សាលាដំបូងរាជធានីភ្នំពេញ នៅថ្ងៃនេះ បានបន្តសវនាការសួរដេញដោលអ្នកផលិតភាពយន្តឯកសារជនជាតិអូស្ត្រាលីម្នាក់ ពាក់ព័ន្ធនឹងប្រភពថវិកាដែលបានយកទៅជួយក្មេងៗក្រីក្រ និងគ្រួសារកូនចិញ្ចឹមរបស់លោកនៅក្នុងប្រទេសកម្ពុជានាពេលបច្ចុប្បន្ន ។
ក្នុងបន្ទប់សវនាការសួរដេញដោល លោក James Ricketson បានប្រាប់ទៅចៅក្រមថា ថវិកាដែលប្រើសម្រាប់ជួយដល់ក្មេងៗក្រីក្រនិងកូនចិញ្ចឹមនោះ គឺសារព័ត៌មាន ABC ប្រចាំនៅអូស្រ្តាលី និងខាង Al Jazeera អ្នកផ្តល់ឲ្យលោកដោយលោកផលិតព័ត៌មានឲ្យស្ថាប័នទាំងនេះ។
លោកបន្តថា ចាប់តាំងពីលោកបានចូលមកប្រទេសកម្ពុជា លោកបានជួយក្មេងជាច្រើននាក់ដោយផ្ដល់ប្រាក់សម្រាប់ឲ្យពួកគេសិក្សា ប៉ុន្តែសម្រាប់កូនចិញ្ចឹមវិញ លោកបានផ្ដល់ថវិកាក្នុងមួយខែជាង ១០០ ដុល្លារដល់គ្រួសារ ហើយក៏ទិញដីទុកឲ្យពួកគេផងដែរ។
លោក Ricketson ប្រាប់ទៅចៅក្រមថា លោកត្រូវស្វែងរកថវិកាជាង ១៤ ម៉ឺនដុល្លារបន្ថែមទៀត សម្រាប់ជួយក្មេង និងគ្រួសារក្រីក្រនៅកម្ពុជាផងដែរ។ បន្ទាប់ពីសាកសួរពេញមួយព្រឹកចៅក្រមសម្រេចផ្អាកសវនាការ ហើយថា នឹងបន្តទៀតនៅរសៀលនេះ ដោយសួរដេញដោលផ្តោតលើករណីចោទថា លួចប្រមូលព័ត៌មានពីកម្ពុជា។
លោក Ricketson ត្រូវបានសមត្ថកិច្ចចាប់ឃុំខ្លួននៅក្នុងខែមិថុនា ឆ្នាំ២០១៧ បន្ទាប់ពីលោកបានបង្ហោះដ្រូនដើម្បីថតសកម្មភាពឃោសនាបោះឆ្នោតឃុំសង្កាត់របស់គណបក្សសង្គ្រោះជាតិ។ ក្រោយពីមានការចាប់ខ្លួនលោក Ricketson រដ្ឋមន្ត្រីការបរទេសអូស្រ្តាលី លោកស្រី Julie Bishop បានសរសេរលិខិតមួយផ្ញើទៅរដ្ឋមន្ត្រីការបរទេសកម្ពុជាលោក ប្រាក់ សុខុន ក្នុងបំណងស្វែងរក ការសម្របសម្រួលឲ្យមានការដោះលែងលោកJames Ricketson ។