ព្រះមហាក្សត្របានក្រើនរំឭកអ្នកនយោបាយជាប់ឆ្នោត ពីសារសំខាន់នៃការបង្រួបបង្រួមជាតិ និងនីតិរដ្ឋ ដើម្បីឲ្យកម្ពុជាមានក្របខ័ណ្ឌច្បាប់គ្រប់គ្រាន់ស្របតាមការវិវឌ្ឍរបស់សង្គមជាតិ។
ក្នុងឱកាសបើកសម័យប្រជុំដំបូងនៃរដ្ឋសភា នីតិកាលទី៦ ថ្ងៃពុធនេះ ព្រះមហាក្សត្រ បានក្រើនរំឭក តំណាងរាស្ត្រជាប់ឆ្នោត ដែលត្រៀមចូលកាន់ដំណែងអាណត្តិទី៦នេះថា ត្រូវធ្វើយ៉ាងណាឲ្យពលរដ្ឋរស់នៅស្មើភាពគ្នាក្នុងជំនឿសាសនា ការសិក្សារៀនសូត្រ មានការងារធ្វើ និងការពារដោយច្បាប់។
ព្រះមហាក្សត្រ នរោត្ដម សីហមុនី
ព្រះអង្គក្រើនរំឭកទៀតថា ព្រះអង្គមានជំនឿយ៉ាងមុតមាំថា រដ្ឋាភិបាលអាណត្តិថ្មី នឹងបន្តលើកកម្ពស់កម្រិតជីវភាពប្រជាពលរដ្ឋ សេដ្ឋកិច្ចជាតិ ការអភិវឌ្ឍពង្រឹងប្រព័ន្ធការពារជាតិឈរលើស្មារតីបង្រួបបង្រួមជាតិ។
ព្រះមហាក្សត្រ នរោត្ដម សីហមុនី
អ្នកនាំពាក្យរដ្ឋសភាលោក ឡេង ប៉េងឡុង អះអាងថាអ្វីដែលព្រះមហាក្សត្របានក្រើនរំឭក លោកថាដូចមានចែងក្នុងកម្មវិធីនយោបាយរបស់គណបក្សប្រជាជនកម្ពុជា។
អ្នកនាំពាក្យរូបនេះ អះអាងទៀតថា រដ្ឋសភានៅអាណត្តិថ្មីនេះ នឹងឃ្លាំមើលការអនុវត្តកម្មវិធីនយោបាយរបស់បក្សកាន់អំណាចនេះ ដើម្បីឆ្លើយតបទៅកង្វល់របស់ព្រះមហាក្សត្រ។
អ្នកនាំពាក្យរដ្ឋសភាលោក ឡេង ប៉េងឡុង
អ្នកនាំពាក្យសមាគមអាដហុកការពារសិទ្ធិមនុស្ស លោក ស៊ឹង សែនករុណា និយាយថា លោកហាក់មានជំនឿតិចតួចថា រដ្ឋសភាឯកបក្សពេលនេះ អាចធានានីតិរដ្ឋបាន ដោយថាក្បាលម៉ាស៊ីនដឹកនាំថ្មីនេះ បានបាត់បង់ប្រព័ន្ធឆ្លុះបញ្ចាំងរួចស្រេចទៅហើយ។
អ្នកនាំពាក្យសមាគមអាដហុកការពារសិទ្ធិមនុស្ស លោក ស៊ឹង សែនករុណា
សូមជំរាបជូនថា នៅអាណត្តិទី៦នេះ គណបក្សប្រជាជនកម្ពុជា ឈ្នះអាសនៈទាំងអស់ក្នុងសភាចំនួន១២៥ក្រោយអតីតគណបក្សប្រឆាំងត្រូវបានផាត់ចេញពីឆាកនយោបាយមុនការបោះឆ្នោតមកដល់។ ជ័យជម្នះនេះជំរុញឲ្យបក្សកាន់អំណាច បន្តគ្រប់គ្រងទាំងស្ថាប័នរដ្ឋសភា និងរដ្ឋាភិបាល។
