អតីតគណបក្សប្រឆាំង ប្រកាសមិនទទួលស្គាល់រដ្ឋសភា និងរដ្ឋាភិបាលថ្មី ដែលដឹកនាំដោយបក្សកាន់អំណាចនោះទេ ដោយថា រដ្ឋាភិបាលនេះកើតចេញពីការបោះឆ្នោត «ក្លែងក្លាយ» និងថា អាចនាំមកនូវគ្រោះថ្នាក់ដល់សេដ្ឋកិច្ចរបស់កម្ពុជានាពេលអនាគត។
ក្នុងសេចក្ដីថ្លែងការណ៍ចេញផ្សាយនៅថ្ងៃនេះ អតីតគណបក្សសង្គ្រោះជាតិអះអាងថា រដ្ឋសភា និងរដ្ឋាភិបាលថ្មី អាណត្តិទី៦ ដែលកំពុងបង្កើតឡើងនេះ គឺមិនឆ្លុះបញ្ចាំងឆន្ទៈប្រជាពលរដ្ឋពិតប្រាកដនោះទេ និងថា មិនអាចតំណាងឲ្យពលរដ្ឋខ្មែរនៅលើឆាកអន្ដរជាតិបានឡើយ។
អតីតគណបក្សប្រឆាំងមួយនេះ បានចោទថា រដ្ឋសភា «ឯកបក្ស» ដឹកនាំដោយគណបក្សប្រជាជនកម្ពុជា គឺកើតចេញពីការបោះឆ្នោត «ក្លែងក្លាយ» មិនស្របទៅនឹងរដ្ឋធម្មនុញ្ញ ព្រមទាំងគ្មានការចូលរួមពីតំណាងស្ថានទូតធំៗនៅក្នុងពេលបើកសម័យប្រជុំសភាលើកដំបូងរបស់ខ្លួន កាលពីថ្ងៃម្សិលមិញ។
អតីតគណបក្សសង្គ្រោះជាតិក៏អំពាវនាវទៅសហប្រធាននៃសន្និសីទសន្ដិភាពទីក្រុងប៉ារីស បើកកិច្ចប្រជុំបន្ទាន់ឡើងវិញ ដើម្បីដោះស្រាយបញ្ហានយោបាយនៅកម្ពុជាពេលនេះ។
បន្ទាប់ពីកម្ពុជាបានបញ្ចប់ដំណើរការបោះឆ្នោតជ្រើសតាំងតំណាងរាស្ដ្រនីតិកាលទី៦ ឆ្នាំ២០១៨កន្លងទៅ ក្រុមប្រទេសលោកសេរីមួយចំនួន នាំមុខដោយសហរដ្ឋអាមេរិក សហគមន៍អឺរ៉ុប ចក្រភពអង់គ្លេស អូស្ដ្រាលីជាដើម បានរិះគន់ការបោះឆ្នោតនេះ ថា មិនអាចទទួលយកបាន ខណៈគ្មានវត្តមានអតីតបក្សប្រឆាំងចូលរួម។
ក្រុមប្រទេសលោកសេរីទាំងនោះ ក៏ព្រមានផងដែរថា ពួកគេនឹងមិនទទួលស្គាល់រដ្ឋាភិបាលថ្មី កើតក្រោយការបោះឆ្នោតបែបនេះនោះឡើយ៕
