អតីតមេដឹកនាំបក្សប្រឆាំងលោក សម រង្ស៊ី លើកឡើងថាមូលហេតុដែលលោក ហ៊ុន សែន និយាយពីគម្រោងនៃការដោះលែងអតីតសកម្មជនបក្សសង្រ្គោះជាតិ ព្រោះលោកនាយករដ្ឋមន្រ្តីបារម្ភពីការដាក់ទណ្ឌកម្ម និងការដកភាពស្របច្បាប់របស់រដ្ឋាភិបាលពីសហគមន៍អន្តរជាតិ។
ប៉ុន្តែលោកនាយករដ្ឋមន្ត្រី ហ៊ុន សែន កាលពីម្សិលមិញ បានថ្លែងនៅខេត្តកណ្តាលថា គម្រោងលើកលែងទោសសកម្មជននយោបាយរបស់បក្សប្រឆាំង១២នាក់ ជាសន្តានចិត្តរបស់លោក ក្នុងនាមជាមេដឹកនាំ។
លោកនាយករដ្ឋមន្ត្រី ហ៊ុន សែន
យ៉ាងនេះក្តីលោក សម រង្ស៊ី នៅថ្ងៃនេះ បានសរសេរលើហ្វេសប៊ុក របស់លោកថា ការដែលលោក ហ៊ុន សែន បង្ខំចិត្តដោះលែងអ្នកទោសនយោបាយក្នុងពេលឆាប់ៗខាងមុខនេះ ដោយសារតែសម្ពាធពីសហគមន៍អន្តរជាតិ ។
អ្នកតាមដានបញ្ហានយោបាយ លោក ឯម សុវណ្ណារ៉ា ហៅការលើកឡើងរបស់លោកសម រង្ស៊ី ថាបានប៉ះពាល់ខ្លះដល់ឱកាសលើកលែងទោសរបស់កម្មជនបក្សប្រឆាំងដែលកំពុងជាប់ឃុំ។
ប៉ុន្តែអ្នកវិភាគរូបនេះ យល់ថាបក្សកាន់អំណាចក៏ចង់សម្រួលស្ថានការណ៍នយោបាយដែរក្រោយពីជួបតំណាងប្រទេសលោកសេរីមួយចំនួនរួចមកនោះ។
អ្នកតាមដានបញ្ហានយោបាយ លោក ឯម សុវណ្ណារ៉ា
ក្រោយបោះឆ្នោតក្រុមប្រទេសលោកសេរី មានសហរដ្ឋអាមេរិក សភាពអឺរ៉ុប និងជប៉ុនជាដើម ប្រកាសមិនទទួលស្គាល់និងជំរុញឲ្យមានការចរចានយោបាយឡើងវិញ ដើម្បីធានាពីដំណើរការប្រជាធិបតេយ្យនៅកម្ពុជា។
អ្នកតាមបញ្ហានយោបាយមួយនិងអង្គការអន្តរជាតិមួយចំនួនថា ការដោះលែងកម្មជននយោបាយតែមួយផ្នែក មិនមានលក្ខណៈសម្បត្តិគ្រប់គ្រាន់ អាចទាក់ទាញសហគមន៍អន្តរជាតិ ឲ្យទទួលស្គាល់រដ្ឋាភិបាលថ្មី កើតចេញពីការបោះឆ្នោតដ៏ចម្រូងចម្រាសបានទេ ដរាបណាគណបក្សប្រឆាំងដ៏ធំ នៅតែត្រូវបានគេផាត់ចេញពីឆាកនយោបាយនោះ៕