ទីបំផុតទៅ តុលាការសម្រេចពន្យារពេលឃុំខ្លួនមេដឹកនាំអតីតបក្សប្រឆាំង លោក កឹម សុខា បន្ដទៀត បន្ទាប់ពីលោកត្រូវបានឃុំខ្លួនបណ្ដោះអាសន្នអស់រយៈពេលជិត ១ឆ្នាំមកហើយនោះ ដែលសេចក្ដីសម្រេចនេះ ត្រូវបានធ្វើឡើងដូចការថ្លែងរបស់លោកនាយករដ្ឋមន្ត្រី ហ៊ុន សែន។
លោក កឹម សុខា ត្រូវបានក្រុមចៅក្រមស៊ើបសួរនៃសាលាដំបូងរាជធានីភ្នំពេញ បើកសវនាការនៅក្នុងពន្ធនាគារត្រពាំងផ្លុង ស្ថិតនៅក្នុងខេត្តត្បួងឃ្មុំ ជាទីដែលលោកត្រូវបានចាប់ដាក់ឃុំចាប់តាំងពីថ្ងៃទី៣ ខែកញ្ញាឆ្នាំមុនមកម៉្លេះ។
ក្រោយបញ្ចប់ការសួរដេញដោលអស់រយៈពេលមួយព្រឹក មេធាវីការពារក្ដីមេដឹកនាំបក្សប្រឆាំងរូបនេះ លោក ចាន់ ចេន បានប្រាប់វីអូឌីនៅរសៀលថ្ងៃនេះថា ចៅក្រមស៊ើបសួរសាលាដំបូងរាជធានីភ្នំពេញ បានសម្រេចបន្តឃុំខ្លួនកូនក្ដីលោកបណ្ដោះអាសន្ន ៦ខែទៀត។
ចៅក្រមស៊ើបសួរសាលាដំបូងរាជធានីភ្នំពេញ បានសម្រេចបែបនេះ ដូចទៅនឹងសម្ដីរបស់លោកនាយករដ្ឋមន្ត្រី ហ៊ុន សែនដែលបានថ្លែងកាលពីថ្ងៃម្សិលមិញថា គ្មានការដោះលែងលោក កឹម សុខា ឡើយនៅថ្ងៃនេះនោះឡើយ។
សវនាការសួរដេញដោលលោក កឹម សុខា នៅថ្ងៃនេះ ត្រូវបានធ្វើឡើងក្រោមការរឹតបន្តឹងសន្តិសុខនៅជុំវិញបរិវេណពន្ធនាគារត្រពាំងផ្លុង ខណៈដែលក្រុមអ្នកគាំទ្រអតីតបក្សប្រឆាំង អង្គការសង្គមស៊ីវិល និងសារព័ត៌មានមួយចំនួន មិនត្រូវបានអនុញ្ញាតឲ្យចូលទៅតាមដាននោះឡើយ។
លោក កឹម សុខា បានជាប់ឃុំក្នុងពន្ធនាគារជិត ១ឆ្នាំមកហើយ ក្រោយពីអាជ្ញាធរកម្ពុជាចាប់ខ្លួនលោកនៅយប់ថ្ងៃទី៣ ខែកញ្ញាឆ្នាំ២០១៧ ក្រោមការចោទប្រកាន់ពីរដ្ឋាភិបាលថា «ក្បត់ជាតិ»។
ប៉ុន្ដែ ក្រុមអង្គការឃ្លាំមើលសិទ្ធិមនុស្សអន្ដរជាតិ និងក្រុមការងារនៃអង្គការសហប្រជាជាតិទទួលបន្ទុកដោះស្រាយបញ្ហាឃុំខ្លួនដោយបំពាន ហៅករណីនេះថា ធ្វើឡើងដោយបំពានច្បាប់ និងមានហេតុផលនយោបាយនៅពីក្រោយ៕
រាយការណ៍បន្ថែមដោយលោក ញឹម សុខន