តំណាងស្ថានទូតប្រទេសប្រកាន់របបសេរីចំនួន៩ និងអង្គការសង្គមស៊ីវិលមួយចំនួនទៀត មិនបានចូលរួម ក្នុងពិធីប្រជុំសភាលើកដំបូងសម្រាប់អាណត្តិទី៦ ដែលប្រព្រឹត្តិទៅនៅថ្ងៃនេះនោះទេ។
ថ្លែងប្រាប់អ្នកសារព័ត៌មាននៅក្រោយកិច្ចប្រជុំនាព្រឹកនេះថា អ្នកនាំពាក្យរដ្ឋសភាលោក ឡេង ប៉េងឡុង ឲ្យដឹងថា តំណាងទូតចំនួន៩ ក្នុងចំណោមទូតចំនួន៣១ មិនបានចូលរួមសម័យប្រជុំលើកដំបូងនៃសភានីតិកាលទី៦នេះទេ ដូចជា សហរដ្ឋអាមេរិក អូស្ដ្រាលី បារាំង អាល្លឺម៉ង់ កាដាណា អង់គ្លេស ស៊ុយអែត សហភាពអឺរ៉ុប និងប៊ុលហ្គារី។ ចំណែកអង្គការចំនួន៥ ក្នុងចំណោមអង្គការសង្គមស៊ីវិល១១ ក៏មិនបានចូលរួមផងដែរ។
អ្នកនាំពាក្យលោក ឡេង ប៉េងឡុង ថ្លែងថា ទោះបីជាអវត្តមានតំណាងទូតមួយចំនួនក៏ដោយ ប៉ុន្ដែ វាមិនប៉ះពាល់ដល់ដំណើរការ និងមុខមាត់របស់រដ្ឋសភាថ្មីនោះទេ។ លោកអះអាងថា សភាដែលមានគណបក្សតែមួយបែបនេះ គឺមិនផ្ទុយនឹងគោលការណ៍ប្រជាធិបតេយ្យនោះទេ ដោយថា ប្រជាធិបតេយ្យនៅកម្ពុជា ខុសពីប្រជាធិបតេយ្យនៅអឺរ៉ុប។
មន្ដ្រីជាន់ខ្ពស់នៃកម្មវិធីផ្នែកអង្កេតរបស់អង្គការខុមហ្វ្រែល លោក កនសាវាង្ស មានប្រសាសន៍ថា នេះជាការបង្ហាញជំហរអវិជ្ជមានចំពោះរដ្ឋាភិបាលថ្មីរបស់កម្ពុជា បន្ទាប់ពីប្រទេសលោកសេរីទាំងនោះបានសំដែងការរិះគន់ និងខកចិត្តចំពោះការបោះឆ្នោតនៅកម្ពុជា។
មន្ដ្រីជាន់ខ្ពស់នៃកម្មវិធីផ្នែកអង្កេតរបស់អង្គការខុមហ្វ្រែល លោក កនសាវាង្ស
ក្រុមប្រទេសលោកសេរីមួយចំនួន រួមមាន សហភាពអឺរ៉ុប សហរដ្ឋអាមេរិក អូស្ដ្រាលី អាល្លឺម៉ង់ ស៊ុយអែត និងចក្រភពអង់គ្លេសជាដើម បានហៅការបោះឆ្នោតនៅកម្ពុជាកាលពីថ្ងៃទី២៩ខែកក្កដា ថា មិនមានភាពត្រឹមត្រូវ និងយុត្តិធម៌នោះទេ ខណៈមិនមានគណបក្សសង្គ្រោះជាតិ ដែលជាអតីតគណបក្សប្រឆាំងចូលរួម។
ក្រុមប្រទេសទាំងនេះក៏ធ្លាប់បានព្រមានផងដែរថា ពួកគេនឹងមិនទទួលស្គាល់រដ្ឋាភិបាលថ្មីកើតក្រោយការបោះឆ្នោតនេះឡើយ៕