មន្ត្រីជំនាញអះអាងថា បទល្មើសផលិតផលក្លែងក្លាយពិតជាមានការកើនឡើងមែន ប៉ុន្តែសមត្ថកិច្ចកំពុងតែចាត់វិធានការដោយយកចិត្តទុកដាក់។
អនុប្រធានលេខាដ្ឋានប្រយុទ្ធប្រឆាំងផលិតផលក្លែងក្លាយ និងជាប្រធានប្រតិបត្តិការបង្រ្កាបផលិតផលក្លែងក្លាយ លោក ទូច យុទ្ធា មានប្រសាសន៍ថា មានក្រុមខិលខូចមួយចំនួនបានបង្កើតទីតាំងផលិតផលិតផលក្លែងក្លាយជាច្រើននៅឆ្នាំនេះ។
អនុប្រធានលេខាដ្ឋានប្រយុទ្ធប្រឆាំងផលិតផលក្លែងក្លាយ និងជាប្រធានប្រតិបត្តិការបង្រ្កាបផលិតផលក្លែងក្លាយ លោក ទូច យុទ្ធា
មន្ត្រីជំនាញរូបនេះ បញ្ជាក់ថាសមត្ថកិច្ចជំនាញកំពុងសហការជាមួយស្ថាប័នពាក់ព័ន្ធដើម្បីទប់ស្កាត់បទល្មើសនេះឲ្យមានប្រសិទ្ធិភាព ដើម្បីជួយការពារសុខភាពប្រជាពលរដ្ឋ។
កាលពីម្សិលមិញ នគរបាលប្រឆាំងបទល្មើសសេដ្ឋកិច្ច នៃអគ្គស្នងការដ្ឋាននគរបាលជាតិ ក្រសួងមហាផ្ទៃ សហការជាមួយមន្ត្រីកាំកុងត្រូល និងអាជ្ញាធរមូលដ្ឋាន បានចុះឆែកឆេរផ្ទះ២កន្លែងផ្សេងគ្នាស្ថិតនៅសង្កាត់ទួលសង្កែទី២ ខ័ណ្ឌឫស្សីកែវ និងភូមិទួលពង្រ សង្កាត់ចោមចៅ រាជធានីភ្នំពេញ ហើយបានរឹបអូសបានប៊ីចេងក្លែងក្លាយសរុបជាង៣៧តោន។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា ដើមចមដែលនាំឲ្យមានបទល្មើសផលិតផលក្លែងក្លាយកើនឡើង ដោយសារការអនុវត្តច្បាប់របស់អាជ្ញាធរនៅមាន ភាពខ្វះចន្លោះ។ លោកបន្តថា បើមិនទប់ស្កាត់ឲ្យមានប្រសិទ្ធិភាពទេ វានឹងធ្វើឲ្យប៉ះពាល់ដល់សុខភាពប្រជាពលរដ្ឋនិងមុខមាត់កម្ពុជាលើឆាកអន្តរជាតិផងដែរ ។
មាត្រា៦៤ និងមាត្រា៦៥ នៃច្បាប់ស្តីពី ម៉ាក ពាណិជ្ជនាម និងការប្រកួតប្រជែងមិនស្មោះត្រង់ បានចែងថា ជនណាដែលក្លែងបន្លំ ពាណិជ្ជសញ្ញា សេវាសញ្ញា ម៉ាកសមូហភាព ឬពាណិជ្ជនាមរបស់សហគ្រាសណាមួយផ្សេងទៀតដែលបានចុះបញ្ជីនៅកម្ពុជា ត្រូវផ្តន្ទាទោសដាក់ព័ន្ធនាគារពី១ឆ្នាំទៅ៥ឆ្នាំ និងពិន័យជាប្រាក់ពី១លានរៀល ទៅ២០លានរៀល។
របាយការណ៍របស់គណៈកម្មាធិការប្រយុទ្ធប្រឆាំងផលិតផលក្លែងក្លាយ បានឱ្យដឹងថា ក្នុងរយៈពេល ១២ខែ កាលពីឆ្នាំមុន ស្ថាប័ននេះបានរឹបអូសផលិតផលក្លែងក្លាយ រួមនឹងគ្រឿងទេសក្លែងក្លាយខុសច្បាប់ចំនួនប្រមាណ៦០០តោន។ គណៈកម្មការនេះ ទទួលស្គាល់ថារផលិត ការចរាចរណ៍ផលិតផលក្លែងក្លាយនៅតែបន្តដែលតម្រូវឱ្យមានវិធានការជាបន្តបន្ទាប់ទៀត។
របាយការណ៍បូកសរុបរបស់ក្រសួងសុខាភិបាលកាលពីឆ្នាំ២០១៦ បានបង្ហាញថា អ្នកជំងឺទឹកនោមផ្អែម ដែលមកពីការបរិភោគចំណីអាហារមានសារធាតុគីមី ក្នុងរយៈពេល៣ឆ្នាំ មានការកើនឡើងជិត២ដង បើប្រៀបធៀបទៅនឹងឆ្នាំ២០១៤៕