អ្នកសារព័ត៌មានមីយ៉ាន់ម៉ា ធ្លាប់សង្ឃឹមនៅពេលដែលគណបក្សសម្ព័ន្ធជាតិដើម្បីប្រជាធិបតេយ្យរបស់អ្នកស្រី អង់សាន ស៊ូជី ឈ្នះឆ្នោត ពួកគេនឹងអាចបំពេញវិជ្ជាជីវៈរបស់ខ្លួនដោយមិនមានការធ្វើបាបឬគំរាមគំហែងក្រោមរូបភាពណាមូយពីសំណាក់រដ្ឋាភិបាលនោះទេ។
ប៉ុន្តែក្រោយឈ្នះឆ្នោតក្នុងរយៈពេលជិត៣ឆ្នាំមកនេះ អ្នកសារព័ត៌មាននៅតែទទួលរងការធ្វើទុក្ខបុកម្នេញពីសំណាក់អាជ្ញាធរមីយ៉ាន់ម៉ាដដែល ពោលគឺមិនមានអ្វីខុសគ្នាពីកាលដែលប្រទេសស្ថិតក្រោមការគ្រប់គ្រងទាំងស្រុងរបស់ក្រុមយោធានោះទេ។
ក្នុងពេលធ្វើយុទ្ធនាការណ៍ឃោសនាបោះឆ្នោត គណបក្សសម្ព័ន្ធជាតិដើម្បីប្រជាធិបតេយ្យរបស់អ្នកស្រី អង់សាន ស៊ូជី បានប្ដេជ្ញាថានឹងធ្វើឲ្យប្រសើរឡើងនូវសេរីភាពសារព័ត៌មានក្រោយពីគណបក្សខ្លួនឈ្នះឆ្នោតដឹកនាំប្រទេស។
ក្នុងរបាយការណ៍របស់អង្គការអ្នកសារព័ត៌មានគ្មានព្រំដែនដែលចេញផ្សាយកាលពីខែឧសភាកន្លងទៅ អ្នកសារព័ត៌មានមីយ៉ាន់ម៉ាជាង៧០ភាគរយក្នុងចំណោមអ្នកសារព័មាន២០០នាក់ ដែលត្រូវបានសម្ភាន៍ដោយង្គការនេះ បានលើកឡើងថាកិច្ចខិតខំប្រឹងប្រែងរបស់រដ្ឋាភិបាលមីយ៉ាន់ម៉ាក្នុងការការពារអ្នកសារព័ត៌មានគឺនៅក្នុងកម្រិតមួយដែលតិចតួចខ្លាំងណាស់។
តាមការចុះផ្សាយរបស់ទីភ្នាក់ងារសារព័ត៌មាន AP គិតត្រឹមពេលដែលគណបក្សអ្នកស្រី អង់សាន ស៊ូជី ឈ្នះឆ្នោតកាលពីខែវិច្ឆិកាឆ្នាំ២០១៥ ដល់ខែកក្កដាឆ្នាំ២០១៧ មានបណ្ដឹងចំនួនជិត៦៧ ត្រូវបានប្ដឹងលើអ្នកសារព័ត៌មាន ក្រោយច្បាប់ទូរគមនាគមន៍ដ៏ចម្រូងចម្រាស ដែលពួកយោធាធ្លាប់ប្រើដើម្បីកាត់ទោសប្រឆាំងនឹងអ្នកគាំទ្រចលនាប្រជាធិបតេយ្យកន្លងមក។
លើសពីនេះទៅទៀតសេរីភាពសារព័ត៌មាន ត្រូវបានគេមើលឃើញថាកាន់មានភាពអាក្រក់ទៅៗនៅពេលដែលមានការបង្ក្រាបដោយពួកយោធាទៅលើជនជាតិរ៉ូហ៊ីងយ៉ានៅរដ្ឋរ៉ាឃីនកាលពីខែសីហាឆ្នាំ២០១៧កន្លងទៅ។
នៅពេលនោះអ្នកសារព័ត៌មានមិនត្រូវបានអនុញ្ញាត្តឲ្យចូលទៅយកព័ត៌មាននៅក្នុងហេតុការណ៍បង្រ្កាបដោយហឹង្សានោះទេ។
ភ្លាមៗក្រោយពីការហាមឃាត់អ្នកសារព័ត៌មានមិនឲ្យទៅយកព័ត៌មាននៅកន្លែងកើតហេតុ លោក Christophe Deloire លេខាទូទៅនៃអង្គការអ្នកសារព័ត៌មានគ្មានព្រំដែន កាលពីខែកញ្ញាឆ្នាំមុន បានសរសេរលិខិតចំហរមួយផ្ញើរទៅកាន់អ្នកស្រី អង់សាន ស៊ូជី ដោយរំលឹកពីការសន្យារបស់អ្នកស្រីពីការប្ដេជ្ញារបស់ខ្លួនជម្រុញឲ្យមានសេរីភាពសារព័ត៌មាននៅចំពោះមុខអង្គការអ្នកសារព័ត៌មានគ្មានព្រំដែនកាលពីឆ្នាំ២០១១កន្លងទៅ។
