែងទោសដល់ទណ្ឌិត នឹងត្រូវធ្វើឡើង ៤ដងក្នុងឆ្នាំនេះ ដូចជាពីធីបុណ្យភ្ជុំបិណ្ឌ បុណ្យអុំទូក បុណ្យឯករាជ្យជាតិ និងបុណ្យបញ្ចប់សង្គ្រាមតាមនយោបាយឈ្នះៗរបស់លោក ដែលនឹងត្រូវរៀបចំឡើងនៅនៅចុងឆ្នាំនេះ។
អតីតមេដឹកនាំបក្សប្រឆាំង លោក សម រង្ស៊ី ដែលកំពុងនិរទេសខ្លួនឯងនៅឯក្រៅប្រទេស បានអំពាវនាវម្តងហើយម្តងទៀត ឲ្យសហគមន៍អន្តរជាតិជួយសង្គ្រោះលទ្ធិប្រជាធិបតេយ្យនៅកម្ពុជាឡើងវិញ តាមរយៈការដាក់សម្ពាធទៅរដ្ឋាភិបាលដែលដឹកនាំដោយលោក ហ៊ុន សែន។
អតីតតំណាងរាស្ត្រគណបក្សសង្គ្រោះជាតិ លោក អ៊ូ ច័ន្ទរ័ត្ន បានស្វាគមន៍ទៅនឹងការពិចារណាលើកលែងទោសដល់សកម្មជននយោបាយនេះ ប៉ុន្តែ លោកថា បើរដ្ឋាភិបាលមានចេតនាពិតប្រាកដចង់ផ្សះផ្សាជាតិឡើងវិញ មិនគួរយកការរិះគន់មកធ្វើជាឧបករណ៍រារាំងនោះទេ។
អតីតតំណាងរាស្ត្រគណបក្សសង្គ្រោះជាតិ លោក អ៊ូ ច័ន្ទរ័ត្ន
បើតាមលោក អ៊ូ ច័ន្ទរ័ត្ន មេដឹកនាំ និងសកម្មជនបក្សប្រឆាំង ដែលកំពុងឃុំខ្លួននៅពន្ធនាគារមាន ១៦រូប ក្នុងនោះ ១៥រូប ឃុំនៅពន្ធនាគារព្រៃស រាជធានីភ្នំពេញ និងប្រធានគណបក្ស លោក កឹម សុខា ឃុំនៅពន្ធនាគារត្រពាំងផ្លុង ខេត្តត្បូងឃ្មុំ។
ក្នុងពិធីនោះដែរ លោក ហ៊ុន សែន ក៏បានព្រមានផងដែរថា អ្នកដែលទើបចេញពីគុក អាចនឹងត្រូវចាប់ដាក់ពន្ធនាគារវិញ ប្រសិនបើពួកគេនិយាយប៉ះពាល់ដល់សិទ្ធិអ្នកដទៃ។
លោកនាយករដ្ឋមន្ត្រី ហ៊ុន សែន
ទោះបីលោក ហ៊ុន សែន មិនបញ្ចេញឈ្មោះ ប៉ុន្តែ ទំនងសំដៅដល់អ្នកតាមដាន និងវិភាគបញ្ហាសង្គម លោក គឹម សុខ ដែលទើបចេញពីពន្ធនាគារព្រៃស ហើយបានបន្តវិភាគពីបញ្ហាសង្គម។
លោក គឹម សុខ អះអាងថា អ្វីដែលលោកបានវិភាគ ក្នុងបំណងឆ្លុះបញ្ចាំងការពិតក្នុងសង្គម ជំរុញឲ្យមាននីតិរដ្ឋ ក្នុងសង្គមប្រជាធិបតេយ្យ គ្មានបំណងចង់បំបាក់មុខរដ្ឋាភិបាលឡើយ។
អ្នកតាមដាន និងវិភាគបញ្ហាសង្គម លោក គឹម សុខ
ទោះជាយ៉ាងណា របត់នយោបាយនៅកម្ពុជា រួមទាំងដំណើរការបោះឆ្នោតដែលដំណើរការទៅទាំងចម្រូងចម្រាសនោះ ជំរុញឲ្យក្រុមប្រទេសលោកសេរីប្រកាសមិនទទួលស្គាល់ និងព្រមានផ្តាច់ប្រព័ន្ធអនុគ្រោះពន្ធពីកម្ពុជា និងទំនាក់ទំនងផ្នែកពាណិជ្ជកម្មផ្សេងទៀត បើគ្មានដំណោះស្រាយនយោបាយ ឈានស្តារប្រជាធិបតេយ្យឡើងវិញនោះ៕