ក្រុមស្រាវជ្រាវកិច្ចការព្រំដែននៅរាជបណ្ឌិត្យសភាកម្ពុជាអះអាងថា ការបោះបង្គោលព្រំដែនរវាងកម្ពុជានិងវៀតណាមនៅខេត្តមួយចំនួន មិនធ្វើឲ្យកម្ពុជាបាត់បង់ទឹកដីនោះទេ រួមទាំងតំបន់ថ្ម៣ដំផងនៅតែជាកម្មសិទ្ធិរបស់កម្ពុជា។
ប្រធានក្រុមស្រាវជ្រាវកិច្ចការព្រំដែននៅរាជបណ្ឌិត្យសភា លោក សុខ ទូច មានប្រសាសន៍ថា ការបោះបង្គោលព្រំដែននៅតាមខេត្តមួយចំនួនរវាងកម្ពុជានិងវៀតណាមកន្លងទៅ មិនធ្វើឲ្យកម្ពុជាបាត់បង់ទឹកដីដូចការរិះគន់មួយចំនួននោះទេ ដោយលោកលើកករណីជាក់ស្តែងនៅតំបន់ថ្មបីដុំ ស្ថិតក្នុងភូមិថ្មបីដុំ ស្រុកបូរីជលសារ ខេត្តតាកែវ ស្ថិតនៅក្នុងទឹកដីកម្ពុជានៅឡើយ។
ប្រធានក្រុមស្រាវជ្រាវកិច្ចការព្រំដែននៅរាជបណ្ឌិត្យសភា លោក សុខ ទូច
មួយរយៈចុងក្រោយនេះ មានការផ្សព្វផ្សាយថា តំបន់ថ្មបីដុំ ក្នុងខេត្តតាកែវ ត្រូវវៀតណាមគ្រប់គ្រង ហើយថា មានតំបន់ខ្លះក្នុងខេត្តស្វាយរៀងវៀតណាមបោះបង្គោលលើទឹកដីខ្មែរ។
លោក សុខ ទូច បញ្ជាក់ថា នៅដើមរដូវប្រាំងខាងមុខនេះ ក្រុមការងាររបស់លោកគ្រោងចុះទៅស្រាវជ្រាវបន្តក្នុងឃុំប៉ក់យៃ ខេត្តរតនគិរី ស្ថិតនៅន្លោះបង្កោល៣០ទៅបង្គោល៤២ ដែលជាតំបន់ចម្រូងចម្រាស់នៃប្រទេសទាំងពីរ។
ចំណែក ខេត្តដែលនៅមានភាពចម្រូងចម្រាស់ក្នុងការបោះបង្គោលព្រំដែនជាមួយវៀតណាម រួមមានខេត្ត ស្វាយរៀង រតនគិរី មណ្ឌលគិរី កំពត តាកែវ និងខេត្តកណ្ដាល។ នេះ បើតាម លោក វ៉ា គឹមហុង។
គួរបញ្ជាក់ថាការបោះបង្គោលព្រំដែនកម្ពុជាវៀតណាមបានធ្វើឡើងកាលពីឆ្នាំ២០០៦ក្នុងបណ្តោយព្រំដែនកម្ពុជានិងវៀតណាមប្រវែង១២៧០គីឡូម៉ែត្រ។ ប្រទេសទាំងពីរបានកំណត់ថាត្រូវបោះបង្គោលព្រំដែនចំនួន៣៧៥បង្គោល។
ប្រធានគណៈកម្មាធិការព្រំដែនកម្ពុជា លោក វ៉ា គឹមហុង កាលពីចុងឆ្នាំ២០១៧ អះអាងថា ការបោះបង្គោលព្រំដែន បំពេញបន្ថែម នៅតាមព្រំដែនកម្ពុជា-វៀតណាម បានរួចរាល់ជាង ៨៤ភាគរយ នៅក្នុងចំណោមព្រំដែនសរុប៕