អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន បន្ទាប់ចេញពីពន្ធនាគារនៅរសៀលនេះ លោកអំពាវនាវឲ្យមានការដោះលែងសកម្មជនគណបក្សសង្គ្រោះជាតិចំនួន១៤នាក់ផ្សេងទៀតនៅពន្ធនាគារព្រៃស។
ព្រះមហាក្សត្របានត្រាស់បង្គ្រាប់ឲ្យលើកលែងទោសដល់ លោក អ៊ុំ សំអាន នៅថ្ងៃនេះ ហើយបន្ទាប់ពីការត្រួតពិនិត្យលើនីតិវិធី លោកអ៊ុំ សំអានត្រូវបានដោះលែងម៉ោងជិត៤រសៀល។
រាល់សំនួរជាច្រើនរបស់អ្នកសារព័ត៌មានទាក់ទងស្ថានភាពនយោបាយ លោក អ៊ុំ សំអាន មិនអត្ថាធិប្បាយទេ លោកគ្រាន់តែអំពាវនាវឲ្យមានការដោះលែង សកម្មជនគណបក្សសង្គ្រោះជាតិចំនួន១៤នាក់កំពុងជាប់ពន្ធនាគារព្រៃ ស និង អ្នកទោសមនសិការផ្សេងៗទៀត។
លោក អ៊ុំ សំអាន បញ្ជាក់ថា មានតែការដោះលែងអ្នកទោសមនសិការទាំងអស់ និងបន្តធ្វើការងារដើម្បីដោះស្រាយបញ្ហាធំៗរបស់ជាតិរួមទាំងបញ្ហាព្រំដែនផង ទើបជាជម្រើសល្អសម្រាប់កម្ពុជា។
