ចិន បានច្រានចោលចំពោះការចោទប្រកាន់ដែលថាខ្លួនកំពុងប្រើ«អន្ទាក់បំណុល» ដើម្បីអូសទាញប្រទេសមួយចំនួនឲ្យស្ថិតក្រោមឥទ្ធិពលរបស់ចិន។
ការលើកឡើងរបស់ចិនបែបនេះ ធ្វើឡើងស្របអ្នកជំនាញកិច្ចការអន្តរជាតិនិងសារព័ត៌មានដែលមាន និន្នាការទៅលោកខាងលិចមួយចំនួនបានចេញផ្សាយជាបន្តបន្ទាប់ ថាការផ្ដល់ប្រាក់កម្ចីរបស់ចិនដល់ប្រទេសមួយចំនួនមានលក្ខណៈជាអន្ទាក់ធ្វើឲ្យប្រទេសទាំងនោះស្ថិតក្រោមកណ្ដាប់ដៃខ្លួន។
ក្នុងសន្និសីទសារព័ត៌មានមួយកាលពីថ្ងៃសុក្រសប្ដាហ៍មុន អ្នកនាំពាក្យក្រសួងការបរទេសចិន អ្នកស្រី ហួ ឈុនអ៊ីង មានប្រសាសន៍ថាចិនមិនមានអន្ទាក់បំណុលណាមួយនោះឡើយ។ អ្នកស្រី បន្តថាចំនួនប្រាក់កម្ចីដែលចិនផ្ដល់ឲ្យប្រទេសមួយចំនួនជាផ្នែកមួយតូចតែប៉ុណ្ណោះ បើប្រៀបធៀបនឹងកម្ចីដែលប្រទេសទាំងនោះជំពាក់បរទេស។ អ្នកនាំពាក្យរូបនេះបានចោទជាចម្ងល់ថាតើប្រព័ន្ធផ្សព្វផ្សាយលោកខាងលិចចេះពាក្យ«អន្ទាក់បំណុល»នេះមកពីណា។
អ្នកស្រី ហួ ឈុនអ៊ីង ក៏បានចោទជាសំណួរផងដែរថានៅពេលដែលលោកខាងលិចផ្ដល់ប្រាក់កម្ចីដល់ប្រទេសណាមួយ«ហេតុអ្វីគេមិនហៅថាជាអន្ទាក់ដែរទៅ?» ហើយ «ហេតុអ្វីនៅពេលដែលប្រាក់កម្ចីនោះជារបស់ចិនបែរជាគេថាជាអន្ទាក់ទៅវិញ?»។ អ្នកស្រីបន្ថែមថាការចោទប្រកាន់នេះមិនសមហេតុផលអ្វីទាល់តែសោះ។
អ្នកស្រី បានលើកឡើងពីករណីរបស់ប្រទេសស្រីលង្កាថាស្រីលង្កាជំពាក់បំណុលខ្លួនតែ១០ភាគរយប៉ុណ្ណោះនៃបំណុលបរទេសសរុបដែលប្រទេសនេះជំពាក់បរទេសនៅឆ្នាំ២០១៧ ហើយអ្នកស្រីបន្តទៀត ដូច្នេះវិបត្តិបំណុលរបស់ស្រីលង្កាមិនមានពាក់ព័ន្ធអ្វីជាមួយចិននោះទេ។
ទំនាក់ទំនងរវាងចិននិងស្រីលង្កា ចាប់ផ្ដើមមានភាពល្អូកល្អឺននៅឆ្នាំ២០០៧ នៅពេលដែលរដ្ឋាភិបាលក្រុងប៉េកាំងផ្ដល់ការគាំទ្រទាំងផ្នែកយោធានិងការទូតដល់អតីតរដ្ឋាភិបាលរបស់លោក រ៉ាចាប៉ាក់សា ក្នុងការបោសសម្អាតក្រុមឧទ្ទាមខ្លាតាមិល។ ចាប់តាំងពីពេលនោះមក ចិនបានលូកដៃកាន់តែជ្រៅចូលក្នុងប្រទេសស្រីលង្កាដែលគេអាចមើលឃើញតាមរយៈគម្រោងសាងសង់ធំៗជាច្រើនជាមូយនឹងប្រាក់កម្ចីដែលមានអត្រាការខ្ពស់។
រយៈពេល១០ឆ្នាំក្រោយបំណុលចិនចេះតែកើន ហើយលទ្ធភាពសងមិនមានទៀតនោះ ប្រទេសស្រីលង្កា ក៏បានបង្ខំចិត្តប្រគល់កំពង់ផែហាំបានតូតា ដែលជាកំពង់ផែដ៏ធំរបស់ខ្លួនទៅឲ្យចិនក្នុងរយៈពេល៩៩ឆ្នាំ។
តាមការចុះផ្សាយរបស់សារព័ត៌មានវ៉ាស៊ីនតុនប៉ុស្តិ៍របស់សហរដ្ឋអាមេរិក ក្រៅពីស្រីលង្កា ប្រទេសប៉ា គីស្ថាន និងប្រទេសមួយចំនួននៅទ្វីបអាព្រិចក៏កំពុងតែប្រឈមនឹងបញ្ហាបំណុលចិននេះដូចគ្នាតាមរយៈគម្រោងខ្សែក្រវ៉ាត់នឹងផ្លូវ។
អ្នកនិពន្ធសៀវភៅដែលនិយាយពីទំនាក់ទំនងចិននិងអាមេរិក លោកចន ប៉ុមហ្រ្វេដ និយាយថាកម្រោង ខ្សែក្រវ៉ាត់និងផ្លូវដែលចិនបានបង្កើតឡើងនៅឆ្នាំ២០១៣ មានលក្ខណៈជាអន្ទាក់បំណុលបែបការទូត។ លោក បន្តថានៅពេលប្រទេសទាំងនោះមិនមានលទ្ធភាពផងបំណុល ចិននឹងឲ្យប្រទេសទាំងនោះធ្វើតាមអ្វីដែលខ្លួនចង់បានជាមិនបានជាមិនខាន៕