ក្រុមអ្នកគាំអតីតបក្សប្រឆាំងអះអាងថា នឹងធ្វើបាតុកម្មនៅទីក្រុងប៉ារីស ប្រទេសបារាំងនាដើមខែក្រោយ ដើម្បីជំរុញទៅរដ្ឋាភិបាលដោះលែង អ្នកទោសនយោបាយ នឹងប្រឆាំងលទ្ធផលបោះឆ្នោត។
តាមសេចក្តីជូនដំណឺងបានឲ្យដឹងថា សហគមន៍ខ្មែរនៅប្រទេសបារាំងនឹងធ្វើមហាបាតុកម្មនៅថ្ងៃទី០១ ខែកញ្ញាខាងមុខ ចាប់ពីម៉ោង១៤និង៣០នាទី ដល់ម៉ោង១៧និង៣០នាទី នៅទីលានសិទ្ធិមនុស្ស ត្រូកាដេរ៉ូ ទីក្រុងប៉ារីស ១៦ ដើម្បីទាមទារឲ្យដោះលែងអ្នកទោសនយោបាយទាំងអស់ ជាពិសេសលោក កឹម សុខា និងប្រឆាំងលទ្ធផលបោះឆ្នោត កាលពីថ្ងៃទី២៩ខែកក្កដាជាដើម។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ប្រតិកម្មទៅនឹងប្រជាពលរដ្ឋខ្មែរនៅប្រទេសបារាំងគ្រោងធ្វើបាតុកម្មប្រឆាំងលទ្ធផលបោះឆ្នោតថា ជាការរំលោភសិទិ្ធម្ចាស់ឆ្នោតជាង៨៣ភាគរយដែលទៅបោះឆ្នោត។
ចំណែកការទាមទារឲ្យមានការដោះលែងអ្នកទោសនយោបាយ ជាសិទ្ធិសម្រេចរបស់តុលាការ ដោយថា រដ្ឋាភិបាលមិនមានសិទ្ធិជ្រៀតជ្រែកកិច្ចការតុលការបានទេ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន
ប្រធានក្រុមអ្នកវិភាគវ័យក្មេង លោក ហង្ស វិទូ វិភាគថា ការធ្វើបាតុកម្មរបស់ខ្មែរនៅក្រៅប្រទេសទាមទារឲ្យរដ្ឋាភិបាលដោះលែងអ្នកទោសនយោបាយទាំងអស់ ជាពិសេសលោក កឹម សុខា នឹងទទួលបានផលវិជ្ជមាន។
ប្រធានក្រុមអ្នកវិភាគវ័យក្មេង លោក ហង្ស វិទូ
អ្វីដែលគួរឲ្យកត់សំគាល់ នៅអំឡុងខែសីហានេះ ព្រះមហាក្សត្របានត្រាស់បង្គាប់លើកលែងទោសដល់សកម្មជនដីធ្លីបឹងកក់៤រូប ក្នុងនោះមានឈ្មោះ អ្នកស្រី ទេព វន្នី និងអតីតបុគ្តលិកវិទ្យុអាសរីពីររូប អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន រួមទាំងអតីតប្រធានគណបក្សអំណាចខ្មែរ លោក សួន សេរីដ្ឋា ជាដើម។
ក្នុងពិធីសំណេះសំណាលជាមួយក្រុមកម្មករនៅខេត្តកណ្តាលនាថ្ងៃ២៣ខែសីហានេះ លោក ហ៊ុន សែន បានបង្ហើបថា រដ្ឋមន្ត្រីក្រសួងយុត្តិធម៌កំពុងពិនិត្យលទ្ធភាពលើកលែងទោសដល់សកម្មជននយោបាយចំនួន ១២នាក់ផ្សេងទៀត ដែលថាអាចនឹងត្រូវធ្វើឡើងក្នុងពិធីបុណ្យជាតិខាងមុខផងដែរ៕