លោកនាយករដ្ឋមន្ដ្រី ហ៊ុន សែន បានព្រមានចាប់ខ្លួនលោក គឹម សុខ ដាក់ពន្ធនាគារម្ដងទៀត ប្រសិនបើអ្នកវិភាគនយោបាយរូបនេះមិនសងប្រាក់ចំនួន ៨០០លានរៀលឲ្យទៅគណបក្សកាន់អំណាចទេនោះ។
ក្នុងពិធីជួបជាមួយក្រុមកម្មករកាលពីម្សិលមិញនៅខណ្ឌពោធិ៍សែនជ័យ រាជធានីភ្នំពេញ មេដឹកនាំគណបក្សប្រជាជនកម្ពុជា លោក ហ៊ុន សែន ប្រាប់ឲ្យមេធាវីរបស់លោក ទាមទារប្រាក់សំណងជំងឺចិត្ត ៨០០លានរៀល ឬស្មើនឹង២០ម៉ឺនដុល្លារ ពីលោក គឹម សុខ ដែលជាអ្នកវិភាគបញ្ហាសង្គម និងនយោបាយទើបបានចេញពីពន្ធនាគារ កាលពី២សប្ដាហ៍មុន។
លោកថ្លែងទៀតថា ទោះជាលោក គឹម សុខ បានអនុវត្តទោសរួចរាល់ហើយក៏ដោយ ប៉ុន្ដែ អ្នកវិភាគរូបនេះមិនទាន់បានសងប្រាក់សំណងទៅគណបក្សប្រជាជននោះទេ ខណៈលោក ហ៊ុន សែន បន្ទោសថា លោក គឹម សុខ បានប្រើពាក្យសម្ដីបន្តុះបង្អាប់លើរដ្ឋាភិបាលរបស់លោក ក្រោយចេញពីពន្ធនាគារ។
លោកនាយករដ្ឋមន្ដ្រី ហ៊ុន សែន
កាលពីថ្ងៃទី១៧ខៃសីហាកន្លងទៅថ្មីៗនេះ លោក កឹម សុខា ត្រូវបានដោះលែងឲ្យមានសេរីភាពវិញ បន្ទាប់អនុវត្តទោស១៨ខែរួចរាល់ ក្រោមការចោទរបស់រដ្ឋាភិបាលពីបទ «បរិហារកេរ្តិ៍ជាសាធារណៈ និងញុះញង់ឲ្យប្រព្រឹត្តបទឧក្រិដ្ឋជាអាទិ៍»។
ក្រៅពីនេះ លោក កឹម សុខ ក៏នៅជាប់បណ្ដឹងមួយទៀត ដែលថា លោកបានចោទរដ្ឋាភិបាលថា បានបង្កើតប្រព័ន្ធសម្លាប់មនុស្សក្រៅប្រព័ន្ធច្បាប់។
យ៉ាងណាក៏ដោយ ក្រោយចេញពីពន្ធនាគារ លោក គឹម សុខ បានបញ្ជាក់ជំហរថា លោកនៅតែបន្ដការវិភាគវែកញែកស្របទៅតាមច្បាប់ដើម្បីជំរុញយុត្តិធម៌សង្គម និងយន្ដការប្រជាធិបតេយ្យក្នុងប្រទេសកម្ពុជា៕