អន្តរជាតិ

ចិនបដិសេធថាមិនបានប្រើលុយដើម្បីឲ្យអែលសាល់វ៉ាឌ័របង្កើតការទូតជាមួយខ្លួនទេ

លោក ស៊ុន សុខេន
| ២៩ សីហា ២០១៨
ម៉ោង ១៥:៥៩

អ្នកនាំពាក្យក្រសួងការបរទេសចិន អ្នកស្រី Hua Chunying (រូបភាព៖ វេបសាយបរទេស)

មេដឹកនាំចិន បានចេញមុខបដិសេធថាប្រទេសខ្លួនមិនបានចំណាយលុយដើម្បីជាថ្នូរឲ្យប្រទេសអែលសាល់វ៉ាឌ័រ បង្កើតទំនាក់ទំនងការទូតជាមួយខ្លួនដូចជាការចោទប្រកាន់របស់ភាគីតៃវ៉ាន់នោះទេ។

អ្នកនាំពាក្យក្រសួងការបរទេសចិន អ្នកស្រី Hua Chunying បានថ្លែងក្នុងសន្និសីទការសែតមួយកាលពីថ្ងៃទី២៧ខែសីហាថាការបង្កើតទំនាក់ទំនងការទូតរវាងចិននិងអែលសាល់វ៉ាឌ័រ គឺធ្វើឡើងដោយផ្អែកលើគោលការណ៍ចិនតែមួយ ដែលអនុលោមទៅតាមច្បាប់អន្តរជាតិ។

អ្នកស្រីបន្តថារដ្ឋាភិបាលអែលសាល់វ៉ាឌ័រ មិនបានភ្ជាប់លក្ខខណ្ឌសេដ្ឋកិច្ចណាមូយនោះទេ ហើយការលើកឡើងណាមួយដែលថាចិនប្រើលុយជាការបំផ្លើស។

ភាគីតៃវ៉ាន់បានហៅទំនាក់ទំនងការទូតរវាងចិននិងអែលសាល់វ៉ាឌ័រថាជាចំណង«ការទូតបែបដុល្លារ»។

តៃវ៉ាន់ បានចោទថាចិនបានសុខចិត្តផ្ដល់ប្រាក់ឲ្យអែលសាល់វ៉ាឌ័ររហូតដល់ជាង២០ពាន់លានដុល្លារដើម្បីជាការដោះដូរឲ្យមានចំណងការទូតជាមួយខ្លួន។

ប្រទេសអែលសាល់វ៉ាឌ័រ បានប្រកាសផ្ដាច់ទំនាក់ទំនងការទូតរបស់ខ្លួនជាមួយតៃវ៉ាន់ហើយងាកមកចាប់ចិនជាផ្លូវការកាលពីថ្ងៃទី២១ខែសីហាកន្លងទៅ។ រហូតមកដល់ពេលនេះមានប្រទេសតែ១៧ប៉ុណ្ណោះដែលនៅស្មោះស្ម័គ្ររក្សាចំណងការទូតជាផ្លូវការជាមួយតៃវ៉ាន់៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។