អគ្គមេបញ្ជាការស្តីទីនៃកងយោធពលខេមរភូមិន្ទ លោក សៅ សុខា បានប្រគល់តំណែងស្ដីទីនេះឲ្យទៅកូនប្រុសច្បងលោកនាយករដ្ឋមន្ដ្រី ហ៊ុន សែន គឺលោក ហ៊ុន ម៉ាណែត ដែលបច្ចុប្បន្នជាអគ្គមេបញ្ជាការរង នាយស្តីទីសេនាធិការចម្រុះ។
យោងតាមលិខិតចុះថ្ងៃទី២៤ ខែសីហាឆ្នាំ២០១៨ ដែល VOD ទើបតែទទួលបាននៅថ្ងៃនេះ លោក សៅ សុខា ពន្យល់ថា ការប្រគល់តំណែងនេះ គឺដោយសារតែលោកត្រូវទៅពិនិត្យជំងឺនៅប្រទេសសិង្ហបុរី ចាប់ពីថ្ងៃទី២៦ ដល់ថ្ងៃទី២៨សីហា។
អ្នកនាំពាក្យក្រសួងការពារជាតិ លោក ឈុំ សុជាតិ ធ្លាប់បានប្រាប់ VOD ផងដែរថា ការផ្ទេរតំណែងស្ដីទីទាំងនេះ គឺជាការផ្ទេរការទទួលខុសត្រូវបណ្ដោះអាសន្ន ក្នុងពេលដែលលោក ប៉ុល សារឿន អគ្គមេបញ្ជាការ នៃ ខ.ភ.ម លោក គន់ គីម នាយសេនាធិការចម្រុះ នៃខ.ភ.ម និងលោក មាស សុភា មេបញ្ជាការកងទ័ពជើងគោក ដែលជាប់ភារកិច្ចឈរឈ្មោះជាតំណាងរាស្រ្តសម្រាប់ការបោះឆ្នោតជាតិអាណត្តិទី៦ ដែលបានបញ្ចប់ទៅកាលពីថ្ងៃទី២៩កក្កដាឆ្នាំ២០១៨៕
ទោះយ៉ាងណាលោក មាស សុភា បានលាឈប់ពីតំណាងរាស្ត្រហើយទៅទទួលតំណែងមេបញ្ជាការកងទ័ពវិញ ចំណែក លោកប៉ុល សារឿន និង លោក គន់ គីម នៅមិនទាន់មានព័ត៌មានពីការលាឈប់ពីតំណែងតំណាងរាស្ត្រនោះទេ។