តុលាការសាលាដំបូងរាជធានីភ្នំពេញ នៅថ្ងៃនេះ បានសម្រេចផ្តន្ទាទោសស្រ្តីជាសកម្មជនដីធ្លីចំនួន៦នាក់ ឲ្យជាប់ពន្ធនាគាររយៈពេល៦ខែ ប៉ុន្តែពួកគេមិនត្រូវបានឃុំខ្លួននោះទេ ដោយត្រូវព្យួរទោសទាំងអស់គ្នា។
សាលាដំបូងរាជធានីភ្នំពេញ នៅថ្ងៃនេះ បានបើកសវនាការលើកសំណុំរឿងសកម្មជនដីធ្លីចំនួន៦ ទាក់ទិនបទចោទប្រកាន់«ជេរប្រមាថ និងគំរាមថានឹងសម្លាប់» ដែលប្ដឹងដោយអតីតស្ត្រីបឹងកក់ម្នាក់ឈ្មោះ លី មុំ កាលពីថ្ងៃទី២០ ខែមីនា ឆ្នាំ២០១២ ។
ក្រោយពេលបើកសវនាការជាង ២ ម៉ោង ចៅក្រមជំនុំជម្រះនៃសាលាដំបូងរាជធានីភ្នំពេញ បានសម្រេចលុបចោលបទចោទប្រកាន់មួយពីបទជេរប្រមាថជាសាធារណៈ ។ ទោះជាយ៉ាងណា ពួកគេទាំង ៦ នាក់ ត្រូវចៅក្រមកាត់ទោសឲ្យជាប់ពន្ធនាគាររយៈពេល៦ខែពីបទ «គំរាមថានឹងសម្លាប់» ប៉ុន្តែទោសនេះ ត្រូវបានព្យួរមិនអនុវត្តនៅក្នុងពន្ធនាគារឡើយ។
ថ្លែងប្រាប់អ្នកសារព័ត៌មាននៅមុខតុលាការសាលាដំបូងរាជធានីភ្នំពេញ អ្នកស្រី ទេព វន្នី លើកឡើងថា អ្នកស្រីនិងសកម្មជនដីធ្លីផ្សេងទៀតនឹងប្ដឹងជំទាស់ចំពោះសេចក្ដីសម្រេចរបស់ចៅក្រមសាលាដំបូងនេះ ទៅសាលាឧទ្ធរណ៍បន្តទៀត។ អ្នកស្រីបន្តថា ការសម្រេចនេះ មិនបានផ្ដល់យុត្តិធម៌ឲ្យពួកគាត់គេ ព្រោះពួកគាត់មិនបានប្រព្រឹត្តបទល្មើសដូចការចោទប្រកាន់របស់អ្នកស្រី លី មុំនោះទេ។
សកម្មជនដីធ្លី អ្នកស្រី ទេព វន្នី
គួររំលឹកថា អ្នកស្រី ទេព វន្នី ត្រូវបានព្រះមហាក្សលើកលែងទោសកាលពីថ្ងៃទី ២០ ខែ សីហា បន្ទាប់ពីអ្នកស្រីជាប់ពន្ធនាគារអស់រយៈពេល ២ឆ្នាំ កន្លងមក។
ប្រធានផ្នែកស៊ើបអង្កេតអង្គការលីកាដូ លោក អំ សំអាត ដែលបានចូលរួមស្ដាប់សវនាការ នៅថ្ងៃនេះ លើកឡើងថា ទោះបីជាតុលាការសម្រេចមិនឃុំខ្លួនសកម្មជនដីធ្លីទាំង៦ នាក់នៅក្នុងពន្ធនាគារក៏ដោយ ប៉ុន្តែលោកថា ការសម្រេចបែបនេះ ក៏ជាការដាក់សម្ពាធដល់ពួកគេដែរ។
ប្រធានផ្នែកស៊ើបអង្កេតអង្គការលីកាដូ លោក អំ សំអាត
សកម្មជនដីធ្លីនៅតំបន់បឹងកក់ទាំង៦នាក់ដែលត្រូវតុលាការផ្តន្ទាទោសនៅថ្ងៃនេះរួមមាន ឈ្មោះ ទេព វន្នី ដែលទើបតែចេញពីពន្ធនាគារកាលពីយប់ថ្ងៃចន្ទ, អ្នកស្រី ហេង មុំ, ង៉ែត ឃុន, ឆេង លាភ, គង់ ចន្ថា, និង តុល ស្រីពៅ៕
