គ្រឹះស្ថានមីក្រូហិរញ្ញវត្ថុមួយចំនួន អំពាវនាវទៅអាជ្ញាធរពាក់ព័ន្ធជួយផ្សព្វផ្សាយពីវិធានការណ៍ការពារនានាឲ្យបានទូលំទូលាយ ក៏ដូចជាជួយការពារសុវត្ថិភាពគ្រឹះស្ថានរបស់ខ្លួនផងដែរ។
ការអំពាវនាវនេះធ្វើឡើងបន្ទាប់ពីមានចោរមួយក្រុម បានចូលប្លន់លុយ១០ម៉ឺនដុល្លារ ពីធនាគារឯកជនមួយឈ្មោះ ធនាគារ អ អេច ប៊ី ឥណ្ដូឆៃណា ដែលស្ថិតនៅតាមបណ្ដោយផ្លូវ ម៉ៅសេទុង ខណ្ឌចំការមន រាជធានីភ្នំពេញ កាលពីថ្ងៃម្សិលមិញ។
អនុប្រធានទទួលបន្ទុកផ្នែកនីតិកម្មនៅធនាគារអេស៊ីលីដា លោកស្រី ប៊ុត ប៊ុនសីហា មានប្រសាសន៍ថា ធនាគារអេស៊ីលីដាកន្លងមកបានស្នើទៅក្រសួងមហាផ្ទៃដាក់ម្លាំងប្រដាប់អាវុធ និងកងសន្តិសុខប្រមាណជាង២ពាន់នាក់នៅទូទាំងប្រទេស ដើម្បីដាក់ពង្រាយនៅតាមស្នាក់ការកណ្តាល និងសាខាទាំងអស់ ឲ្យជួយការពារសុវត្ថិភាពអតិថិជន និងស្ថាប័នរួចហើយ។
ទោះជាបែបនេះក្តី លោកស្រី ប៊ុនសីហា អំពាវនាវទៅសមត្ថកិច្ចពាក់ព័ន្ធជួយផ្សព្វផ្សាយឲ្យបានទូលំទូលាយពីមធ្យោបាយបង្ការនានា។
អនុប្រធានទទួលបន្ទុកផ្នែកនីតិកម្មនៅធនាគារអេស៊ីលីដា លោកស្រី ប៊ុត ប៊ុនសីហា
នាយកប្រតិបត្តិសមាគមមីក្រូហិរញ្ញវត្ថុកម្ពុជា លោក យុន សុវណ្ណា មានប្រសាសន៍ថា ករណីក្រុមចោប្លន់ធនាគារកាលពីម្សិលមិញនេះជារឿងចំឡែកមួយ។ លោកថានឹងយកទៅធ្វើការពិភាក្សាជាមួយធនាគារជាតិ រួមជាមួយស្ថាប័នពាក់ព័ន្ធផ្សេងទៀតរបស់រដ្ឋាភិបាល ដើម្បីឲ្យជួយការពារសុវត្ថិភាពមីក្រូហិរញ្ញវត្ថុឯកជននៅថ្ងៃខាងមុខ និងដោះស្រាយបានទាន់ពេលវេលា។
នាយកប្រតិបត្តិសមាគមមីក្រូហិរញ្ញវត្ថុកម្ពុជា លោក យុន សុវណ្ណា
អ្នកនាំពាក្យក្រសួងមហាផ្ទៃលោក ខៀវ សុភ័គ មានប្រសាសន៍ថា មីក្រូហិរញ្ញវត្ថុឯកជនទាំងអស់ ត្រូវចេះរកវិធីការពារទ្រព្យសម្បត្តិរបស់ខ្លួន និងរបស់អតិថិជនដែលបានផ្ញើ ដោយថាមិនចាំបាច់មានការណែនាំពីស្ថាប័នពាក់ព័ន្ធរបស់រដ្ឋនោះទេ។
អ្នកនាំពាក្យក្រសួងមហាផ្ទៃលោក ខៀវ សុភ័គ
យ៉ាងណាក៏ដោយ ក្រោយពីមានករណីក្រុមចោរចូលប្លន់ធនាគារ ឥណ្ដូឆៃណា អភិបាលរាជធានីភ្នំពេញ លោក ឃួង ស្រេង បានបើកកិច្ចប្រជុំបន្ទាន់ជាមួយលោក ជួន សុវណ្ណ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ មេបញ្ជាការរងកងរាជអាវុធហត្ថរាជធានី និងអភិបាលខណ្ឌទាំង១២ផងដែរ ដើម្បីបានប្រាប់ទៅសមត្ថកិច្ចទាំងអស់មិនត្រូវបន្ទោសគ្នាទៅវិញមក ឬដាក់បន្ទុកលើកស្ថាប័នណាមួយនោះទេ ដោយថា ត្រូវរួមសហការគ្នា ការពារសន្តិសុខសុវត្ថិភាពជូនប្រជាពលរដ្ឋ អាជីវករ ដែលប្រកបអាជីវកម្ម ក្នុងរាជធានីភ្នំពេញ ។
គេហទំព័រអគ្គស្នងការនគរបាលជាតិ ចុះផ្សាយឲ្យដឹងថាកាលពីម្សិលមិញក្រុមចោរមានគ្នា ៥នាក់ ប្រដាប់ដោយកាំភ្លើងខ្លី បានដើរចូលទៅក្នុងធនាគារឥណ្ដូឆៃណា និងបានប្លន់យកប្រាក់អស់ ១០ម៉ឺនដុល្លារអាមេរិក ហើយបានរត់គេចខ្លួនបាត់ ប៉ុន្ដែ ករណីនេះ អាជ្ញាធរអះអាងថា មិនបានបង្ករបួសស្នាមដល់បុគ្គលិកធនាគារនោះទេ៕
