អតីតប្រធានគណបក្សសង្គ្រោះជាតិ លោក សម រង្ស៊ី ដែលកំពុងនិរទេសខ្លួននៅក្រៅប្រទេស បានស្នើទៅតុលាការកម្ពុជា ឲ្យចោទប្រកាន់មេដឹកនាំសហរដ្ឋអាមេរិក និងអាល្លឺម៉ង់ផងដែរ ក្នុងសំណុំរឿងមេដឹកនាំអតីតបក្សប្រឆាំង លោក កឹម សុខា ដែលត្រូវបានរដ្ឋាភិបាលចោទថា «ក្បត់ជាតិ»។
លោក សម រង្ស៊ី បានសរសេរលើទំព័រហ្វេសប៊ុករបស់លោកកាលពីម្សិលមិញថា មានជនជាប់ចោទ ២នាក់ទៀត ដែលតុលាការកម្ពុជាគួរចោទប្រកាន់ពាក់ព័ន្ធនឹងសំណុំរឿង «ក្បត់ជាតិ» ប្រឆាំងនឹងលោក កឹម សុខា គឺរដ្ឋាភិបាលសហរដ្ឋអាមេរិក និងអាល្លឺម៉ង់។
លោក សម រង្ស៊ី លើកឡើងថា រដ្ឋាភិបាលប្រទេសទាំងពីរនេះបានជួយអតីតគណបក្សសង្គ្រោះជាតិក្នុងការរៀបចំសិក្ខាសាលា បណ្ដុះបណ្ដាលធនធានមនុស្សឲ្យយល់ដឹងអំពីសិទ្ធិមនុស្ស និងលទ្ធិប្រជាធិបតេយ្យ និងការរៀបចំគោលនយោបាយរបស់អតីតបក្សបក្សប្រឆាំងមួយនេះ តាមរយៈវិទ្យាស្ថានជាតិប្រជាធិបតេយ្យ វិទ្យាស្ថានសាធារណរដ្ឋអន្ដរជាតិ និងអង្គការអាល្លឺម៉ង់ Konrad Adenauer Fondation។
ប៉ុន្ដែ កាលពីថ្ងៃទី៣០ ខែសីហាកន្លងទៅនេះ លោក សម រង្ស៊ី ក៏បានលើកឡើងថា លោកសុំឲ្យតុលាការកម្ពុជាចោទប្រកាន់រូបលោកទន្ទឹមគ្នានឹងលោក កឹម សុខា ផងដែរ ក្នុងឋានៈលោកជាស្ថាបនិកគណបក្សសង្គ្រោះជាតិ និងមានការទទួលខុសត្រូវខ្ពស់បំផុតនៅពេលនោះ។
ការស្នើឡើងរបស់លោក សម រង្ស៊ី នេះ គឺបន្ទាប់ពីចៅក្រមស៊ើបសួរសាលាដំបូងរាជធានីភ្នំពេញ លោក គី ឬទ្ធី បានសម្រេចបន្តពេលឃុំខ្លួនបណ្ណោះអាសន្នលើលោក កឹម សុខា ចំនួន ៦ខែទៀត បន្ទាប់ពីលោក កឹម សុខា ត្រូវបានអាជ្ញាធរចាប់ខ្លួនកាលពីយប់ថ្ងៃទី៣ ខែកញ្ញាឆ្នាំមុន ជុំវិញវីដេអូឃ្លីប ដែលលោកថ្លែងនៅប្រទេសអូស្ដ្រាលីកាលពីឆ្នាំ២០១៣៕
