អង្គការអន្ដរជាតិចំនួន២ ដែលធ្វើការលើផ្នែកសិទ្ធិសេរីភាពសារព័ត៌មាន បានថ្កោលទោសទៅលើសេចក្ដីសម្រេចរបស់តុលាការកម្ពុជាថា ធ្វើឡើងដោយគ្មានភស្ដុតាងគ្រប់គ្រាន់ ចំពោះករណីដែលចោទអ្នកផលិតខ្សែភាពយន្ដជនជាតិអូស្ដ្រាលីថា បានប្រព្រឹត្តអំពើចារកម្ម។
កាលពីថ្ងៃទី៣១ ខែសីហា សាលាដំបូងរាជធានីភ្នំពេញ បានសម្រេចផ្តន្ទាទោសលោក James Ricketson ឲ្យជាប់ទោស ៦ឆ្នាំ ក្រោមបទចារកម្ម និងលួចប្រមែប្រមូលព័ត៌មានពីកម្ពុជាបញ្ជូនទៅឲ្យបរទេស ដែលធ្វើឲ្យអន្តរាយដល់ការការពារជាតិ។
ភ្លាមៗក្រោយសេចក្ដីសម្រេចបែបនេះ លោក James Ricketson បានចោទសួរទៅប្រធានចៅក្រមជំនុំជម្រះ លោក សេង លាង ថា «តើលោកធ្វើជាចារកម្មឲ្យប្រទេសណា?» ប៉ុន្តែ ចៅក្រមរូបនេះមិនបានឆ្លើយតបនោះទេ។
ក្នុងសេចក្ដីថ្លែងការណ៍ចេញផ្សាយកាលពីថ្ងៃទី៣១ សីហានោះដែរ អង្គការអ្នកសារព័ត៌មានគ្មានព្រំដែន (Reporters without Borders) និងក្លឹបអ្នកកាសែតបរទេសនៅកម្ពុជា (Overseas Press Club of Cambodia) បានហៅការផ្តន្ទាទោសនេះថា មិនអាចទទួលយកបាន និងថា តុលាការកម្ពុជាមិនបានបង្ហាញភស្ដុតាងគ្រប់គ្រាន់ក្នុងការសម្រេចរបស់ខ្លួននោះទេ ដូចជា នៅមានសំណួរថា តើលោក James Ricketson ធ្វើចារកម្មឲ្យប្រទេសមួយណាជាដើម។
អង្គការអន្ដរជាតិធ្វើការផ្នែកសេរីភាពសារព័ត៌មានទាំងនេះ បន្ដថា តុលាការកម្ពុជាបានពិនិត្យតែទៅលើរូបភាព និងអ៊ីម៉ែលមួយចំនួនក្នុងកុំព្យូទ័រផ្ទាល់ខ្លួនរបស់លោក James Ricketson តែប៉ុណ្ណោះ ខណៈឯកសារទាំងនេះសុទ្ធសឹងជាវីដេអូឯកសារអំពីជីវិតក្មេងកំព្រា និងភាពក្រីក្រក្នុងប្រទេសកម្ពុជា ក្រោមការដឹកនាំរបស់រដ្ឋាភិបាលសព្វថ្ងៃប៉ុណ្ណោះ។
អង្គការអន្ដរជាតិទាំងនេះ ព្រមានថា កម្ពុជានឹងបាក់មុខមាត់នៅលើឆាកអន្ដរជាតិ បើមិនដោះលែងលោក James Ricketson ឲ្យមានសេរីភាពវិញទេនោះ។
លោក James Ricketson ត្រូវបានសមត្ថកិច្ចចាប់ឃុំខ្លួន កាលពីខែមិថុនា ឆ្នាំ២០១៧ បន្ទាប់ពីលោកបានបង្ហោះដ្រូន ដើម្បីផ្ដិតយកសកម្មភាពឃោសនាបោះឆ្នោតឃុំសង្កាត់របស់គណបក្សសង្គ្រោះជាតិ៕