ប៉ុន្តែតាមអ្វីដែលលោកសង្កេតកន្លងមក រដ្ឋាភិបាលមីយ៉ាន់ម៉ាមិនបានធ្វើឲ្យសេរីភាពសារព័ត៌មានមានភាពប្រសើរឡើងនោះទេ។ លោកទោះបីជាមានការក្រើនរំលឹកយ៉ាងនេះក្តី អ្នកស្រីអង់ សានស៊ូជី ហាក់មិនបានចាប់អារម្មណ៍នឹងរឿងនេះទេ។
មិនត្រួវតែមិនខ្វាយខ្វល់នឹងការអំពាវនេះទេ រដ្ឋាភិបាលដែលដឹកនាំដោយគណបក្សអ្នកស្រី អង់សាន ស៊ូជី ហាក់កំពុងដើរបញ្រ្ចាសទៀតផង ព្រោះកាលពីចុងខែធ្នូឆ្នាំ២០១៧កន្លងទៅ អ្នកសារព័ត៌មានទីភ្នាក់ងារសារព័ត៌មានរ៉យទ័រពីរនាក់ត្រូវបានចាប់ខ្លួនដោយសារតែពួកគេបានធ្វើរឿងស៊ើបអង្កេតទាក់ទងនឹងការសម្លាប់ជនជាតិរ៉ូហ៊ីងយ៉ាង១០នាក់នៅក្នុងភូមិមួយនៅរដ្ឋរ៉ាឃីន។
ពួកគេត្រូវបានចោទប្រកាន់ពីបទរំលោភច្បាប់ស្ដីពីការសម្ងាត់របស់រដ្ឋ ដោយពួកគេបានប្រមូលព័ត៌មានទាក់ទងនឹងសន្តិសុខជាតិ ។
ទីភ្នាក់ងារសារព័ត៌មានរ៉យទ័របានអះអាងការពារ បុគ្គលិករបស់ខ្លួនទាំងពីរនាក់ថាមិនបានប្រព្រឹត្តដួចការចោទប្រកាន់នោះទេ។
នៅថ្ងៃច័ន្ទនេះ តុលាការប្រទេសមីយ៉ាន់ម៉ាបានពន្យារពេលប្រកាសសាលក្រមលើករណីអ្នកទាំងនេះ ប៉ុន្តែត្រូវបានលើកទៅថ្ងៃទី៣ខែកញ្ញាវិញដោយសារតែចៅក្រមកាន់សំណុំរឿងនេះមានជំងឺ។ ប្រសិនបើតុលាការរកឃើញថាមានទោស អ្នកទាំងពីរអាចប្រឈមនឹងការជាប់ទោសរហូតដល់១៤ឆ្នាំ។
ក្រុមអ្នកការពារសិទ្ធិអ្នកសារព័ត៌មានជាច្រើន បានលើកឡើងថារដ្ឋាភិបាលដែលដឹកនាំដោយគណបក្សរបស់អ្នកស្រី អង់សាន ស៊ូជី អាចធ្វើឲ្យស្ថានភាពសេរីភាពសារព័ត៌មានប្រសើរឡើងវិញបាន ដោយការស្នើសុំឲ្យមានការកែប្រែច្បាប់ទូរគមនាគមន៍ដែលធ្វើឡើងដោយពួកយោធា។
សម្រាប់ករណីអ្នកសារព័ត៌មានទាំងពីរនាក់ ប្រសិនបើតុលាការដាក់ទោសពួកគេ រដ្ឋាភិបាលក៏អាចជួយពួកគេបានដែរតាមរយៈការចេញលិខិតលើកលែងទោសដែលធ្វើឡើងដោយប្រធានាធិបតី ដែលគេស្គាល់ថាជាមនុស្សដ៏ស្មោះស័្មគ្របំផុតអ្នកស្រី អង់សាន ស៊ូជី។
ទោះជាយ៉ាងណាក៏ដោយ អ្វីៗអាចនឹងមិនងាយស្រួលដូចការលើកឡើងនោះទេ សម្រាប់គណបក្សសម្ព័ន្ធជាតិដើម្បីប្រជាធិបតេយ្យរបស់អ្នកស្រី អង់សាន ស៊ូជី ព្រោះថាក្រុមយោធានៅតែមានគ្រឹះរឹងមាំនៅប្រទេសមីយ៉ាន់ម៉ា។
តំបន់ដែលមានជំលោះប្រដាប់អាវុធភាគច្រើននៅតែស្ថិតក្រោមការគ្រប់គ្រងរបស់ក្រុមយោធា ហើយរដ្ឋាភិបាលស៊ីវិលមិនបានលូកដៃចូលឲ្យជ្រៅនោះទេ។ ម្យ៉ាងទៀតក្នុងរដ្ឋសភា ក្រុមយោធានៅតែកាន់កាប់សមាជិករហូតដល់២៥ភាគរយ។ រឿងទាំងនេះអាចជាហេតុផលដែលធ្វើឲ្យរដ្ឋាភិបាលដែលដឹកនាំដោយគណបក្សសម្ព័នជាតិដើម្បីប្រជាធិបតេយ្យរបស់អ្នកស្រី អង់សាន ស៊ូជី ពិបាកក្នុងការធ្វើកំណែទម្រង់ណាមួយដែលប៉ះពាល់ដល់ក្រុមយោធា៕