ក្រុមកម្លាំងសន្តិសុខចម្រុះ ត្រូវបានដាក់ពង្រាយនៅជុំវិញបរិវេណពន្ធនាគារត្រពាំងផ្លុង ជាទីដែលមេដឹកនាំអតីតបក្សប្រឆាំង លោក កឹម សុខា កំពុងស្ថិតក្រោមការសាកសួរបន្ថែមទៀត ជុំវិញការពន្យារពេលឃុំខ្លួនលោក ក្រោយពីលោកត្រូវបានចាប់ដាក់ឃុំអស់រយៈពេលជិត ១ឆ្នាំមកហើយនោះ។
នៅព្រឹកថ្ងៃព្រហស្បតិ៍នេះ គឺជាសវនាការពន្យារពេលឃុំខ្លួនប្រធានអតីតបក្សប្រឆាំងលោក កឹម សុខា ដែលបានជាប់ឃុំអស់រយៈពេលជិត ១ឆ្នាំមកហើយនោះ ប៉ុន្ដែ សមត្ថកិច្ចខេត្តត្បូងឃ្មុំ បានរឹតបន្ដឹងសន្ដិសុខខ្លាំង ក្រោយការព្រមានពីនាយករដ្ឋមន្ដ្រី ហ៊ុន សែន។
ចៅក្រមស៊ើបសួរសាលាដំបូងរាជធានីភ្នំពេញ លោក គី ឬទ្ធី បើកសវនាការមួយពាក់ព័ន្ធនឹងនីតិវិធីពន្យារពេលឃុំខ្លួនលោក កឹម សុខា ដែលធ្វើឡើងនៅពន្ធនាគារត្រពាំងផ្លុង ខេត្តត្បូងឃ្មុំ នៅថ្ងៃទី៣០ខែសីហានេះ។ ការបើកសវនាការនេះ គឺដើម្បីពិនិត្យថាតើ លោក កឹម សុខា ត្រូវពន្យារពេលឃុំខ្លួន ៦ខែទៀត ឬអនុញ្ញាតឲ្យនៅក្រៅឃុំ។
ប៉ុន្ដែ សវនាការនេះ គឺពោរពេញដោយការរឹតបន្ដឹងសន្ដិសុខខ្លាំងពីសំណាក់កម្លាំងសមត្ថកិច្ចខេត្តត្បូងឃ្មុំ នៅតាមផ្លូវចូលទៅពន្ធនាគារត្រពាំងផ្លុង ខេត្តត្បូងឃ្មុំ ដែលធ្វើឲ្យក្រុមអ្នកគាំទ្រអតីតបក្សប្រឆាំង ក្រុមអង្គការសង្គមស៊ីវិល និងអ្នកសារព័ត៌មានមួយចំនួន មិនត្រូវបានអនុញ្ញាតនោះទេ។
ការរឹតបន្ដឹងនេះ គឺធ្វើឡើងតែមួយថ្ងៃប៉ុណ្ណោះ បន្ទាប់ពីលោកនាយករដ្ឋមន្ដ្រី ហ៊ុន សែន កាលពីម្សិលមិញ បានថ្លែងថា នឹងគ្មានការដោះលែងលោក កឹម សុខា នោះទេ។
លោក ហ៊ុន សែន ក៏បានបញ្ជាឲ្យសមត្ថកិច្ចតាមចាប់ខ្លួនអ្នកដែលបានឃោសនាដើម្បីប្រមូលកម្លាំង ឲ្យទៅទទួលមេដឹកនាំបក្សប្រឆាំងរូបនេះផងដែរ៕