រដ្ឋមន្ត្រីការបរទេសឥណ្ឌា លោកស្រី ស៊ុសម៉ា ស្វារ៉ាច គ្រោងមកបំពេញទស្សនកិច្ចរយៈពេល ៣ថ្ងៃ នៅកម្ពុជា និងចុះហត្ថលេខាលើឯកសារសំខាន់ៗចំនួន៣ ផងដែរ។
សេចក្ដីប្រកាសព័ត៌មានរបស់ក្រសួងការបរទេសកម្ពុជា ឲ្យដឹងថា លោកស្រី ស៊ុសម៉ា ស្វារ៉ាច នឹងមកបំពេញទស្សនកិច្ចនៅកម្ពុជា ចាប់ពីថ្ងៃទី២៨ ដល់ថ្ងៃទី៣០ សីហា និងគ្រោងជួបជាមួយប្រធានព្រឹទ្ធសភា លោក សាយ ឈុំ រដ្ឋមន្ត្រីការបរទេស លោក ប្រាក់ សុខុន និងលោកនាយករដ្ឋមន្ត្រី លោក ហ៊ុន សែន ផងដែរ។
បើតាមសេចក្ដីប្រកាសព័ត៌មាន រដ្ឋមន្ត្រីការបរទេសឥណ្ឌារូបនេះនឹងចុះហត្ថលេខាលើឯកសារចំនួន៣ ជាមួយកម្ពុជា រួមមាន កិច្ចព្រមព្រៀងសម្រាប់ការអភិរក្សជួសជុលប្រាសាទព្រះវិហារ អនុស្សរណៈស្ដីពីកិច្ចសហប្រតិបត្តិការលើវិស័យសុខភាព និងឱសថ និងអនុស្សរណៈនៃការយោគយល់គ្នារវាងវិទ្យាស្ថានជាតិការទូត និងទំនាក់ទំនងអន្តរជាតិកម្ពុជា និងវិទ្យាស្ថានការបរទេសឥណ្ឌា៕
