សាលាដំបូងរាជធានីភ្នំពេញ នៅព្រឹកនេះ បានសម្រេចលើកពេលសវនាការ លើសំណុំរឿងរបស់មន្ត្រីការពារសិទ្ធិមនុស្សអាដហុក ៣ រូប ដោយសំអាងថា អវត្តមានសាក្សីពីររូបឈ្មោះ ខុម ចាន់តារាទី ហៅស្រីមុំ និងម្នាក់ទៀតឈ្មោះ ទ្រី ឈួន។
នៅព្រឹកនេះ មន្ត្រីការពារសិទ្ធិមនុស្សអាដហុក លោក យី សុខសាន្ត លោកណៃ វ៉ង់ដា និងអតីតមន្រ្តីអាដហុកលោក នី ចរិយា ទៅតុលាការចូលរួមសវនាការ តាមការកោះហៅរបស់ចៅក្រម ក្នុងសំណុំរឿងចោទថា សមគំនិត និងសូកប៉ាន់សាក្សី។
ក្នុងបន្ទប់សវនាការមេធាវីការពារក្ដី បានស្នើទៅចៅក្រមឲ្យលើកពេលសវនាការថ្ងៃក្រោយវិញ ដោយថា សវនាការមិនមានកូនក្ដីចំនួន ២ រូបទៀត និងសាក្សីសំខាន់ ២ រូប ដែលបានចោទប្រកាន់ទៅលើកូនក្ដីរបស់លោក។ ក្រោយពីមានការសំណើនេះ ចៅក្រមជំនុំជម្រះ បានសម្រេចលើកពេលទៅថ្ងៃទី១៨ ខែកញ្ញាវិញ ដោយសារ មូលហេតុមិនមានសាក្សី។
ប្រាប់អ្នកសារព័ត៌មានបន្ទាប់ចេញពីសវនាការ លោក យី សុខសាន្ត លើកឡើងថា លោកចង់ឲ្យសាក្សីដែលជាប់ពាក់ព័ន្ធក្នុងសំណុំរឿងនេះ ចូលរួមសវនាការដែរ ដោយសារ សាក្សីទាំងនោះ បានចោទប្រកាន់ទៅលើរួបលោក និងមន្ត្រីការពារសិទ្ធិផ្សេងទៀត។
មន្ត្រីការពារសិទ្ធិមនុស្សអាហុក លោក យី សុខសាន្ត
ប្រធានគ្រប់គ្រងផ្នែកអង្កេតនៃអង្គការការពារសិទ្ធិមនុស្សលីកាដូ លោក អំ សំអាត ចាត់ទុកការលើកពេលសវនាការនេះថារឿងត្រឹមត្រូវ។
ប្រធានគ្រប់គ្រងផ្នែកអង្កេតនៃអង្គការការពារសិទ្ធិមនុស្សលីកាដូ លោក អំ សំអាត
សវនាការនៅថ្ងៃនេះ មានការឃ្លាំមើលពីតំណាងស្ថានទូតរួមមាន ស្ថានទូតអាមេរិក ស៊ុយអ៊ែត EU UN អង្គការសង្គមស៊ីវិលជាតិ និងអន្តរជាតិផ្សេងៗទៀត ។ ក្រៅពីនោះ ក៏មានមន្ត្រីជាន់ខ្ពស់អង្គភាពប្រឆាំងអំពើពុករលួយចូលរួមក្នុងសវនាការនេះដែរ។
កាលពីថ្ងៃអាទិត្យម្សិលមិញអង្គការអន្តរជាតិចំនួន ៥ បានទទូចឲ្យតុលាការកម្ពុជាទម្លាក់ការចោទប្រកាន់លើក្រុមអ្នកការពារសិទ្ធិមនុស្ស ដោយថា ការចោទប្រកាន់របស់តុលាការ កាលពីពេលកន្លងទៅ គឺជាការចោទប្រកាន់ដែលមានចរិតនយោបាយ និងជាការយាយីដល់សិទ្ធិសេរីភាពរបស់ក្រុមអង្គការសង្គមស៊ីវិលតែប៉ុណ្ណោះ។
មន្ត្រីអាដហុក៤រូបនិងអគ្គលេខាធិការរង គ.ជ.ប ១រូប ជាប់ពន្ធនាគារអស់រយៈពេលជាង១ឆ្នាំ ក្រោមការចោទថា បានសមគំនិត និងសូកប៉ាន់សាក្សី ពាក់ព័ន្ធនឹងសំណុំរឿងនាង ខុម ចាន់តារាទី ហៅ ស្រីមុំ ដែលត្រូវបានគេទម្លាយថា មានទំនាក់ទំនងស្នេហាចម្រូងចម្រាស់ជាមួយមេដឹកនាំអតីតបក្សប្រឆាំង លោក កឹម សុខា។
អ្នកទាំង៥រូបត្រូវបានដោះលែងឲ្យនៅក្រៅឃុំបណ្តោះអាសន្នកាលពីខែមិថុនាឆ្នាំមុន រហូតដល់នៅក្នុងខែសីហាឆ្នាំ២០១៨នេះ ចៅក្រមចាប់ផ្តើមកោះហៅអ្នកទាំងនេះចូលរួមសវនាការបន្តបន្ទាប់។
